ᖃᐅᔨᓴᖅᑏᑦ ᑭᖑᓪᓕᖅᐹᖓᑦ ᐅᓂᒃᑳᓕᐊᖏᓐᓂᑦ: ᐃᑦᓯᕙᐅᑕᒧᑦ ᐱᒋᐊᖅᑎᑕᐅᓯᒪᔪᖅ ᐊᑲᐅᖏᓕᐅᕈᑎ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᔪᒪᔪᒥᑦ ᖃᐅᔨᓴᕐᓂᖅ ᐱᓕᕆᔾᔪᓯᒥᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᐱᓕᕆᐊᖃᖅᑎᓪᓗᒋᑦ ᑭᖕᖓᕐᓂ, ᓄᓇᕗᑦ ᔪᓂ 1-ᖑᑎᓪᓗᒍ, 2020

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᒪᓕᒐᖅ
ᑎᑎᕋᕐᓯᒪᕕᖏᑦ 45.76(3)

ᐊᑲᐅᖏᓕᐅᕈᑎᓕᒃ: ᐃᑦᓯᕙᐅᑕᖓᑦ ᓄᓇᓕᕐᒥᐅᑕᒥᑦ ᕿᒥᕐᕈᔩᑦ ᐊᒻᒪ ᐊᑲᐅᖏᓕᐅᕈᑎᐅᔪᓂᑦ ᖃᐅᔨᓴᖅᑏᑦ ᐅᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP)

ᓄᓇᕗᑦ ᒐᕙᒪᒃᑯᑦ ᑭᐅᔾᔪᑎᖓ ᑭᖑᓪᓕᖅᐹᖅᓯᐅᑎᒧᑦ ᐅᓂᒃᑳᓕᐊᒧᑦ (Réponse du gouvernement du Nunavut au rapport final [PDF]

Format PDF

Liens connexes

• Rapport final de la CCETP
  28 février 2023
• Rapport intérimaire de la CCETP
  22 juin 2022
• Réponse de la commissaire de la GRC
  15 décembre 2022
• ᐅᓂᒃᑳᓕᐊᖑᑲᐃᓐᓇᖅᑐᖅ
  ᔪᓂ 22, 2022
• ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖓ
  ᑏᓰᐱᕆ 15, 2022

ᓇᓗᓇᐃᔭᐃᔾᔪᑎ

[1] ᔪᓂ 2020, ᖃᐅᔨᓴᖅᑏᑦ ᕿᒥᕐᕈᐊᓚᐅᖅᑐᑦ ᐊᐅᓚᔫᒥᑦ ᐊᔾᔨᓕᐅᖅᑕᐅᔪᕕᓂᕐᒥᒃ ᑕᑯᑦᓴᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᒃᑰᔫᖓᑦ ᑐᕌᖅᑎᓪᓗᒍ ᐊᖑᑎᒧᑦ. ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᒥ ᑕᑯᑦᓴᐅᔪᖃᓕᖅᑐᓂ ᐊᖁᑎᐅᑉ ᒪᑐᐊ ᒪᑐᐃᖅᑕᐅᑎᓪᓗᒍ, ᐊᑦᑐᐃᓗᓂ ᐊᖑᑎᒥᑦ ᐊᒻᒪ ᐅᕐᕈᑎᑕᐅᓗᓂ ᐊᖑᑎ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᐊᖁᓚᐅᖅᑐᖅ ᓄᓇᒃᑰᔫᒥᑦ, ᐊᒻᒪ ᐊᓯᖏᑦ ᐃᓚᒋᔭᐅᔪᑦ, ᓱᒡᒑᓪᓗᑎᒃ ᑎᒍᓯᓕᖅᑐᑎᒃ ᐊᖑᑎᒥᑦ.

[2] ᖃᐅᔨᓴᖅᑏᑦ ᐊᓯᖏᓐᓂᑦ ᑐᑭᓯᒋᐊᕈᑎᓂᑦ ᑐᓴᖅᑎᑕᐅᓚᐅᖅᑐᑦ, ᐊᖑᑎᐅᔪᖅ ᑎᒍᔭᐅᓯᒪᕕᒻᒨᖅᑕᐅᓯᒪᓕᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᕆᕝᕕᖓᓂ, ᐊᓯᐊᓄᑦ ᑎᒍᔭᐅᓯᒪᔪᒧᑦᑕᐅᖅ ᐱᒋᐊᖅᑕᐅᓚᐅᖅᑐᖅ. ᐊᖑᑎᐅᔪᖅ ᓂᐊᖁᖓᒍᑦ ᐋᓐᓂᕐᓯᒪᓚᐅᖅᑐᖅ ᐊᒻᒪ ᖃᖓᑕᓲᒃᑯᑦ ᐃᖃᓗᓐᓅᕈᔾᔭᐅᓕᖅᑐᒥᓂᖅ ᖃᐅᔨᓴᖅᑕᐅᓂᐊᕐᒪᑦ.

[3] ᐋᒐᓯ 18, 2020, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᑦᓯᕙᐅᑕᖓᑦ ᓄᓇᓕᕐᒥᐅᑕᒥᑦ ᕿᒥᕐᕈᔩᑦ ᐊᒻᒪ ᐊᑲᐅᖏᓕᐅᕈᑎᐅᔪᓂᑦ ᖃᐅᔨᓴᖅᑏᑦ ᐅᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ("ᖃᐅᔨᓴᖅᑏᑦ") ᓴᖅᑮᓚᐅᖅᑐᑦ ᐃᑦᓯᕙᐅᑕᕐᒧᑦ-ᐱᒋᐊᖅᑎᑕᒥᑦ ᐊᑲᐅᖏᓕᐅᕈᑎᒥᑦ ᐱᓕᕆᔾᔪᓯᒥᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᓚᒋᔭᐅᓚᐅᖅᑐᑦ ᖃᓄᐃᒍᑎᐅᔪᒧᑦ, ᐊᑐᖅᑕᐅᓚᐅᖅᑐᒥᑦ ᑭᖕᖓᕐᓂ, ᓄᓇᕘᒥ. ᐃᑦᓯᕙᐅᑕᖓᑦ ᓇᓗᓇᐃᓚᐅᖅᑐᖅ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᔪᒪᓂᖓᓄᑦ ᖃᐅᔨᓴᖅᑏᑦ ᖃᐅᔨᓴᖁᔭᐅᓕᓚᐅᖅᑐᖅ ᐊᑲᐅᖏᓕᐅᕈᑎᐅᔪᖅ, ᒪᓕᑦᑕᐅᓗᑎᒃ ᑎᑎᕋᕐᓯᒪᕕᒻᒦᑦᑐᑦ 45.66(1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᒪᓕᒐᖓᓐᓂ (RCMP ᒪᓕᒐᖅ).

[4] ᖃᐅᔨᓴᓚᐅᖅᑎᓪᓗᒋᑦ, ᖃᐅᔨᓴᖅᑏᑦ ᓇᓂᓯᓚᐅᖅᑐᑦ 36-ᓂᑦ ᐊᒻᒪ 20-ᓂᑦ ᐊᑐᖁᔭᒥᓂᒃ ᓇᓗᓇᐃᔭᐃᓪᓗᑎᒃ ᓯᕗᓂᐊᓂ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᔪᒪᔪᒥᑦ ᖃᐅᔨᓴᕐᓂᐅᔪᒥᑦ ᐅᓂᒃᑳᓕᐊᖏᓐᓂ (ᐃᓚᖓ 1), ᑐᓂᔭᐅᓚᐅᖅᑐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᔪᓂ 22, 2022.

[5] ᓯᕗᓂᐊᓂ ᐅᓂᒃᑳᓕᐊᖏᓐᓂ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᖃᓄᐃᒍᑎᐅᔪᕕᓂᖅ ᐊᑐᖅᑕᐅᓚᐅᖏᓐᓂᖓᓂᑦ ᓯᕗᓪᓕᕐᒥ ᓴᖅᑭᕆᐊᖓᑎᓪᓗᒍ ᑕᑯᑦᓴᐅᓚᐅᕐᒪᑦ ᕿᒥᕐᕈᐊᖅᑕᐅᓚᐅᖅᑐᓂ ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᖅ. ᖃᐅᔨᓴᖅᑏᑦ ᑕᑯᓚᐅᖏᑦᑐᑦ ᓇᓗᓇᐃᔭᐃᑎᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᒋᐊᕐᓯᒐᓱᑦᑐᒥᓂᐅᓂᖏᓐᓂᑦ ᐊᖑᑎᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓈᒻᒪᑦᑐᓂᑦ ᐊᑐᖅᑐᑎᒃ ᑎᒍᓯᔪᕕᓂᐅᔪᑦ ᐊᖑᑎᒥᑦ, ᐱᔾᔪᑎᖃᓚᐅᖅᑐᑦ ᓱᒻᒪᑦ ᑐᐊᕕᐊᖑᒋᐊᖃᕐᓂᕐᒪᖔᖅ, ᐊᒻᒪ ᖃᓄᑎᒋ ᐊᑦᓱᕉᑎᒋᔭᒥᓂᖓᑦ ᑎᒍᓯᓪᓗᑎᒃ ᓈᒻᒪᓚᐅᖅᑐᖅ. ᑭᓯᐊᓂᓕ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᑦᑕᓇᖅᑐᒥᓂᐅᓂᖓᓄᑦ ᐊᒻᒪ ᓈᒻᒪᒐᓂ ᐊᖁᑕᐅᑎᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᒃᑰᔫᖓᑦ ᖃᓂᒋᓗᐊᖅᑕᖓᒍᑦ ᐊᖑᑎᐅᑉ, ᐱᓗᐊᖅᑐᒥ ᐃᓱᒪᒋᓪᓗᒋᑦ ᐊᑐᕆᐊᑉ ᖃᓄᐃᑦᑑᓂᖏᑦ.

[6] ᖃᐅᔨᓴᖅᑏᑦ ᓇᓗᓇᐃᔭᐃᓚᐅᖅᑐᑦ ᐱᔾᔪᑎᐅᔪᓂᑦ ᐱᒻᒪᕆᐅᔪᓂᑦ ᐃᓱᒫᓗᓐᓇᖅᑐᓂᑦ ᐱᔾᔪᑎᒋᓪᓗᒍ ᐊᖑᑎᐅᑉ ᖃᓄᖅ ᐱᓕᕆᔾᔪᑎᐅᓯᒪᓂᖓ ᑎᒍᔭᐅᓚᐅᖅᑎᓪᓗᒍ. ᐊᖑᑎᐅᔪᖅ, ᐊᑦᓱᑲᓪᓚᒃ ᐋᖓᔮᖅᑐᒥᓂᐅᓗᓂ, ᐊᓐᓄᕋᐃᔭᖅᑕᐅᒋᐊᖃᓚᐅᖅᑐᖅ ᐊᓐᓄᕌᖏᑦ ᖃᐅᓯᐊᓘᓐᓂᕐᒪᑕ ᐊᒻᒪ ᑎᒍᔭᐅᒪᕕᒻᒥ ᐃᓪᓗᕈᓯᕐᒧᑦ ᕿᒪᑦᑕᐅᓂᖅᑐᓂ ᐃᓗᐊᖏᓐᓈᑎᓪᓗᒍ. ᐱᔾᔪᑎᒋᓪᓗᒋᑦ ᓈᒻᒪᖏᑦᑐᑦᓯᐊᑦ ᐃᓪᓗᕈᓰᑦ ᑎᒍᔭᐅᒪᕕᒻᒥ ᐊᒻᒪ ᐊᒥᓲᓚᐅᖅᑐᑦ ᑎᒍᔭᐅᒪᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᓯᐊᓂᑦ ᑎᒍᔭᐅᒪᔪᒥᑦᑕᐅᖅ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᕐᓯᒋᐊᖃᓕᕐᓂᓚᐅᖅᑐᑦ ᐊᖑᑎᒥᑦ. ᐊᐃᑉᐸᖓ ᑎᒍᔭᐅᒪᔪᖅ ᖃᐅᔨᒪᔭᐅᕐᓂᖅᑐᓂ ᓂᖕᖓᐅᒪᐃᓐᓇᕐᓂᖓᓄᑦ, ᐸᐸᒧᑦ ᑎᒻᒥᑳᕐᕕᐅᕋᑖᑦᓯᐊᖅᑐᓂᓗ ᑎᒍᔭᐅᓇᓱᐊᖅᑐᓂ, ᐊᒻᒪ ᐋᖓᔮᕐᓂᖅᑐᓂ ᐊᒻᒪ ᓂᖕᖓᐅᒪᓪᓗᓂ. ᐃᓪᓗᕈᓯᕐᒨᖅᑕᐅᓚᐅᖅᑎᓪᓗᒍ ᑎᒍᔭᐅᒪᕕᒻᒧᑦ, ᐊᑦᓱᑲᓪᓚᒃ ᐱᒋᐊᕐᓯᓐᓂᓚᐅᖅᑐᖅ ᐊᖑᑎᒥᑦ, ᑎᓪᓗᐊᓪᓗᓂᐅᒃ, ᑐᒃᑲᖅᑐᓂᐅᒃ ᐊᒻᒪ ᑐᑎᕙᑦᑐᓂᐅᒃ ᐃᓯᒐᕐᒥᓄᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑎᒍᔭᐅᒪᕕᒻᒦᓚᐅᖏᒻᒪᑕ, ᐅᐊᑦᓯᐅᔪᖅ ᐅᑕᖅᑭᑲᐃᓐᓇᖅᑐᒥᓂᖅ ᐊᖑᑎ ᑮᓇᖓᒍᑦ ᐊᑦᓱᑲᓪᓚᒃ ᐱᒋᐊᖅᑕᐅᖃᑦᑕᑎᓪᓗᒍ ᐅᕐᕈᓯᒪᑎᓪᓗᒍ ᓇᑎᕐᒥ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᒻᒨᓚᐅᖅᑎᓐᓇᒋᑦ ᐊᒻᒪ ᐲᖅᑕᐅᓗᓂ ᐊᐃᑉᐸᖓ ᑎᒍᔭᐅᒪᔪᖅ.

[7] ᐊᖑᑎ, ᐋᓐᓂᑎᖅᑕᐅᓯᒪᓪᓗᐊᓕᖅᑐᓂ ᐊᒻᒪ ᓱᓕ ᐃᓗᐊᖏᓐᓈᖅᑐᓂ, ᕿᒪᑦᑕᐅᓯᒪᓕᕐᓂᕐᒥᔪᖅ ᐃᑲᕐᕋᐃᑦ ᖁᓕᐅᓗᐊᓄᑦ (10) ᐊᐅᖏᓐᓇᐅᑎᓪᓗᒍ, ᖃᐅᓯᐅᓗᓂ ᐊᒻᒪ ᐊᔾᔨᒌᖏᑦᑐᓄᑦ ᑎᒥᒦᖔᕐᓯᒪᔪᓂᑦ ᖃᐅᓯᐅᓗᓂ. ᐅᖓᑖᓂ ᑭᓯᐊᓂ ᐃᑲᕐᕋᐅᑉ ᐊᑕᐅᓯᐅᑉ (1) ᐊᒻᒪ ᐃᑲᕐᕋᐅᖏᓱᖓᖅᑑᑉ (45 ᒪᓇᑦᔅ) ᐊᖑᑎ ᐋᓐᓂᐊᔪᓕᕆᔨᓄᑦ ᑲᒪᒋᔭᐅᓕᑕᐃᓐᓇᓚᐅᖅᑐᖅ. ᓯᕗᓪᓕᖅᐹᖅ ᐋᓐᓂᐊᓯᐅᖅᑎ ᐱᔭᕇᕈᓐᓇᓚᐅᖏᑦᑐᖅ ᖃᐅᔨᓴᕆᐊᕋᓗᐊᕋᒥᐅᒃ, ᐊᒻᒪ ᐃᓱᒪᒋᔭᐅᓕᖅᑐᓂ ᐅᓗᕆᐊᓇᓗᐊᕆᐊᖓ ᐊᖑᑎ ᐊᓯᐊᓅᖅᑕᐅᓇᓱᒃᑲᓗᐊᕈᓂ ᐋᖓᔮᕐᓂᖓ ᐱᓪᓗᒍ. ᐃᑲᕐᕋᐃᑦ 16 ᐊᓂᒍᓚᐅᖅᑎᓪᓗᒋᑦ ᐊᖑᑎ ᐋᓐᓂᐊᓯᐅᕐᕕᒻᒨᕈᔾᔭᐅᓚᐅᖅᑎᓐᓇᒍ ᐋᓐᓂᐊᖏᑦ ᖃᐅᔨᓴᖅᑕᐅᖁᓪᓗᒋᑦ. ᖃᐅᔨᓴᖅᑕᐅᓚᐅᖅᑎᓪᓗᒍ, ᐊᖑᑎ ᐋᓐᓂᐊᔪᓕᕆᔨᒃᑯᓐᓄᑦ ᐃᖃᓗᓐᓅᕈᔾᔭᐅᓕᓚᐅᖅᑐᖅ, ᑕᐃᑲᓂ ᑲᒪᒋᔭᐅᓕᓚᐅᖅᑐᑦ ᐋᓐᓂᖅᑕᐅᓯᒪᓂᖏᑦ.

[8] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐱᓕᕆᔾᔪᑎᓂᑦ ᐃᑲᔪᖅᑎᖃᖏᓗᐊᕐᓂᑯᖏᓐᓄᑦ ᐱᔾᔪᑎᐅᓗᐊᓚᐅᕐᒪᑦ ᐅᖃᐅᓯᕆᓪᓗᒋᑦ ᖃᓄᖅ ᐊᑐᖅᑕᐅᓚᐅᖅᑐᑦ ᐊᑐᖅᑕᐅᒍᓐᓇᓚᐅᕐᒪᖔᑕ. ᐱᓕᕆᐊᕆᓐᓂᖏᑕᖏᓐᓂᑦ ᐱᑕᖃᕋᓗᐊᖅᑎᓪᓗᒍ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ, ᐊᒻᒪᑦᑕᐅᖅ ᐃᓚᖏᑦ ᐊᑐᖅᑕᐅᓐᓂᖏᑦᑐᑦ ᐱᓕᒻᒪᑦᓴᐅᑎᐅᔪᑦ, ᖃᐅᔨᓴᐅᑎᐅᔪᑦ ᐃᖅᑲᓇᐃᔭᖅᑎᓂᑦ, ᐊᒻᒪ ᒪᓕᖕᖏᓐᓂᐅᔪᖅ ᐊᑐᐊᒐᕐᓂᑦ, ᖃᐅᔨᓴᖅᑏᑦ ᑕᑯᓚᐅᖅᑐᑦ, ᐃᓘᓐᓇᕋᓗᖏᒍᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᖃᓄᖅᑑᕋᓱᑦᓯᒪᓚᐅᖅᑑᒐᓗᐊᑦ ᐊᐅᓚᑦᓯᓇᓱᐊᖅᑐᑎᒃ ᐱᔭᑦᓵᓗᒋᓚᐅᖅᑕᒥᓂᒃ ᐊᔪᕐᓇᐸᓗᑦᓯᐊᓚᐅᖅᑐᓂᑦ ᐃᓗᖏᓐᓂ ᐊᕝᕕᐊᕈᑎᐅᔪᑦ ᓴᖅᑮᓯᒪᓚᐅᖅᑐᑦ ᐊᑦᑕᓇᖅᑐᓂᑦ ᖃᓄᐃᓕᖓᒍᑎᐅᔪᓂᑦ. ᖃᓄᖅᑑᕋᓗᐊᕈᑎᒃ, ᐃᓘᓐᓇᖏᒍᑦ ᐱᓗᐊᔾᔭᐃᒃᑯᓯᖅᑕᐅᔪᓐᓇᖏᑦᑐᖅ ᐊᑦᑐᐃᓯᒪᓂᖓ ᖃᓄᖅ ᐱᑕᖃᖏᓐᓂᖏᓐᓄᑦ ᐱᓕᕆᔾᔪᑎᑦᓴᓂᑦ ᐃᑲᔪᕐᓱᐃᔾᔪᑎᑦᓴᑦ.

[9] ᖃᓄᐃᓕᖓᓂᖓ ᑭᖕᖓᐃᑦ ᑎᒍᔭᐅᒪᕕᖓᑕ ᐊᑦᓱᑲᓪᓚᒃ ᐃᓱᒫᓘᓇᕐᒥᔪᖅ. ᐊᒥᕋᕐᓯᑐᐃᓐᓇᕋᑎᒃ ᐃᓂᑦᓴᓂᑦ ᑎᒍᔭᐅᕙᑦᑐᓄᑦ, ᑕᕝᕘᓇᓕ ᓴᖅᑮᓯᒪᓪᓚᕆᑦᑐᑦ ᐊᑦᑕᓇᖅᑐᓂᑦ, ᑭᓯᐊᓂᑦᑕᐅᖅ ᐱᒻᒪᕆᐅᔪᓂᑦ ᐊᑲᐅᖏᓕᐅᕈᑎᖃᐅᖅᑐᖅ ᐃᓗᐊᑕ ᖃᓄᐃᓕᖓᓂᖓᓄᑦ ᐃᓪᓘᑉ, ᓴᖅᑮᓯᒪᔪᓂᑦ ᐃᓗᓯᒃᑯᑦ ᐊᒻᒪ ᐊᑦᑕᓇᑦᑕᐃᓕᒪᓂᒃᑯᑦ ᐅᓗᕆᐊᓇᕈᓐᓇᖅᑐᓂᑦ ᑎᒍᔭᐅᒪᕙᑦᑐᓄᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖅᑲᓇᐃᔭᖅᑎᖏᓐᓄᑦ. ᐆᑦᑑᑎᑦᓴᐅᔪᖅ ᑕᒪᑦᓱᒥᖓ ᑕᑯᓐᓇᖅᑕᐅᓚᐅᖅᑐᖅ ᑎᒍᔭᐅᒪᔪᖅ ᐸᐸᓕᒻᒧᑦ ᑎᒻᒥᑳᕐᕕᐅᓯᒪᔪᖅ ᐅᐊᓴᕋᓱᓚᐅᖅᑎᓪᓗᒍ ᐃᓯᖏᓐᓂᒃ ᖁᕝᕕᐅᑉ ᐃᒪᖓᓄᑦ ᐅᐱᓐᓇᕋᓂ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᑯᕝᕕᕕᖏᑦ ᑯᕕᒍᓐᓇᓚᐅᖏᑦᑐᑦ ᐅᐊᓴᕐᕕᖓᑕ, ᐊᒻᒪ ᐊᑐᐃᓐᓇᖅᑕᖃᕋᓂ ᐃᒪᓕᒻᒥᑦ ᐃᔩᓐᓂᒃ ᐅᐊᓴᐅᑎᓄᑦ ᐴᕐᒥᒃ. ᖃᓄᐃᓕᖓᓂᖓ ᐃᓪᓘᑉ ᐱᔭᕆᐊᑐᓚᕿᓚᐅᕐᒥᔪᖅ ᐊᒻᒪ ᐊᑦᑕᓇᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᑎᒍᔭᐅᔪᓂᑦ ᑎᒍᔭᐅᒪᕕᐅᑉ ᐃᓗᐊᓅᕐᓯᓇᓱᒋᐊᑦᓴᖅ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓈᒻᒪᓚᐅᖏᓐᓂᖓᓂᑦ ᑎᒍᔭᐅᒪᕕᐅᔪᖅ ᑕᐃᒫᕌᓗᒃ ᐃᓗᐊ ᖃᓄᐃᓕᖓᓂᖃᖅᑎᓪᓗᒍ.

[10] ᐃᓘᓐᓇᖏᒍᑦ, ᖃᐅᔨᓴᖅᑏᑦ ᑕᑯᓐᓇᖅᑕᖏᓐᓂ ᐱᓕᕆᔾᔪᑎᑦᓴᑭᓐᓂᐅᔪᖅ ᐱᔾᔪᑎᐅᓚᐅᕐᒪᑦ ᓇᐅᒃᑯᑐᐃᓐᓇᑦᓯᐊᖅ ᐊᑐᓚᐅᖅᑕᖏᑎᒍᑦ ᐊᖑᑎᐅᑉ ᑕᐃᑲᓂ ᔪᓂ 2020 ᐅᓐᓄᖓᓂ. ᐱᒋᐊᖅᐸᓪᓕᐊᓂᖏᓐᓂᑦ, ᐊᑦᑐᐃᔾᔪᑎᐅᔪᑦ ᐃᖅᑲᓇᐃᔭᖅᑎᑭᑦᓴᓂᕐᒥᑦ ᐊᑐᓚᕿᓚᐅᕐᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᖅᑲᓇᐃᔭᓕᖅᑐᑎᒃ ᐅᕙᑕᐃᖅᑐᑎᒃ ᐊᒻᒪ ᓈᒻᒪᖏᓗᐊᕐᓂᖏᒍᑦ ᑲᒪᒐᓱᐊᕐᓂᒃᑯᑦ ᐊᒥᓱᓂᑦ ᖃᓄᐃᒍᑎᐅᓚᐅᖅᑐᓂᑦ ᐊᒻᒪ ᖁᕕᐊᓇᓚᐅᖏᑦᑐᓂᑦ ᐊᑐᖅᑕᐅᓚᐅᖅᑐᓂᑦ ᑕᐃᑲᓂ ᐅᓐᓅᔪᒥ. ᑕᒪᓐᓇ, ᐱᔾᔪᑎᒋᓪᓗᒍ, ᐃᓚᒋᔭᐅᔪᑦ ᐅᐸᓚᕿᓐᓂᓚᐅᖅᑐᑦ ᐊᖑᑎᒥᑦ ᑐᐊᕕᐊᖃᖅᑐᑎᒃ ᐊᑐᖅᑕᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ. ᐊᒥᒐᕐᓯᓂᖏᑦ ᐃᓪᓗᕈᓯᕐᓂᑦ ᑎᒍᔭᐅᒪᕕᓐᓂᑦ, ᓱᓇᒃᑯᑖᓂᑦ ᐊᒻᒪ ᓈᒻᒪᑦᑐᓂᑦ ᐱᓕᒻᒪᑦᓴᖅᑕᐅᓯᒪᖏᓐᓂᖓ ᑎᒍᔭᐅᒪᕕᐅᑉ ᐅᐊᑦᓯᖓ ᐃᓘᓐᓇᑎᒃ ᐃᑲᔫᑎᖃᓚᐅᖅᑐᑦ ᐊᖑᑎ ᐃᓕᔭᐅᓚᐅᕐᓂᖓᓄᑦ ᐅᓗᕆᐊᓇᖅᑐᒻᒪᕆᒻᒧᑦ ᐊᑐᓚᕿᓕᖅᑐᓂ ᐊᑦᓱᑲᓪᓚᒃ ᐱᒋᐊᖅᑕᐅᓗᓂ ᑎᒥᖓ ᑎᒍᔭᐅᒪᕕᒻᒦᑎᓪᓗᒍ. ᑕᒪᓐᓇ ᓴᖅᑮᓚᕿᓚᐅᕐᒥᔪᖅ ᐱᒻᒪᕆᐅᔪᓂᑦ ᑐᑭᓯᒋᐊᕈᑎᓂᑦ ᐅᖃᐅᓯᖃᖅᑐᖃᖏᓐᓂᖓᓄᑦ ᐱᓪᓗᒍ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᒋᐊᖃᕐᓂᖓ. ᐱᓕᕆᔾᔪᑎᒍᑦ ᐊᒥᒐᐅᑎᐅᔪᑦ ᐱᔾᔪᑎᐅᓚᐅᕐᒥᔪᑦ ᖃᖓᒃᑯᑦ ᐊᒻᒪ ᖃᓄᖅ ᐋᓐᓂᐊᔪᓕᕆᔨᐅᔪᑦ ᐊᑐᐃᓐᓇᐅᓚᐅᖏᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓐᓄᑦ ᑭᖕᖒᒪᔭᐅᑎᓪᓗᒋᑦ.

[11] ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᖃᓄᑎᒋ ᐱᓕᕆᔾᔪᑎᖃᑦᓯᐊᖏᓐᓂᐅᔪᖅ ᑕᑯᔭᐅᓂᖏᒍᑦ ᐊᑦᓱᐊᓘᕐᓯᒪᓚᐅᕐᒪᑕ ᐃᓱᒫᓗᒋᔭᐅᓕᖅᑐᑎᒃ ᐱᓕᕆᔾᔪᑎᒍᑦ ᐃᓚᐃᓐᓈᖅᑕᐅᕙᑦᑐᓂᑦ, ᓲᕐᓗ ᐱᑕᖃᕆᐊᓕᓐᓂᑦ ᐱᔨᑦᓯᕋᐅᑎᖃᖏᓐᓂᖏᑦ ᑕᑯᔭᐅᓗᐊᖅᐸᖏᑦᑐᓂᑦ. ᖃᐅᔨᓴᖅᑏᑦ ᖃᐅᔨᓚᐅᖏᑦᑐᑦ ᓇᓗᓇᐃᔭᐃᑎᑦᓴᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᔪᑦ ᐱᓕᕆᖃᑕᐅᓚᐅᕐᓂᖏᓐᓂᑦ ᖃᓄᑐᐃᓐᓇᖅ ᐃᓂᖅᑎᖅᑕᐅᔾᔪᑎᑦᓴᓂᑦ.

[12] ᖃᐅᔨᓴᖅᑏᑦ ᖃᐅᔨᓴᒃᑲᓐᓂᖁᔨᓚᐅᖅᑐᑦ ᐱᓕᕆᔾᔪᑎᒍᑦ ᐃᓚᐃᓐᓈᕐᓯᒪᔪᖃᖏᒃᑲᓗᐊᕐᒪᖔᖅ ᐱᔾᔪᑎᐅᔪᒥᑦ ᑭᓯᐊᓂ, ᐱᒻᒪᕆᐅᓂᕐᓴᖅ, ᖃᓄᐃᓕᐅᕆᐊᑦᓴᐅᑎᒋᖁᔨᓚᐅᖅᑐᖅ ᐱᓕᕆᔾᔪᑎᐅᔪᑦ ᐱᔾᔪᑎᒋᓪᓗᒋᑦ. ᖃᐅᔨᓴᖅᑏᑦ ᐊᑐᖁᔨᓚᐅᕐᒥᔪᑦ ᐊᔾᔨᒌᖏᑦᑐᓂᑦ ᐱᓕᕆᔾᔪᑎᑦᓴᓂᑦ ᐱᔾᔪᑎᒋᓪᓗᒍ ᖃᓄᐃᓕᖓᓂᖓ ᑎᒍᔭᐅᒪᕕᐅᑉ ᐱᓕᕆᕝᕕᐅᑉ. ᐱᔾᔪᑎᓪᓗᐊᑕᐅᔪᓂᑦ ᓇᓗᓇᐃᔭᐃᓚᐅᖅᑎᓪᓗᒋᑦ ᐱᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᔾᔪᑎᖏᑦ, ᖃᐅᔨᓴᖅᑏᑦ ᐊᑐᓕᖁᔨᔾᔪᑎᓕᐅᓚᐅᖅᑐᑦ ᐊᐅᓚᑦᓯᔾᔪᑎᒍᑦ ᐊᐅᓚᑦᓯᔾᔪᑎᓂᑦ ᐊᒻᒪ ᐱᓕᒻᒪᑦᓴᐅᑎᓂᑦ.

[13] ᑏᓰᐱᕆ 14, 2022, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐱᑎᑦᓯᓚᐅᖅᑐᖅ ᑭᐅᔾᔪᑎᖏᓐᓂᑦ (ᐃᓚᖓ 2) ᖃᐅᔨᓴᖅᑏᑦ ᐅᓂᒃᑳᕆᒋᐊᖓᖅᑕᖏᓐᓂᑦ.

[14] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᑦ ᐃᓘᓐᓇᐸᓗᖏᓐᓂᑦ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐊᒻᒪ ᐊᑐᖁᔨᓯᒪᔭᖏᓐᓂᑦ ᐱᔾᔪᑎᓕᓐᓂᑦ ᐊᖑᑎᐅᑉ ᐱᓕᕆᐊᖑᓂᖓᓂᑦ, ᑭᓪᓕᖃᖅᑐᓂᑦ ᐱᑐᐃᓐᓇᐅᖏᔾᔪᑎᖃᖅᑐᓂᑦ.

[15] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐅᖃᐅᓯᖃᓚᐅᕐᒥᔪᖅ ᐊᒥᓱᐊᓗᓐᓂᑦ ᐊᒥᓲᓃᕐᓴᓂᑦ ᐱᔾᔪᑎᐅᕙᑦᑐᓂᑦ ᓇᓗᓇᐃᔭᖅᑕᐅᓯᒪᓚᐅᖅᑐᓂᑦ ᖃᐅᔨᓴᖅᑏᑦ ᐅᓂᒃᑳᓕᐊᕆᒋᐊᖓᖅᑕᖓᓂ. ᑭᐅᔾᔪᑎᒋᓪᓗᒍ ᖃᐅᔨᓴᖅᑏᑦ ᐊᒥᓱᑲᓪᓚᐃᑦ ᖃᐅᔨᓚᐅᖅᑕᖏᓐᓄᑦ ᐱᔾᔪᑎᒋᓪᓗᒍ ᐱᐅᖏᑐᒻᒪᕆᐅᓂᖓ ᑭᖕᖓᐃᑦ ᑎᒍᔭᐅᒪᕕᖓᑕ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᐊᑕᖏᑦᓯᐊᕐᓗᒍ ᑭᖕᖓᐃᑦ ᑎᒍᔭᐅᒪᕕᖓᑦ ᑭᖑᕝᕕᖅᑕᐅᓂᐊᖁᓪᓗᓂᐅᒃ. ᓄᑖᒥᑦ ᑎᒍᔭᐅᒪᕕᓕᐅᓛᓕᖅᑐᑦ ᐊᒥᓲᓂᕐᓴᓂᑦ ᐃᓪᓗᕈᓯᖃᓕᕐᓗᓂ ᑎᒍᓯᓯᒪᕕᑦᓴᓂᑦ.

[16] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᖃᐅᔨᒪᓂᕋᓚᐅᕐᒥᔪᑦ ᑭᖕᖓᐃᑦ ᑎᒍᔭᐅᒪᕕᖓᑦ ᐱᓕᕆᔾᔪᑎᑦᓴᑭᓚᐅᕐᒪᑕ, ᐊᒻᒪ ᓇᓗᓇᐃᔭᕐᓯᒪᑦᓯᐊᖅᑐᓂᑦ ᐱᓕᕆᐊᓕᒻᒪᕆᐅᓚᐅᕋᓗᐊᖅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᕿᓂᕋᓱᑉᐸᑦᑐᑎᒃ ᖃᓄᐃᓕᐅᕈᑎᑦᓴᖏᓐᓂᑦ ᓈᒻᒪᖏᑦᑐᓂᑦ ᐃᖅᑲᓇᐃᔭᖅᑎᖃᕐᓂᐅᕙᑦᑐᖅ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐋᔩᓚᐅᕋᓗᐊᕐᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓈᒻᒪᑦᑐᓂᑦ ᐱᓕᕆᓚᐅᕋᓗᐊᖅᑐᑎᒃ ᐱᔾᔪᑎᐅᔪᖅ ᐱᓪᓗᒍ, ᐃᓕᑕᕐᓯᓯᒪᓂᕋᓚᐅᖅᑐᖅ ᐊᑐᐃᓐᓇᓚᐅᕐᒪᑕ ᐃᖅᑲᓇᐃᔭᖅᑎᑭᑦᓴᐸᓐᓂᐅᔪᒥᑦ ᑕᒪᒃᑯᐊ ᐱᒐᓗᐊᖅᑎᓪᓗᒋᑦ ᐱᓕᕆᔾᔪᑎᑦᓴᐅᔪᑦ. ᐱᒻᒪᕆᐅᓂᖅᐹᖑᔪᖅ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᐅᖃᒪᔭᐅᑎᖃᑦᑕᐅᑎᒋᔪᒪᓂᕐᒥᑦ ᒐᕙᒪᒃᑯᓐᓂᑦ ᓄᓇᕘᒧᑦ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᕐᓯᒪᓂᕐᒥᑦ ᓈᒻᒪᑦᑐᓂᑦ ᐱᓕᕆᔾᔪᑎᑦᓴᓂᑦ ᐊᒻᒪ ᑮᓇᐅᔭᓂᑦ ᐊᑐᐃᓐᓇᕈᐃᓯᒪᖁᔨᓪᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᕘᒥ ᑎᒍᔭᐅᒪᕕᖏᑕ ᐱᓕᕆᕝᕕᖏᓐᓂᑦ.

[17] ᐅᕘᓇ ᐱᓕᕆᐊᖑᔪᒃᑯᑦ ᓴᖅᑮᓯᒪᔪᑦ ᖃᓄᐃᓕᖓᓂᐅᔪᖅ ᑭᖕᖓᕐᓂ ᐱᐅᓗᐊᖏᑦᑐᖅ. ᓇᓗᓇᖏᑦᑐᖅ ᓱᓕ ᐱᓕᕆᐊᖃᕆᐊᓕᒻᒪᕆᐅᓂᐊᕐᒪᑕ ᐊᒥᓱᑲᓪᓚᐃᑦ ᐱᒋᐊᕈᒪᓂᐊᕈᑎᒃ ᐃᓚᖏᓐᓂᑦ ᖃᓄᐃᓕᐅᕈᑎᑦᓴᐅᔪᓂᑦ ᐱᒻᒪᕆᐅᓂᖏᑦ ᐱᔾᔪᑎᐅᔪᑦ ᐱᓪᓗᒋᑦ ᑕᑯᓐᓇᖅᑕᐅᕙᓚᐅᖅᑐᑦ. ᑭᓯᐊᓂᓕ, ᖃᐅᔨᓴᖅᑏᑦ ᖁᕕᐊᒋᔭᖃᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᑐᕌᒐᖃᕐᓂᐅᓴᓂᖓᓄᑦ ᐱᒋᐊᖅᑎᑦᓯᓂᕐᒥᑦ ᐋᖅᑭᒍᑎᑦᓴᓂᑦ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕆᐊᕈᒪᓂᖏᓐᓂᑦ ᐱᔾᔪᑎᒋᓪᓗᒋᑦ ᐃᓚᖏᑦ ᐱᔾᔪᑎᐅᓯᒪᔪᑦ.

ᐱᓕᕆᐊᖑᓂᖏᑦ

[18] ᖃᐅᔨᓴᖅᑎᓪᓗᒋᑦ ᖃᐅᔨᓴᖅᑕᒥᓂᒃ, ᖃᐅᔨᓴᖅᑏᑦ ᖃᐅᔨᓵᖃᓚᐅᖅᑐᑦ ᐊᒥᓱᑲᓪᓚᓐᓂᒃ ᑎᑎᖅᑲᓂᑦ, ᐊᔾᔨᖕᖑᐊᓂᑦ, ᐊᒻᒪ ᐊᐅᓚᔫᓂᑦ ᐊᔾᔨᓕᐅᕐᓯᒪᔪᓂᑦ ᐊᒻᒪ ᓂᐱᓕᐅᕐᓯᒪᔪᓂᑦ. ᐊᑑᑎᖃᖅᑐᑦ ᓱᓇᑐᐃᓐᓇᐃᑦ ᐱᔭᐅᓯᒪᔪᑦ ᐅᑯᓇᖕᖓᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ, ᑲᑎᑕᐅᓗᑎᒃ ᓇᓗᓇᐃᔭᐃᑎᓄᑦ ᓄᐊᑕᐅᓯᒪᔪᓄᑦ ᖃᐅᔨᓴᖅᑎᒧᑦ, ᐃᒪᓐᓇᐅᓕᓚᐅᖅᑐᑦ 146 ᒋᒐᐸᐃᑦᔅ ᖃᕋᑕᐅᔭᓕᕆᔾᔪᑎᒍᑦ ᐱᓕᕆᔾᔪᑎᓂᑦ (8,850 ᑲᑎᒪᖏᑦᑐᑦ ᖃᕋᑕᐅᔭᒃᑯᑦ ᐱᓕᕆᔾᔪᑎᐅᔪᑦ). ᑕᒪᒃᑯᐊ ᓱᓇᑐᐃᓐᓇᐃᑦ ᐱᖃᓯᐅᔾᔨᓯᒪᔪᑦ ᓄᐊᑕᐅᓯᒪᔪᓂᑦ ᐊᓯᖏᓐᓂᑦ ᖃᐅᔨᓴᖅᑎᓪᓗᒋᑦ ᐱᓪᓗᒋᑦ ᖃᓄᐃᓕᐅᕈᑎᐅᓚᐅᖅᑐᑦ, ᐱᖃᓯᐅᔾᔭᐅᓗᓂ ᐱᕋᔭᓐᓂᕐᒥᑦ ᖃᐅᔨᓴᐅᑎᒥᓂᐅᔪᖅ ᐊᐅᑕᐅᓚᐅᖅᑐᖅ ᐋᑐᕚ ᐸᓖᓯᒃᑯᖏᑕ ᐱᔨᑦᓯᕋᖅᑎᖏᓐᓄᑦ.

[19] ᖃᐅᔨᓴᖅᑏᑦ ᐊᐱᕐᓱᓚᐅᖅᑐᑦ ᐊᕐᕌᒎᓕᒻᒥᑦ 22-ᓂᑦ ᐃᓚᒋᔭᐅᓚᐅᖅᑐᒥᑦ ᖃᓄᐃᓕᐅᕈᑎᐅᔪᒧᑦ ᐊᐱᖅᑯᑎᐅᔪᒧᑦ, ᓇᓗᓇᐃᖅᑕᐅᓯᒪᔪᖅ ᖃᐅᔨᓴᖅᑏᑦ ᓯᕗᓪᓕᕐᒥ ᐊᒻᒪ ᑭᖑᓪᓕᑦᐹᒥ ᐅᓂᒃᑳᓕᐊᖏᓐᓂ ᐅᓇᐅᓗᒍ A.B., ᐊᒻᒪᑦᑕᐅᖅ ᐊᓯᖏᓐᓂᑦ ᓄᓇᓕᕐᒥᐅᑕᓂᑦ ᑕᑯᓐᓇᖅᑐᒥᓂᕐᓂᒃ.

[20] ᐃᓘᓐᓇᐸᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᑲᐅᖏᓕᐅᕈᑎᒥ ᑕᐃᔭᐅᓯᒪᓚᐅᖅᑐᑦ ᑐᑭᓯᒋᐊᕈᑎᑦᓴᓂᑦ ᐱᑎᑦᓯᒍᒪᓚᐅᖏᑦᑐᑦ ᖃᐅᔨᓴᖅᑎᓄᑦ. ᖃᐅᔨᓴᖅᑏᑦ ᓇᓗᓇᐃᕐᓯᓚᐅᖅᑐᑦ ᓈᒻᒪᑦᑐᓂᑦ ᓇᓗᓇᐃᔭᐃᑎᖃᓕᕋᒥᒃ ᐅᖃᐅᓯᖃᕈᓐᓇᖅᑐᑎᒃ ᖃᐅᔨᔭᐅᓯᒪᔪᓂᑦ ᐊᒻᒪ ᐊᑐᖁᔭᐅᔪᓂᑦ ᐱᔾᔪᑎᒋᓪᓗᒍ ᐱᔾᔪᑎᐅᔪᖅ, ᑭᓯᐊᓂ ᖃᐅᔨᒪᖁᔨᓚᐅᖅᑐᑦ, ᐱᖃᑕᐅᒍᒪᖕᖏᓐᓂᐅᔪᖅ ᖃᐅᔨᓴᖅᑏᑦ ᖃᐅᔨᓴᐅᑎᖏᓐᓄᑦ, ᐃᓚᒋᔭᐅᔪᑦ ᐅᖃᐅᓯᖃᒃᑲᓐᓂᕈᓐᓇᐃᓕᓚᐅᖅᑐᑦ ᖃᓄᐃᓕᐅᕈᑎᒥᓂᖏᓐᓂᑦ ᐱᔾᔪᑎᖃᕐᓗᑎᒃ. ᑳᓐᔅᑕᐳᓪ ᒪᐃᑯᓪ (ᑖᓐ) ᑭᐅᓕᖕ, ᐊᖁᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓐᓂᑦ, ᑎᑎᖅᑲᑎᒍᑦ ᐅᖃᐅᑎᑦᓴᒥᓂᒃ ᐱᑎᑦᓯᓚᐅᖅᑐᖅ ᐊᒻᒪ ᑭᐅᔾᔪᑎᒥᓂᒃ ᐊᐱᖅᑯᑎᐅᓚᐅᖅᑐᓄᑦ ᑭᖑᓂᐊᒍᑦ.

ᐊᑐᖅᑕᐅᓯᒪᔪᑦ

[21] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᑦ ᑭᖕᖓᕐᓂ ᐊᒥᓱᒻᒪᕆᐅᔪᓄᑦ ᑕᐃᒪᐃᑉᐸᒐᑎᒃ ᐅᖄᓚᕕᐅᕙᓐᓂᓚᐅᖅᑐᑦ ᑕᐃᑲᓂ ᐅᓐᓅᔪᒥ ᐱᔨᑦᓯᕆᐊᖅᑐᖁᔭᐅᕙᑦᑐᑎᒃ ᔪᓂ 1, 2020. 37-ᖑᓚᐅᖅᑐᑦ ᐅᖄᓚᔪᑦ, ᐱᖃᓯᐅᔾᔭᐅᓗᑎᒃ 27-ᖑᓂᖏᑦ ᐅᖄᓚᔾᔪᑎᐅᕙᓚᐅᖅᑐᑦ ᐊᑯᓐᓂᖏᓐᓂ ᓯᕿᖕᖑᔭᐅᑉ 4:30 ᐅᓐᓄᓴᒃᑯᑦ ᔪᓂ 1, ᐊᒻᒪ 3:56 ᐅᓪᓛᒃᑯᑦ ᔪᓂ 2-ᒧᑦ.

[22] A.B. ᐊᑖᑕᒃᑯᒥᓃᑦᑐᒥᓂᖅ ᓇᔪᒐᖓᓂ ᑕᐃᑲᓂ ᐅᓐᓅᔪᒥ ᐱᑦᓯᐊᖃᑦᑕᐅᑎᒍᓐᓃᖅᑐᑎᒃ ᑖᒃᑯᐊ, ᐃᓪᓗᖃᖅᑐᒥᑦ ᖃᓂᒋᔭᖏᓐᓂᑦ ᐅᖄᓚᔪᖃᓕᕐᓂᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ. A.B. ᐊᑖᑕᖓ ᐊᓂᑎᑦᓯᔪᕕᓂᖅ A.B. ᓇᔪᒐᖓᓂᑦ ᐊᒻᒪ A.B. ᕿᒪᐃᓕᖅᑐᒥᓂᐅᓗᓂ ᐱᓱᑦᑐᓂ. ᐃᓪᓗᖃᖅᑐᖅ ᖃᓂᒋᔭᖓᓂ ᐸᓖᓯᓅᕆᔪᕕᓂᐅᔪᖅ ᑖᑦᓱᒥᖓᐅᖏᑦᑐᖅ ᐃᓪᓘᑉ ᓈᓴᐅᑎᖓᓂᑦ ᐊᒻᒪ ᐅᐸᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᐸᓕᕐᓂᖅᑐᑎᒃ ᑕᒻᒪᖅᑐᑎᒃ ᐃᓪᓗᒧᑦ. ᐊᑕᐅᑦᓯᒃᑰᑲᓴᑦᑐᑎᒃ, ᐸᓖᓯᒃᑯᑦ ᐅᐸᓚᐅᖅᑐᑦ ᐊᓯᐊᓄᑦ ᐅᖄᓚᓯᒪᔪᒧᑦ ᐊᓯᐊᓂᑦ ᐸᕝᕕᓴᓐᓂᕋᖅᑕᐅᔪᒥᑦ ᐊᖑᑎᒥᑦ ᐊᓂᔪᖃᕐᓂᖅᑐᓂ ᖁᑭᐅᓯᔭᖅᑐᒥᑦ ᐃᓪᓗᒥᑦ, ᐊᒻᒪ ᓇᒦᒻᒪᖔᖅ ᖃᐅᔨᒪᔭᐅᒐᓂ.

[23] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑕᑯᓐᓇᓕᓚᐅᖅᑐᑦ ᐊᖑᑎᒥᑦ, ᓇᓗᓇᐃᖅᑕᐅᓕᖅᑐᒥᓂᖅ ᑭᖑᓂᐊᒍᑦ ᐅᓇᐅᒋᐊᖓ A.B., ᐅᕐᕉᔮᔪᖅ ᐊᒻᒪ ᖃᐃᒐᓪᓛᓗᓂ ᑭᓇᒧᒃᑭᐊᖅ; ᐊᑦᓱᑲᓪᓚᒃ ᐋᖓᔮᕐᕙᓗᓚᐅᖅᑐᖅ. ᓱᕈᓰᑦ ᖃᓂᒋᔮᓃᑦᑐᑦ ᐅᖃᓚᐅᖅᑐᑦ ᑳᓐᔅᑕᐳᓪ ᑭᐅᓕᖕᒧᑦ ᐊᖑᑎ ᓂᖕᖓᐅᑎᕙᓚᐅᕐᒪᑦ ᑭᒃᑯᑐᐃᓐᓇᕐᓂᑦ. A.B. ᑕᑯᓐᓇᖅᑕᐅᓚᐅᖅᑐᖅ ᑎᒃᑯᐊᕋᖅᑎᓪᓗᒍ ᓂᖕᖓᐅᒪᕙᓗᑦᑐᓂ ᐃᓄᒻᒧᑦ ᐱᓲᑎᑲᓪᓚᑦᑐᒥᑦ ᓄᓇᒃᑰᔫᒥᑦ. ᑳᓐᔅᑕᐳᓪ ᑭᐅᓕᖕ ᐊᖁᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᒥᑦᓵᓄᑦ A.B. ᑎᒍᔭᐅᔪᒪᓪᓗᓂ. ᓄᓇᒃᑰᔫᑉ ᒪᑐᐊ, ᒪᑐᐃᖅᑕᐅᔪᕕᓂᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒧᑦ, ᐊᐳᕐᓯᓚᐅᖅᑐᖅ A.B.-ᒥᑦ, ᐅᕐᕈᑎᑕᐅᓗᓂ ᓄᓇᒧᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑦᓱᕈᖅᑐᑎᒃ ᑎᒍᓯᓕᓚᐅᕐᒥᔪᑦ A.B.-ᒥᑦ, ᐸᓖᓯᒃᑯᑦ ᓄᓇᒃᑰᔫᖓᓅᖅᑕᐅᓗᓂ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓅᕈᔾᔭᐅᓕᖅᑐᓂ.

[24] ᑎᒍᔭᐅᒪᕕᒻᒥ, A.B. ᐃᓪᓗᕈᓯᕐᒨᖅᑕᐅᓕᓚᐅᖅᑐᖅ ᑎᒍᔭᐅᒪᕕᒻᒧᑦ ᐊᓯᐊᓂᑦ ᑎᒍᔭᐅᒪᔪᒧᑦ ᓇᔪᖅᑕᐅᔪᒧᑦ, J.J., ᑖᑦᓱᒪᓕ ᐋᓐᓂᖅᑎᓕᖅᑕᒥᓂᖓ ᐊᑦᓱᑲᓪᓚᒃ. ᐋᓐᓂᐊᔪᓕᕆᔭᐅᓚᐅᖅᑐᖅ ᐊᑕᐅᓯᐅᖏᑦᑐᒧᑦ ᐋᓐᓂᐊᓯᐅᖅᑎᒧᑦ ᐊᒻᒪ A.B. ᖃᖓᑕᓲᒃᑯᑦ ᑐᐊᕕᕐᓇᖅᑐᓕᕆᔨᓄᑦ ᐃᖃᓗᓐᓅᕈᔾᔭᐅᓕᓚᐅᖅᑐᖅ ᖃᐅᔨᓴᖅᑕᐅᑲᓐᓂᖁᓪᓗᒍ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᐅᓚᑦᓯᓕᓚᐅᖅᑐᑦ ᐱᓂᐊᖅᑕᖏᓐᓂᑦ ᐋᔩᕈᑎᖃᖅᑐᑎᒃ ᐃᓚᒋᔭᐅᓗᓂ A.B.

ᐃᓗᓕᖏᓐᓂᑦ ᕿᒥᕐᕈᐊᕐᓂᖅ ᖃᐅᔨᓴᖅᑏᑦ ᖃᐅᔨᓚᐅᖅᑕᖏᓐᓄᑦ ᐊᒻᒪ ᐊᑐᖁᓯᒪᔭᖏᓐᓂᑦ

[25] ᐅᕙᓂ ᐅᓂᒃᑳᖑᔪᒥ, ᖃᐅᔨᓴᖅᑏᑦ ᐅᖃᐅᓯᖃᖅᑐᑦ ᐃᓗᓕᖏᓐᓂᑦ ᖃᐅᔨᓚᐅᖅᑕᖏᑕ ᐊᒻᒪ ᐊᑐᖁᓯᒪᔭᖏᑕ. ᖃᐅᔨᒪᔭᐅᔭᕆᐊᓕᒃ ᐅᓇ ᐃᓱᒪᒋᔭᐅᒋᐊᖃᖏᒻᒪᑦ ᕿᒥᕐᕈᔭᐅᓯᒪᓂᖏᓐᓂᑦ ᓱᓇᓕᒫᑦᓯᐊᑦ ᐅᕝᕙᓘᓐᓃᑦ ᐱᓪᓗᐊᑕᖏᓐᓂᑦ ᐅᖃᐅᓯᖃᕐᓂᖓᓂᑦ ᖃᐅᔨᓴᖅᑏᑦ ᖃᐅᔨᓚᐅᖅᑕᖏᓐᓂᑦ ᐊᒻᒪ ᐊᑐᖁᓯᒪᔭᖏᓐᓂᑦ. ᐱᔾᔪᑎᐅᔪᓕᒫᑦᓯᐊᑦ ᕿᒥᕐᕈᐊᖅᑕᐅᒍᒪᓐᓂᕈᑎᒃ ᖃᐅᔨᓴᖅᑕᐅᓚᐅᖅᑐᑦ ᖃᐅᔨᓴᖅᑎᓄᑦ, 88-ᓂᑦ ᒪᑉᐱᒐᓕᒃ ᐅᓂᒃᑳᓕᐊᖑᑲᐃᓐᓇᕐᓯᒪᔪᖅ ᕿᒥᕐᕈᐊᖅᑕᐅᔭᕆᐊᓕᒃ ᐃᓘᓐᓇᖏᒍᑦ.

[26] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑭᐅᔾᔪᑎᖏᑦ ᖃᐅᔨᓴᖅᑏᑦ ᖃᐅᔨᔭᖏᓐᓄᑦ ᐊᒻᒪ ᐊᑐᖁᔭᖏᓐᓄᑦ ᐅᖃᐅᓯᐅᒻᒥᔪᑦᑕᐅᖅ ᒪᑉᐱᒐᕐᓂ ᒪᓕᑦᑐᓂ, ᐱᓗᐊᖅᑐᒥ ᐃᓱᒪᒋᔭᐅᔪᓂᑦ ᐅᖃᐅᓯᐅᓯᒪᔪᓂᑦ ᐅᕝᕙᓘᓐᓃᑦ ᑐᑭᓯᒋᐊᕈᑎᐅᓯᒪᔪᓂᑦ ᐃᓚᒍᑎᐅᓚᐅᖅᑐᑎᒃ ᐊᒻᒪᑦᑕᐅᖅ ᐊᖏᖃᑎᖃᖅᑐᑎᒃ ᖃᐅᔨᔭᐅᔪᓂᑦ ᐊᒻᒪ ᐊᑐᖁᔭᐅᔪᓂᑦ. ᐊᒥᓲᖏᑦᑐᓂ ᐱᓕᕆᐊᖑᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᖏᖃᑎᖃᓚᐅᖏᑦᑐᑦ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐊᒻᒪ ᐊᑐᖁᔭᖏᓐᓂᑦ ᖃᐅᔨᓴᖅᑕᐅᓚᐅᕐᒥᔪᑦ. ᓇᓗᓇᐃᔭᐃᑎᓂᑦ ᑎᑎᕋᕐᓯᒪᔪᑦ ᖃᐅᔨᓴᖅᑏᑦ ᖃᐅᔨᓯᒪᔭᖏᓐᓂᑦ ᐊᒻᒪ ᐊᑐᖁᓯᒪᔭᖏᓐᓂᑦ ᐱᖃᓯᐅᔾᔭᐅᓯᒪᒻᒥᔪᑦ ᐃᓱᐊᓂ ᐆᒪ ᐅᓂᒃᑳᓕᐊᑉ.

ᑎᒍᔭᐅᓚᐅᕐᓂᖓ A.B.

[27] ᐅᓂᒃᑳᓕᐊᖑᒋᐊᖓᖅᑐᓂ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓈᒻᒪᓚᐅᕐᓂᖓᓂᑦ ᑳᓐᔅᑕᐳᓪ ᑭᐅᓕᖕ ᑎᒍᓯᑎᓪᓗᒍ A.B.-ᒥᑦ ᐱᑦᑎᐊᓚᐅᖏᓐᓂᖓᓄᑦ. ᑳᓐᔅᑕᐳᓪ ᑭᐅᓕᖕ ᐃᓱᒪᓚᐅᕋᒥ A.B. ᒪᓕᒐᕐᒥᑦ ᓱᕋᐃᓯᒪᓂᖓᓂᑦ ᓈᒻᒪᑦᑐᓂᓗ ᐃᓱᒪᒋᓚᐅᖅᑕᖓ, ᐊᒻᒪ ᖃᓄᐃᓚᐅᕋᓂ ᐃᓱᒪᓂᖓ ᑎᒍᔭᕆᐊᖃᕐᓂᕐᒥᓂᐅᒃ A.B. ᓱᕋᐃᔭᐃᑐᐃᓐᓇᖁᓇᒍ ᐅᕝᕙᓘᓐᓃᑦ ᑕᐃᒫᑦᓴᐃᓐᓇᖅ ᓱᕋᐃᖁᓇᒍᑦ ᒪᓕᒐᕐᒥᑦ.

[28] ᐱᔾᔪᑎᒋᓪᓗᒋᑦ ᐊᓯᖏᑦ ᐅᖄᓚᐅᑎᖃᖅᐸᓚᐅᖅᑐᑦ ᐱᔨᑦᓯᕋᖅᑎᓂᑦ ᐊᒻᒪ ᐅᓗᕆᐊᓇᕈᓐᓇᖅᑐᓂᑦ ᐊᑦᑐᐊᔪᓂᑦ ᖃᓄᐃᓕᖓᒍᑎᐅᔪᒧᑦ, ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᓯᓵᕆᐊᖃᓚᐅᕐᓂᖏᓐᓂᑦ A.B.-ᒥᑦ ᕿᓚᒥᐅᔫᒥᔪᖅ. ᐊᒻᒪᑦᑕᐅᖅ, ᐱᔾᔪᑎᒋᓪᓗᒋᑦ A.B. ᖁᓄᓚᐅᕐᓂᖓ ᐊᒻᒪ ᐱᒋᐊᕐᓂᐅᓴᓚᐅᕐᓂᖓ, ᐊᑐᕆᐊᖃᓚᐅᖅᑐᑦ ᐊᒻᒪ ᓈᒻᒪᓚᐅᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᖅᑐᒥᓂᐅᓂᖓ ᐊᑦᓱᕈᖅᑐᑎᒃ ᑎᒍᔭᐅᑎᓪᓗᒍ. ᐸᓖᓯᐅᔪᑦ ᐊᑦᓱᕉᑎᖃᓚᐅᕐᓂᖏᑦ ᑎᒍᓯᓪᓗᑎᒃ ᓈᒻᒪᓚᐅᖅᑐᖅ ᐱᓪᓗᒍ A.B. ᐱᐅᓯᕆᓚᐅᖅᑕᖓ. A.B. ᑎᒍᔭᐅᓚᐅᕋᓗᐊᕐᒪᑦ ᐊᑦᓱᐊᓘᖏᑦᑐᒧᑦ ᐱᕋᔭᐅᑎᒧᑦ, ᐊᑐᕈᓐᓇᓚᐅᖏᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᓂᑎᑦᓯᑐᐃᓐᓇᕆᐊᑦᓴᖅ ᐊᖑᑎ, ᖃᓄᑎᒋ ᐋᖓᔮᕐᓂᖓ ᐊᒻᒪ ᐱᐅᓯᖓ ᖃᓄᐃᒍᑎᐅᓚᐅᕐᒪᑕ ᐊᓯᒥᓄᑦ ᐃᖕᒥᓄᓪᓘᓐᓃᑦ ᐅᓗᕆᐊᓇᖅᑐᒦᑎᑦᓯᒍᓐᓇᓚᐅᕐᒪᑦ ᓄᖅᑲᖅᑎᑕᐅᖏᒃᑯᓂ. ᑕᐃᒪᐃᒻᒪᑦ, ᐊᑐᖅᑕᐅᓂᖓ ᖃᓄᑎᒋ ᐊᑦᓱᕈᕐᓂᐅᔪᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᑐᖅᑕᐅᒋᐊᖃᓕᓚᐅᖅᑐᖅ ᐃᓱᒪᒋᓪᓗᒍ ᐊᖏᓂᕐᓴᐅᓂᖓ, ᐊᒻᒪᑦᑕᐅᖅ ᖃᓄᐃᑦᑑᑎᓪᓗᒍ ᖁᓄᓂᐅᓚᐅᖅᑐᖅ ᒪᓕᒐᑎᒍᑦ ᐊᑐᖅᑐᑎᒃ ᑎᒍᓯᓇᓱᐊᕐᓂᐅᓚᐅᖅᑐᖅ.

[29] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᔭᐅᓯᒪᔪᓂᑦ.

ᐱᓕᕆᔾᔪᓯᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᑉ ᓄᓇᒃᑰᔫᖅᑑᑉ

[30] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓈᒻᒪᓚᐅᖏᒻᒪᑦ ᑳᓐᔅᑕᐳᓪ ᑭᐅᓕᖕ ᐊᖁᑕᒥᓂᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᒥᒃ ᖃᓂᑦᓴᓗᐊᖅᑐᓂ ᓴᓂᐊᒎᕐᓂᕐᒪᑦ A.B., ᐊᐳᖅᑕᐅᓚᕿᓕᕐᓂᖅᑐᓂ A.B. ᓄᓇᒃᑰᔫᑉ ᒪᑐᐊᓄᑦ. ᑭᓯᐊᓂᑦᑕᐅᖅ, ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᓇᓗᓇᐃᔭᐃᑎᑕᖃᓚᐅᖏᒻᒪᑦ ᐃᓱᒪᓕᐅᕆᔾᔪᑎᑦᓴᒥᑦ ᑳᓐᔅᑕᐳᓪ ᑭᐅᓕᖕ ᐱᔮᕆᓪᓗᓂ ᐊᐳᕐᓯᔪᕕᓂᐅᒋᐊᖓ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ; ᑭᓯᐊᓂᓕ, ᐊᑦᑐᖅᑕᐅᓂᒥᓂᖓ A.B. ᐱᔾᔪᑎᖃᕐᓂᕐᒪᑦ ᓯᕗᒧᑲᓪᓚᑦᑐᒥᓂᐅᓂᖓᓄᑦ ᐸᓖᓯᒃᑯᑦ ᓄᓇᒃᑰᔫᖓ ᓴᖑᑲᓪᓚᒃᑲᒥ ᒪᓃᑦᑐᒃᑯᑦ ᐊᑐᕆᐊᒃᑯᑦ.

[31] ᑳᓐᔅᑕᐳᓪ ᑭᐅᓕᖕ ᐅᖃᓚᐅᖅᑐᖅ "ᓄᖅᑲᕈᒪᓚᐅᕋᓗᐊᕋᒥ ᓴᓂᕌᓄᑦ [A.B.] ᐊᒻᒪ ᓂᐅᑦᑕᐅᑎᒋᔪᒪᓪᓗᓂ ᐸᓖᓯᒃᑯᑦ ᓄᓇᒃᑰᔫᖓᓐᓂᑦ ᕿᓚᒥᐅᔫᒥᔪᖅ ᑎᒍᒍᒪᓪᓗᓂᐅᒃ." ᐃᓚᖓᑦ ᐃᓚᒋᔭᐅᓚᐅᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ, ᑳᓐᔅᑕᐳᓪ ᓱᓚᑦ, ᐅᖃᓚᐅᕐᒥᔪᖅ "ᑎᒍᓵᕈᒪᓚᐅᕋᒥᐅᒃ [A.B.] ᕿᓚᒥᐅᔫᒥᔪᖅ," ᐊᒻᒪ ᑕᒪᓐᓇ ᐱᓪᓗᒍ ᐊᒡᒐᓂ ᒪᑑᑉ ᑎᒍᓪᓕᕕᖓᓃᑎᑦᓯᑦᓴᐅᑎᒋᓐᓂᓚᐅᖅᑐᖅ ᓂᐅᑲᐅᑎᒋᓂᐊᕋᒥ ᓄᓇᒃᑰᔫᖅ ᓄᖅᑲᑐᐊᖅᐸᑦ.

[32] ᕿᒥᕐᕈᐊᖅᑕᐅᒐᒥ ᐊᐅᓚᔫᖅ ᐊᔾᔨᓕᐅᕐᓯᒪᔪᖅ ᐃᑲᔪᕐᓱᐃᔪᖅ ᐃᓱᒪᒋᔭᐅᓂᖓᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᒃᑰᔫᖓᑦ ᖁᐊᔭᕿᓐᓂᕐᒪᑦ ᖁᐊᓴᐅᓂᖓᒍᑦ ᐊᑐᕆᐊᑉ ᐊᒻᒪ ᓯᕗᒧᑦ ᐃᖏᕐᕋᓯᑲᓪᓚᓂᕐᒪᑦ ᓴᐅᒥᐊᓂ ᐊᑦᓴᓗᐊᑦ ᐊᖏᓗᐊᖏᑦᑐᒧᑦ ᐃᓯᕐᓴᒨᑲᓪᓚᓂᕐᒪᑦ. ᑕᒪᓐᓇ ᓯᕗᒧᑦ ᐃᖏᕐᕋᓂᒥᓂᖅ ᐱᓪᓗᒍ ᐊᖁᑎᐅᑉ ᒪᑐᐊ, ᒪᑐᐃᖓᑦᑕᐅᑎᒋᔪᕕᓂᖅ ᐊᒻᒪ ᑎᒍᒥᐊᖅᑕᐅᓗᓂ ᑳᓐᔅᑕᐳᓪ ᑭᐅᓕᖕᒧᑦ, ᒪᑐᐃᕆᐊᖅᑐᒥᓂᐅᒻᒪᑦ, ᐊᐳᖅᑐᓂᐅᒃ A.B. ᐊᒻᒪ ᐅᕐᕈᑎᑕᐅᓗᓂ. ᑕᑯᑦᓴᐅᔪᖅᑕᖃᖏᑦᑐᖅ ᑳᓐᔅᑕᐳᓪ ᑭᐅᓕᖕ ᐊᐳᕐᓯᒐᓱᑦᑐᒥᓂᐅᒻᒪᖔᖅ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ.

[33] ᖃᐅᔨᓴᖅᑏᑦ ᐃᓱᒪᓕᓚᐅᕋᓗᐊᖅᑎᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑎᒍᓯᓵᕆᐊᖃᕐᓂᕋᓗᐊᖅᑐᑎᒃ A.B.-ᒥᑦ ᑐᐊᕕᕐᓗᑎᒃ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ, ᐱᓪᓗᒍ ᖃᓄᐃᓕᖓᓂᐅᔪᖅ, ᓈᒻᒪᓚᐅᖏᑦᑐᖅ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᓚᐅᕐᓂᖓ ᖃᓂᒋᓗᐊᖅᑐᓂᐅᒃ A.B. ᑕᒪᐅᓇ ᑐᑭᖃᖅᑐᖅ ᖃᓄᑐᐃᓐᓇᖅ ᒥᑭᑦᑐᑯᓘᒐᓗᐊᒥᑦ ᑕᒻᒪᕐᓂᕈᓂ ᐅᕝᕙᓘᓐᓃᑦ ᓯᓚᑖᓂᑦ ᐱᓯᒪᓗᓂ, ᓲᕐᓗ ᐊᑐᕆᐊᑦ ᐱᐅᓗᐊᓚᐅᖏᓐᓂᖏᑦ, ᐊᐳᕈᓐᓇᓚᐅᖅᑐᑦ, ᐊᑦᓱᑲᓪᓚᒃ ᑎᒥᒃᑯᑦ ᐋᓐᓂᖅᑕᐅᓗᓂ ᐅᕝᕙᓘᓐᓃᑦ ᐃᓅᔪᓐᓃᖅᑎᑕᐅᒻᒪᕆᓪᓗᓂ A.B.

[34] ᕿᒥᕐᕈᐊᖅᑕᐅᑎᓪᓗᒍ ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᖅ, ᓯᕗᓂᐊᒍᓪᓘᓐᓃᑦ ᓄᓇᒃᑰᔫᖅ ᐃᓯᕐᓴᒨᓚᐅᖅᑎᓐᓇᒍ, ᑳᓐᔅᑕᐳᓪ ᑭᐅᓕᖕ ᐊᖁᑦᑐᒥᓂᖅ ᓄᓇᒃᑰᔫᒥᑦ ᖃᓂᑦᓴᑐᒻᒪᕆᐅᓗᓂ A.B.-ᒥᑦ. ᓯᕗᕌ ᓴᐅᒥᐊᓂ ᐊᑦᓴᓗᐊᖓ ᓄᓇᒃᑰᔫᑉ ᐅᖓᓯᓐᓂᖃᖅᑑᔮᖅᑐᖅ ᒪᕐᕉᓐᓂᒃ (2) ᐃᓯᒐᖕᖑᐊᓂᒃ A.B.-ᒥᑦ ᓄᓇᒃᑰᔫᖅ ᖁᐊᓴᕿᑦᑑᔮᖅᑎᓪᓗᒍ ᐊᑐᕆᐊᑉ ᓯᓚᑖᓄᑦ. ᑕᑯᑦᓴᐅᔮᖏᑦᑐᖅ ᑳᓐᔅᑕᐳᓪ ᑭᐅᓕᖕ ᐊᖁᑦᑐᒥᓂᐅᓂᖓᓄᑦ ᓱᒃᑲᑦᑐᒻᒪᕆᐅᓗᓂ ᐅᕝᕙᓘᓐᓃᑦ ᓈᒻᒪᖏᑦᑐᒥᑦ ᐃᖏᕐᕋᓂᒻᒪᖔᖅ; ᑭᓯᐊᓂᓕ, ᑕᑯᑦᓴᐅᔪᖅ ᐊᐳᖅᑕᐅᓪᓗᓂ ᐊᒻᒪ ᖃᓪᓕᑦᑕᐅᑐᐃᓐᓇᕆᐊᖃᖅᑐᓂ ᓄᓇᒃᑰᔫᒧᑦ, ᓱᒃᑲᐃᐸᓗᒐᓗᐊᕈᓂ, ᐅᓗᕆᐊᓇᖅᑐᒦᑎᑦᓯᒍᓐᓇᖅᑐᑦ ᑭᓇᑐᐃᓐᓇᕐᒥᑦ.

[35] ᖃᓄᐃᓕᖓᒍᑎᐅᔪᖅ ᑐᐊᕕᐊᖑᒋᐊᖃᖅᑐᒥᓂᐅᒐᓗᐊᖅ, ᑐᐊᕕᕐᓈᓗᓚᐅᖏᑦᑐᖅ. ᐱᔾᔪᑎᐅᓗᑎᒃ ᖃᓄᐃᒍᑎᐅᕙᓚᐅᖅᑐᑦ ᐊᓯᖏᓐᓂᑦ ᐅᖄᓚᔾᔪᑎᐅᕙᓚᐅᖅᑐᓂᑦ, ᐊᔪᕐᓇᓚᐅᖏᑦᑐᖅ ᐃᓱᒪᔭᕆᐊᑦᓴᖅ A.B. ᓱᖏᐅᓯᔭᕆᐊᖓ, ᑭᓯᐊᓂ ᐸᓖᓯᒃᑯᑦ ᐱᓪᓗᐅᑕᐅᔪᓂᑦ ᑐᑭᓯᓯᒪᓚᐅᖏᑦᑐᑦ ᑕᒪᓐᓇ ᐱᓪᓗᒍ ᐊᒻᒪ ᑕᑯᓚᐅᖏᑦᑐᑦ A.B.-ᒥᑦ ᓱᖏᐅᓯᔭᖅᑎᓪᓗᒍ. ᓇᓗᓇᐃᔭᐃᑎᐅᔪᑦ ᓇᓗᓇᐃᔭᐃᓯᒪᖏᑦᑐᑦ ᑳᓐᔅᑕᐳᓪ ᑭᐅᓕᖕ ᐃᓱᒪᓚᐅᕐᓂᖓᓄᑦ A.B. ᐃᓚᒋᔭᐅᓚᐅᕐᓂᖓᓄᑦ ᖁᑭᐅᓯᔭᕐᓂᕋᐃᔪᒥᑦ ᐅᖄᓚᐅᑎᓕᒻᒧᑦ ᐅᓪᓗᑲᓐᓂᐅᑎᓪᓗᒍ ᐸᓖᓯᒃᑯᓐᓄᑦ ᐅᖄᓚᐅᑎᒥᓂᕐᒧᑦ. ᐱᔾᔪᑎᖃᐅᓚᐅᕐᒪᑕ ᐃᓱᒪᒋᔭᐅᓂᖓᓂᑦ A.B. ᐋᓐᓂᕐᓯᒐᓱᓐᓂᐊᕐᓂᖓᓄᑦ ᐊᓯᒥᓂᒃ, ᑭᓯᐊᓂ ᐊᕙᑎᐊᓃᑦᑐᖃᓚᐅᖏᑦᑐᖅ ᑕᐃᑦᓱᒪᓂᐅᑎᓪᓗᒍ ᖃᓂᒋᔭᖏᓐᓂᑦ.

[36] ᐊᒻᒪᑦᑕᐅᖅ, A.B. ᐋᖓᔮᕐᕙᓗᓚᐅᕐᒪᑦ ᐊᑦᓱᑲᓪᓚᒃ ᓇᖏᕈᓐᓇᑦᓯᐊᓚᐅᖏᒻᒪᕆᑦᑐᖅ. ᓱᑲᑦᑐᒥᑦ ᐅᓪᓚᑦᑐᒥᓂᐅᕋᑖᓚᐅᖅᑎᓪᓗᒍ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᓚᐅᖅᑐᑦ ᑕᓪᓕᒪᑦ (5) ᐱᖓᓱᓂ (3) ᐸᓖᓯᓄᑦ ᓄᓇᒃᑰᔫᓂ ᖃᓂᒋᔭᖏᓐᓂ, ᐅᖓᓯᑦᑐᒨᕈᓐᓇᖅᑎᑕᐅᒐᓂ ᕿᒫᓇᓱᒃᑲᓗᐊᕈᓂ. ᐊᖏᓗᐊᖏᑦᑐᖅ ᓱᕋᐃᔾᔪᑎᒥᓂᖓ ᒪᓕᒐᕐᒥᑦ A.B. ᑎᒍᔭᐅᔾᔪᑎᒋᔭᖓᓂᑦ ᐱᔭᕆᐊᑐᑲᓴᑦᑐᖅ ᓇᓗᓇᐃᕋᓱᓪᓗᒍ ᓇᐅᒃᑯᑦ ᓈᒻᒪᓚᐅᕐᒪᖔᖅ ᐊᑐᖅᑕᐅᓂᖏᓐᓂᑦ ᐅᓗᕆᐊᓇᕈᓐᓇᑐᒻᒪᕆᐅᓚᐅᖅᑐᑦ ᑎᒍᔭᐅᓇᓱᐊᖅᑎᓪᓗᒍ.

[37] ᐊᑐᕆᐊᕐᓗᓚᐅᕐᓂᖓ ᐱᔾᔪᑎᐅᓗᐊᓚᐅᖅᑐᖅ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᖓᓄᑦ ᐊᐳᖅᑕᐅᓂᕆᓚᐅᖅᑕᖓ A.B. ᑕᕝᕙᓂ ᐱᓕᕆᐊᒥ. ᑭᓯᐊᓂᓕ, ᓈᒻᒪᒋᔭᐅᔪᖅ ᐊᒻᒪ ᓇᓗᓇᐃᖅᑕᐅᓯᒪᑦᑎᐊᖅᑐᓂ ᒪᓕᒐᕐᓂ ᐊᖁᑎᐅᔪᑦ ᐃᖕᒥᓂᒃ ᐊᐅᓚᑦᑎᒋᐊᖃᕐᓂᖏᓐᓂᑦ ᓄᓇᒃᑰᔫᖏᓐᓂᑦ ᒪᓕᓪᓗᑎᒃ ᐊᑐᕆᐊᑦ ᖃᓄᐃᓐᓂᖏᓐᓂᑦ, ᐊᒻᒪ ᐋᖅᑭᒋᐊᕆᕙᓪᓗᑎᒃ ᐱᓕᕆᔾᔪᓯᒥᓂᒃ ᑕᒪᒃᑯᐊ ᒪᓕᑦᑐᒋᑦ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᑕᓇᓚᐅᕐᒪᑦ ᐊᒻᒪ ᓈᒻᒪᒐᓂ ᑳᓐᔅᑕᐳᓪ ᑭᐅᓕᖕ ᓄᓇᒃᑰᔫᕐᓂᕋᒥ ᖃᓂᒋᓗᐊᖅᑐᓂᐅᒃ A.B. ᖁᐊᓴᐅᑎᓪᓗᒍ ᐊᑐᕆᐊᖅ ᐱᐅᓗᐊᓚᐅᖏᑦᑐᖅ.

ᖃᐅᔨᔭᐅᔪᖅ #3: ᓇᓗᓇᐃᔭᐃᑏᑦ ᓇᓗᓇᐃᕐᓯᓯᒪᖏᑦᑐᑦ ᑳᓐᔅᑕᐳᓪ ᑭᐅᓕᖕ ᐊᐳᕐᓯᓇᓱᐊᖅᑐᒥᓂᐅᓂᖓᓄᑦ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ. ᑭᓯᐊᓂ, ᐊᑐᐃᓐᓇᐅᔪᑦ ᑐᑭᓯᒋᐊᕈᑎᐅᔪᑦ ᓇᓗᓇᐃᔭᐃᓯᒪᔪᑦ ᑕᒪᓐᓇ ᐱᕐᕈᓗᐊᕿᔾᔪᑎᐅᓐᓂᕐᒪᑦ ᐊᑐᖅᑕᐅᔪᕕᓂᐅᓗᓂ ᐱᔾᔪᑎᒋᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᑦ ᓯᕗᒧᑦ ᐃᖏᕐᕋᓯᑲᓪᓚᓂᕐᒪᑦ ᐱᔾᔪᑎᒋᓪᓗᒍ ᐊᑐᕆᐊᑉ ᐱᐅᓗᐊᓚᐅᖏᓐᓂᖓ ᓄᖅᑲᕋᓱᑦᑐᒥᓂᐅᑎᓪᓗᒋᑦ ᖃᓂᒋᔮᓄᑦ A.B.

ᖃᐅᔨᔭᐅᔪᖅ #4: ᐊᑕᓇᓚᐅᕐᒪᑦ ᐊᒻᒪ ᓈᒻᒪᒐᓂ ᑳᓐᔅᑕᐳᓪ ᑭᐅᓕᖕ ᐊᖁᓐᓂᐊᕐᓂᕈᓂ ᖃᓂᒋᓗᐊᕐᓗᓂᐅᒃ A.B. ᐊᑐᕆᐊᑦᑕᖓ ᖁᐊᓴᐅᑎᓪᓗᒍ ᐱᐅᓗᐊᕋᓂ. ᑳᓐᔅᑕᐳᓪ ᑭᐅᓕᖕ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᖃᐅᔨᓴᑦᓯᐊᕆᐊᖃᖅᑐᒥᓂᐅᒐᓗᐊᖅ ᐃᓱᒪᒋᓪᓗᒍ ᖃᓄᐃᑦᑑᓂᖓ ᐊᑐᕆᐊᑉ ᐊᒻᒪ ᐊᓯᖏᑦ ᐊᑑᑎᖃᐅᖅᑐᑦ ᐱᔾᔪᑎᐅᓯᒪᔪᑦ.

ᖃᐅᔨᔭᐅᔪᖅ #5: ᖃᐅᔨᓴᖅᑏᑦ ᓈᒻᒪᓴᖅᑐᑦ ᓈᒻᒪᑦᑐᓂᑦ ᐋᖅᑭᒋᐊᕈᑎᑦᓴᓂᑦ ᐱᓕᕆᐊᖃᓚᐅᕐᒪᑕ ᐱᔾᔪᑎᒋᓪᓗᒍ ᑳᓐᔅᑕᐳᓪ ᑭᐅᓕᖕ ᐊᖁᓐᓂᕆᓚᐅᖅᑕᖓ ᐊᒻᒪ ᐊᓯᐊᒍᑦ ᖃᓄᐃᓕᐅᕈᑎᐅᒋᐊᖃᕈᓐᓃᕐᒪᑦ.

ᓯᕗᓪᓕᖅ ᐊᑐᖁᔭᖅ #1: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓴᓇᒋᐊᓖᑦ ᐊᒻᒪ ᐱᒋᐊᖅᑎᑦᓯᓗᑎᒃ ᐊᑐᐊᒐᕐᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᖃᖅᑐᓂᑦ ᐊᑐᖅᑕᐅᕙᓐᓂᖏᓐᓂᑦ ᖃᓄᖅ ᐸᓖᓯᒃᑯᓐᓄᑦ ᓄᓇᒃᑰᔫᑦ ᐊᖑᔮᖃᖅᑎᓪᓗᒋᑦ ᐸᓯᐅᕋᖅᑕᐅᔪᓂᑦ ᐱᓱᑦᑐᓂᑦ.

ᓯᕗᓪᓕᖅ ᐊᑐᖁᔭᖅ #2: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᕆᐊᓕᐅᔪᑦ ᓴᓇᓂᕐᒥᑦ ᐊᒻᒪ ᐱᒋᐊᖅᑎᑦᑎᓂᕐᒥᑦ ᐱᓪᓗᐊᑕᓂᑦ ᐊᑐᐊᒐᕐᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᒋᓪᓗᒋᑦ ᓄᓇᒃᑰᔫᖅᐸᓐᓂᖅ ᐊᑐᕆᐊᓂ ᐃᓱᒪᒋᓪᓗᒋᑦ ᖃᓄᐃᑉᐸᓐᓂᖏᑦ ᐊᑐᖅᑕᐅᒐᔪᑉᐸᑦᑐᑦ ᐅᑭᐅᖅᑕᖅᑐᒥ ᓄᓇᓕᖃᕐᕕᓐᓂ.

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖓ

[38] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐃᓪᓗᒍ ᑳᓐᔅᑕᐳᓪ ᑭᐅᓕᖕ ᐱᓕᕆᔾᔪᓯᖓ, ᑭᓯᐊᓂ ᐃᑲᔪᕐᓱᐃᓚᐅᖏᑦᑐᖅ ᖃᐅᔨᓴᖅᑏᑦ ᐊᑐᖁᔭᖏᓐᓂᑦ ᐊᑐᐊᒐᓕᐅᒃᑲᓐᓂᖁᔨᔪᓂᑦ ᐊᒻᒪ ᐱᓕᒻᒪᑦᓴᒃᑲᓐᓂᖁᔨᔪᓂᑦ.

[39] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐅᖃᓚᐅᖅᑐᖅ ᓇᓗᓇᓚᐅᖏᒋᐊᖓ ᐊᐳᕐᓂᕆᓚᐅᖅᑕᖏᒃ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᑕ ᐊᒻᒪ A.B. ᑕᒻᒪᕐᓯᒪᓚᐅᕐᓂᖓᓂᑦ ᖃᓄᐃᓐᓂᐊᕐᓂᖏᓐᓂᑦ ᑳᓐᔅᑕᐳᓪ ᑭᐅᓕᖕ, ᐱᔾᔪᑎᐅᒐᑎᒃ ᐱᓕᒻᒪᓴᐅᑎᓂᑦ ᐃᓕᓐᓂᐊᕐᓯᒪᖏᓐᓇᒥ ᐅᕝᕙᓘᓐᓃᑦ ᐊᑐᐊᒐᖅᑕᖃᖏᒻᒪᑦ. ᐅᖃᓚᐅᖅᑐᖅ ᑕᐃᒪᐃᑦᑐᑦ ᖃᓄᐃᒍᑎᐅᓯᒪᔪᑦ ᐊᑐᖅᑕᐅᓗᐊᖅᐸᖏᒻᒪᑕ ᐊᒻᒪ ᐋᖅᑭᑦᑕᐅᒋᐊᑐᖕᖏᒻᒪᑦ ᐊᑐᐊᒐᑎᒍᑦ ᐱᓕᕆᔾᔪᑎᓄᑦ. ᑕᒪᓐᓇ ᐱᓪᓗᒍ, ᐃᓱᒪᓕᓚᐅᖅᑐᖅ ᐊᓯᖏᓐᓂᑦ ᐊᑐᐊᒐᓕᐅᕈᑎᒃ ᐊᓯᖏᓐᓂᑦ ᐱᔾᔪᑎᓕᓐᓂᑦ ᐊᑐᖅᑕᐅᕙᓐᓂᖏᓐᓄᑦ ᐸᓖᓯᓄᑦ ᓄᓇᒃᑰᔫᖑᔪᑦ ᑭᓪᓕᖃᐅᑎᐅᑐᐃᓐᓇᕋᔭᕐᒪᑦ ᓄᓇᒃᑰᔫᑦ ᐊᑐᖅᑕᐅᔪᓐᓇᕐᓂᖏᓐᓂᑦ, ᐱᔾᔪᑎᒋᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᒪᒌᕐᓯᒪᑕ ᖃᓄᖅ ᐊᑲᐅᖏᑐᒃᑯᑦ ᐊᑦᑐᐃᓂᖃᕈᓐᓇᕐᒪᖔᑕ ᓄᖅᑲᑎᑦᓯᓪᓗᓂ ᓄᓇᒃᑰᔫᓂᑦ ᖃᓂᑦᓴᓗᐊᖅᑎᓪᓗᒋᑦ ᑭᒃᑯᑐᐃᓐᓇᕐᓂᑦ ᐱᓱᑦᑐᓂᑦ.

[40] ᐱᔾᔪᑎᒋᓪᓗᒍ ᐊᑐᖁᔭᐅᓯᒪᔪᖅ ᓴᓇᖁᔨᓂᖅ ᐊᑐᐊᒐᕐᒥᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐊᑐᕆᐊᓕᕆᔪᓂᑦ ᐊᑐᖅᑕᐅᕙᑦᑐᓂᑦ ᐅᑭᐅᖅᑕᖅᑐᒥ ᓄᓇᓕᖃᕐᕕᓐᓂ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐅᖃᓚᐅᖅᑐᖅ ᐃᓱᒪᑦᓴᕐᓯᐅᕈᑎᖃᕐᓂᕋᒥ ᐱᔾᔪᑎᐅᔪᒥᑦ ᒪᓕᑦᑐᒍ ᐊᑐᖁᔭᐅᓯᒪᓂᖓ,^{Footnote 1} ᑭᓯᐊᓂ ᐃᓱᒪᓕᓚᐅᕋᒥ ᐊᓯᔾᔩᒐᓗᐊᕈᑎᒃ ᐊᑐᐊᒐᕐᒥᑦ ᐊᒻᒪ ᐃᓚᓯᒐᓗᐊᕈᑎᒃ ᐱᓕᒻᒪᑦᓴᐅᑎᑦᓴᑲᓐᓂᕐᓂᒃ ᐅᖃᐅᓯᖃᕋᔭᖏᒻᒪᑕ ᐃᖅᑲᓇᐃᔭᖅᑎᐅᑉ ᓴᖑᑎᑕᐅᓯᒪᒍᓐᓇᕐᓂᖏᓐᓂᑦ ᖃᓄᐃᓕᖓᓂᐊᓕᖅᑯᖔᕈᑎᒍᑦ, ᐊᒻᒪ ᓈᒻᒪᑦᑐᓂᑦ ᐱᓕᒻᒪᑦᓴᐅᑎᓂᑦ ᐊᒻᒪ ᐊᑐᕆᐊᓕᓐᓂᑦ ᐱᑕᖃᕇᕐᒪᑦ ᐊᑐᖅᑕᐅᕙᑦᑐᓂᑦ. ᐅᖃᐅᓯᖃᓚᐅᖅᑐᖅ ᑭᓇᑐᐃᓐᓇᐅᑉ ᓴᖑᑎᑕᐅᓂᖓ ᖃᓄᐃᓕᐅᖅᑐᖃᕋᔭᕐᓂᒃᑯᑦ ᐊᑲᐅᓂᕐᓴᐅᔪᖅ ᑲᒪᒋᔭᐅᒍᓂ ᖃᐅᔨᓴᖅᑎᖓᓄᑦ ᐃᖅᑲᓇᐃᔭᖅᑎᐅᑉ.

[[41] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐅᖃᕆᐊᓚᐅᖅᑐᖅ ᑐᑭᓯᒋᐊᕐᓂᕋᒥ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᑐᐊᒐᓕᕆᔨᖏᓐᓂᑦ, ᐅᖃᐅᔾᔪᐃᔪᕕᓂᐅᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖃᖏᒻᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᐃᓕᓴᐃᔾᔪᑎᐅᕙᑦᑐᓂᑦ ᖃᐅᔨᒪᒋᐊᖃᕐᓂᖏᓐᓂᑦ ᐊᑦᑕᓇᖏᑐᒃᑯᑦ ᐊᐅᓚᑦᓯᔾᔪᑎᓂᑦ ᐊᐅᓚᐅᑎᓕᓐᓂᑦ ᓄᓇᒃᑰᔫᓂᑦ (ᓲᕐᓗ ᓇᒧ ᑐᑭᓕᐊᕆᐊᖃᕐᓂᖏᓐᓂᑦ ᐃᒐᓛᓄᑦ ᐊᓪᓚᖅᑎᕈᑎᖏᑦ ᓄᓇᒃᑰᔫᑉ ᓯᓚᓗᑦᑎᓪᓗᒍ ᐅᕝᕙᓘᓐᓃᑦ ᖃᐅᒪᖏᓐᓂᑦ ᑖᖅᑎᓪᓗᒍ, ᐊᒻᒪ ᐊᓯᕈᓘᔭᖏᓐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐅᖃᓚᐅᖅᑐᖅ, ᖃᐅᔨᓴᖅᑏᑦ ᖃᐅᔨᒪᖁᔨᓚᐅᕐᒪᑕ ᐅᓂᒃᑳᓕᐊᕆᒋᐊᖓᖅᑕᒥᓂ, ᐱᑕᖃᕇᕐᓂᖓᓄᑦ ᒪᓕᒐᕐᒥᑦ ᐊᐅᓚᑦᓯᔾᔪᑎᓕᕆᔪᒥᑦ ᐊᑦᑕᓇᔾᔭᐃᕐᓯᒪᓗᓂ ᐊᐅᓚᐅᑎᓕᒻᒥᑦ ᓄᓇᒃᑰᔫᒥᑦ. ᐊᑐᐊᒐᓕᕆᔨᐅᔪᑦ ᐅᖃᐅᔾᔪᐃᓚᐅᖅᑐᑦ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐊᖏᖃᑎᖃᖅᑐᓂ, ᐊᑐᐊᒐᖃᕐᒪᑕ ᐊᔪᕆᓯᒪᒐᓱᒐᑎᒃ ᒪᓕᒐᕐᒥᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᖃᐅᔨᒪᖁᔨᓚᐅᕐᒥᔪᑦ ᐊᑐᐊᒐᓕᕆᔨᒃᑯᑦ ᐅᖃᐅᔾᔪᐃᓚᐅᕐᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᑦᓴᓄᑦ ᐱᓕᒻᒪᑦᓴᐅᑎᓂᑦ ᐱᓕᕆᐊᑦᓴᒥ ᐱᖃᓯᐅᔾᔨᓯᒪᒌᕐᒪᑕ ᐱᓕᒻᒪᑦᓴᐅᑎᓂᑦ ᐱᓪᓗᐊᑕᐅᔪᓂᑦ ᓄᓇᑐᐃᓐᓇᕐᒥ ᐊᒻᒪ ᑐᐊᐸᔭᓂ ᐊᑐᕆᐊᓕᓐᓂᑦ ᓄᓇᒃᑰᔫᓐᓂᕐᒥᑦ, ᐃᓚᒋᔭᐅᔪᓄᑦ ᐱᓕᕆᐊᖑᑦᓴᐃᓐᓇᕆᐊᓕᓐᓂᑦ ᐱᔭᕇᕐᓂᐊᕈᒪᒍᑎᒃ ᐸᓖᓯᐅᓇᓱᐊᕐᓂᕐᒥᑦ.

ᖃᐅᔨᓴᖅᑏᑦ ᖃᐅᔨᓴᐅᑎᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑭᐅᔾᔪᑎᖏᓐᓂᑦ

[42] ᐅᓂᒃᑳᓕᐊᕆᒋᐊᖕᖓᕐᓯᒪᔭᖏᓐᓂ, ᖃᐅᔨᓴᖅᑏᑦ ᖃᐅᔨᒪᓂᕋᓚᐅᖅᑐᑦ ᒪᓕᒐᖃᐅᕇᕐᒪᑦ ᐊᑐᖅᑕᐅᕙᑦᑐᓂᑦ ᐱᔾᔪᑎᖃᖅᑐᓂᑦ ᐊᑦᑕᓇᔾᔭᐃᕐᓯᒪᓗᑎᒃ ᐊᐅᓚᑦᓯᔾᔪᑎᓂᑦ ᐊᐅᓚᐅᑎᓕᓐᓂᑦ ᓄᓇᒃᑰᔫᓂᑦ, ᐊᒻᒪ ᑕᒪᒃᑯᐊ ᒪᓕᒐᐃᑦ ᐊᑐᖅᐸᒻᒪᑕ (ᐃᓚᖏᓐᓂᑦ ᐊᑐᖕᖏᔾᔪᑎᖃᖅᑐᑎᒃ) ᐸᓖᓯᓄᑦ ᐱᓕᕆᐊᖃᖅᑎᓪᓗᒋᑦ ᐃᖅᑲᓇᐃᔮᕆᔭᕐᒥᓂᒃ. ᑳᓐᔅᑕᐳᓪ ᑭᐅᓕᖕ ᐊᑐᓚᐅᖅᑕᖏᑦ ᖃᓄᐃᓕᐅᕈᑎᒋᓪᓗᒋᑦ ᐱᔾᔪᑎᒋᓪᓗᒍ ᐊᐅᓚᑦᓯᓂᖓ ᐸᓖᓯᓄᑦ ᓄᓇᒃᑰᔫᖅᐸᑦᑕᓂ ᐅᖃᐅᓯᐅᓚᐅᕐᒥᔪᑦ ᐊᑯᓂ, ᐊᒻᒪ ᖃᐅᔨᓴᖅᑏᑦ ᓈᒻᒪᑦᓴᓚᐅᖅᑐᑦ ᓈᒻᒪᑦᑐᓂᑦ ᐋᖅᑭᒋᐊᕈᑎᓂᑦ ᐱᓕᕆᐊᖃᓚᐅᕐᓂᖏᓐᓂᑦ.

[43] ᖃᐅᔨᓴᖅᑏᑦ ᐊᖏᖃᑎᖃᕋᓗᐊᖅᑐᑎᒃ ᐊᑐᐊᒐᐅᔪᖅ ᐃᑲᔫᑎᐅᓇᓱᐊᖏᓐᓂᖓᓂᑦ ᐊᑐᖅᑕᐅᕙᑦᑐᓂᑦ ᒪᓕᒐᕐᓂᑦ, ᐊᒻᒪ ᐱᓕᒻᒪᑦᓴᐅᑏᑦ ᓴᖑᑎᑦᓯᔾᔪᑎᐅᔪᓐᓇᖏᒃᑲᓗᐊᖅᑐᑎᒃ ᐃᓘᓐᓇᑦᓯᐊᖏᓐᓂᑦ ᖃᓄᐃᓕᖓᓂᐊᓕᖅᑐᖔᕈᑎᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ, ᓱᓕ ᐃᓱᒪᒋᔭᖃᖅᑐᑦ ᐱᓪᓗᐊᑕᐅᔪᓂᑦ ᐱᓕᒻᒪᑦᓴᕆᐊᖃᕐᓂᖏᓐᓂᑦ ᐊᐅᓚᑦᓯᔾᔪᑎᖏᓐᓂᑦ ᐊᐅᓚᐅᑎᓕᓐᓂᑦ ᓄᓇᒃᑰᔫᓂᑦ ᐊᑐᕆᐊᓪᓗᑦᑐᓂ ᓈᒻᒪᒋᐊᖓ. ᐊᒻᒪᑦᑕᐅᖅ, ᖃᐅᔨᓴᖅᑏᑦ ᖃᐅᔨᒪᓪᓗᑎᒃ ᐊᑐᕆᐊᑦ ᐱᐅᓗᐊᖅᐸᖏᓐᓂᖏᓐᓂ ᓇᒥᑐᐃᓐᓇᑦᓯᐊᖅ ᑲᓇᑕᐅᑉ ᓄᓇᓕᖃᕐᕕᖏᓐᓂᓕᒫᖅ, ᓇᓗᓇᐃᔭᐃᑎᐅᔪᑦ ᓄᐊᑕᐅᓯᒪᔪᑦ ᑕᕝᕙᓂ ᐱᓕᕆᐊᖑᔪᒥ ᓇᓗᓇᐃᔭᐃᓯᒪᔪᑦ ᐱᓪᓗᐊᑕᐅᔪᓂᑦ ᐃᓱᒫᓘᑎᑕᖃᕐᓂᖓᓂᑦ ᐱᔾᔪᑎᒋᓪᓗᒋᑦ ᐱᐅᓗᐊᖅᐸᖏᑦᑐᑦ ᖃᓄᐃᓕᖓᒍᑎᐅᔪᑦ ᐱᑕᖃᖅᑐᑦ ᑭᖕᖓᕐᓂ. ᐊᒥᓱᐃᑦ ᑭᒃᑯᑐᐃᓐᓇᐃᑦ ᐅᖃᖅᐸᓚᐅᖅᑐᑦ ᐱᓪᓗᐊᑕᐅᔪᓂᑦ ᐱᔭᕆᐊᑐᒋᔭᐅᕙᑦᑐᓂᑦ ᐱᔾᔪᑎᒋᓪᓗᒍ ᐊᑦᓱᕉᓴᓐᓇᐸᑦᑐᖅ ᓄᓇ. ᓇᓗᓇᐃᖅᑕᐅᒋᐊᕐᓯᒪᒻᒥᔪᑦ ᐊᒥᓱᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᖅᑲᓇᐃᔭᕆᐊᖅᐸᑦᑐᑦ ᑭᖕᖓᕐᓄᑦ ᑭᖑᕝᕕᖅᑎᑐᐃᓐᓇᐅᕙᒻᒪᑕ ᑎᒍᔭᐅᒪᕕᓐᓂᒃ ᐊᓯᖏᓐᓂᒃ ᐊᑐᖅᑐᐊᖅᑕᐅᕙᑦᑐᑎᒃ ᓯᓚᑎᖏᓐᓂᑦ ᐅᑭᐅᖅᑕᖅᑑᑉ, ᖃᐅᔨᒪᓗᐊᖅᑐᑦᓴᐅᖏᑦᑐᓂᑦ ᖃᓄᓪᓚᑦᑖᖅ ᐊᑦᓱᕉᑎᐅᕙᑦᑐᓂᑦ ᐱᔾᔪᑎᐅᓗᑎᒃ ᐊᑐᕆᐊᑦ ᖃᓄᐃᓕᖓᓂᕆᕙᑦᑕᖏᓐᓂᑦ.

[44] ᐱᔾᔪᑎᒋᓪᓗᒍ ᖃᓂᒋᓗᐊᖅᑕᖓᒍᑦ ᓄᓇᒃᑰᔫᕐᓂᐅᔪᖅ ᑭᒃᑯᑐᐃᓐᓇᐃᑦ, ᖃᐅᔨᓴᖅᑏᑦ ᐱᓕᕆᐊᖃᕋᑖᕐᓯᒪᒻᒥᔪᑦ ᐊᓯᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓄᓇᒃᑰᔫᖏᑦ ᐊᑦᑐᐃᓯᒪᑎᓪᓗᒋᑦ ᑭᒃᑯᑐᐃᓐᓇᕐᓂᑦ ᑎᒍᓯᓇᓱᐊᖅᑐᑎᒃ. ᐊᓱᐃᓪᓛᒃ, ᖃᐅᔨᓴᖅᑏᑦ ᐃᓱᒪᒋᔭᖃᓕᖅᐳᑦ ᑕᒪᑦᓱᒥᖓ ᐃᓱᒪᑦᓴᕐᓯᐅᕈᑎᐅᒃᑲᓐᓂᕐᓗᓂ ᑭᓯᐊᓂ.

[45] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᑦᓴᓄᑦ ᐱᓕᒻᒪᑦᓴᐅᑎᓂᑦ ᐱᓕᕆᐊᑦᓴᖓᑦ ᐱᑕᖃᕇᕋᓗᐊᖅᑎᓪᓗᒍ ᐱᓕᒻᒪᑦᓴᐅᑎᓂᑦ ᐱᓪᓗᐊᑕᐅᔪᓂᑦ ᓄᓇᑐᐃᓐᓇᕐᒥ ᐊᒻᒪ ᑐᐊᐸᔭᓂ ᐊᑐᕆᐊᓕᓐᓂᑦ ᐊᖁᓐᓂᕐᒥᑦ, ᐊᓯᖏᓐᓂᑦ ᐃᑲᔫᑎᑦᓴᓂᑦ ᐱᓕᒻᒪᑦᓴᐅᑎᖃᕈᑎᒃ ᐱᐅᓗᐊᖅᐸᖏᑦᑐᓂ ᐱᓪᓗᐊᑕᐅᔪᓂ ᓄᓇᓂ ᐊᑦᓱᑲᓪᓚᐅᔪᖅ ᐱᕙᓪᓕᐅᑎᒍᓐᓇᕋᔭᖅᑐᑦ.

[46] ᕿᒥᕐᕈᐊᖅᑕᐅᓚᐅᖅᑎᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖏᑦ, ᖃᐅᔨᓴᖅᑏᑦ ᐊᖏᖃᑎᖃᖅᑐᑦ ᐊᓯᖏᓐᓂᑦ ᐊᑐᐊᒐᓕᐅᕋᓗᐊᕈᑎᒃ ᐱᐅᓂᖅᐹᖑᓗᐊᕋᔭᖏᒻᒪᑕ ᖃᓄᐃᓕᐅᕈᑎᒋᓂᐊᕐᓗᒋᑦ ᐱᔾᔪᑎᐅᔪᓂᑦ ᑕᑯᔭᐅᔪᓂᑦ ᑕᕝᕙᓂ ᐱᓕᕆᐊᖑᔪᒥ. ᖃᐅᔨᓴᖅᑏᑦ ᐋᖅᑭᒋᐊᕆᓛᖅᑐᑦ ᐊᑐᖅᑕᐅᖁᓯᒪᔭᖏᓐᓂᑦ ᒪᓕᑦᑕᐅᓗᑎᒃ ᑐᕌᒐᖃᕐᓂᐊᕐᓗᑎᒃ ᐱᓕᒻᒪᑦᓴᐅᑎ

ᑭᖑᓪᓕᖅᐹᑦ ᐊᑐᖁᔭᖅ #1: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐋᖅᑭᑦᓱᐃᒋᐊᓖᑦ ᐊᒻᒪ ᐱᒋᐊᖅᑎᑦᓯᓗᑎᒃ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᐅᓗᑎᒃ ᐊᑐᖅᑕᐅᕙᓐᓂᖏᑦ ᐸᓖᓯᓄᑦ ᓄᓇᒃᑰᔫᑦ ᐊᖑᔮᖃᖅᑎᓪᓗᒋᑦ ᐸᓯᔭᐅᓯᒪᔪᓂᑦ ᐅᓪᓚᑦᑐᓂᑦ ᐊᒻᒪ ᐱᔾᔪᑎᖃᓗᐊᕐᓗᑎᒃ ᖃᓄᖅ ᐱᓕᕆᔾᔪᑎᖃᕆᐊᖃᕐᓂᕐᒥᑦ ᓄᓇᒃᑰᔫᖅᑐᖃᖅᑎᓪᓗᒍ ᖃᓂᒋᓗᐊᖅᑕᖏᒍᑦ ᐱᓱᑦᑐᑦ ᑭᒃᑯᑐᐃᓐᓇᐃᑦ.

ᑭᖑᓪᓕᖅᐹᑦ ᐊᑐᖁᔭᖅ #2: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓇᓗᓇᐃᕐᓯᒪᐃᓐᓇᕆᐊᓖᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᒻᒪᓴᕐᓯᒪᒐᓗᐊᕐᒪᖔᑕ ᐱᔾᔪᑎᖃᕐᓗᑎᒃ ᓄᓇᒃᑰᔫᖅᐸᓂᕐᒥᑦ ᐊᑐᕆᐊᓪᓗᑦᑐᓂ, ᐱᖃᓯᐅᔾᔭᐅᕙᓪᓗᑎᒃ ᐊᑐᕆᐊᑦ ᓯᓚᑖᓂ ᓄᓇᒃᑰᔫᓄᑦ ᐊᒻᒪ ᑐᐊᐸᔭᓂᑦ ᐊᑐᕆᐊᓕᓐᓂᑦ, ᐊᒻᒪ ᐊᓯᖏᓐᓂᑦ ᐱᓕᒻᒪᓴᖅᐸᓪᓗᑎᒃ ᐃᑲᔫᑎᑦᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᔾᔪᑎᖃᖅᐸᓪᓗᑎᒃ ᐅᓗᕆᐊᓇᖅᑐᓂᑦ ᓴᖅᑭᑕᐅᓯᒪᔪᓂᑦ ᐊᑐᕆᐊᑦ ᖃᓄᐃᓕᖓᓂᖏᓐᓂᑦ ᐱᓪᓗᐊᑕᐅᔪᓂ ᐊᕙᑎᓂ, ᐱᖃᓯᐅᔾᔭᐅᓗᑎᒃ ᐅᑭᐅᖅᑕᖅᑐᒥ ᓄᓇᓕᖃᕐᕕᐅᔪᓂ.

A.B. ᓄᓇᒃᑰᔫᒃᑰᕈᔾᔭᐅᓂᖓ ᐊᒻᒪ ᑎᑭᓐᓂᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓄᑦ

[47] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓇᓗᓇᐃᔭᐃᑎᐅᔪᑦ ᓇᓗᓇᓚᐅᕐᒪᑕ ᑳᓐᔅᑕᐳᓪ ᑭᐅᓕᖕ ᐅᖄᓕᒫᕐᕕᖃᕐᓂᕋᓗᐊᕐᒪᖔᖅ A.B.-ᒧᑦ ᐱᔪᓐᓇᐅᑎᖏᓐᓂᑦ ᐸᓖᓯᒃᑯᑦ ᓄᓇᒃᑰᔫᖓᓃᓐᓂᖏᓐᓂ. ᖃᐅᔨᓴᖅᑏᑦ ᐅᖃᓚᐅᖅᑐᖅ A.B. ᐅᖄᓕᒫᕐᕕᐅᓂᖏᒻᒪᑦ ᐅᕝᕙᓘᓐᓃᑦ "ᐅᖃᓕᒫᕐᕕᐅᑲᓐᓂᓂᖕᖏᒻᒪᑦ" ᐱᔪᓐᓇᐅᑎᖏᓐᓂᑦ ᐋᖓᔮᕈᓐᓃᑎᓪᓗᒍ, ᐱᕕᑖᖅᑎᑕᐅᓯᒪᓚᐅᕋᓂᓗ ᖃᐅᔨᒋᐊᕐᓂᕐᒥᑦ ᒪᓕᒐᓕᕆᔨᓂᑦ ᖃᖓᑐᐃᓐᓇᒃᑯᑦ ᐃᑲᕐᕋᐃᑦ 18 ᐃᓗᖏᓐᓂ ᑎᒍᔭᐅᒪᓂᖓᓂ. ᖃᐅᔨᓴᖅᑏᑦ ᖃᐅᔨᔭᖃᓚᐅᖅᑐᑦ ᐊᒻᒪ ᐊᑐᓕᖁᔨᔾᔪᑎᖃᖅᑐᑎᒃ ᑲᒪᒋᔭᐅᖁᓪᓗᒍ ᐅᓇ ᐱᔾᔪᑎᐅᔪᖅ.

[48] ᖃᐅᔨᓴᖅᑏᑦ ᐃᓱᒫᓘᑎᖃᐅᖅᑐᑦ ᐱᔾᔪᑎᒋᓪᓗᒍ ᕿᓂᕐᕕᐅᓂᒥᓂᖓ A.B. ᐅᕙᓃᑎᓪᓗᒍ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ A.B.-ᒥᑦ ᐊᓐᓄᕋᐃᔭᐃᔪᕕᓃᑦ ᕿᒪᑦᑕᐅᓂᖅᑐᓂ ᐃᓗᐊᖏᓐᓈᑎᓪᓗᒍ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐅᖃᓚᐅᖅᑐᑦ ᐲᔭᐃᓚᐅᕐᒪᑕ A.B. ᐊᓐᓄᕌᖏᓐᓂᑦ ᐅᐱᓐᓇᕋᓂ ᖃᐅᓯᐊᓘᓚᐅᕐᒪᑕ. ᒪᓕᑦᑐᒋᑦ ᐱᓕᕆᔾᔪᑎᒍᑦ ᒪᓕᒐᐃᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐊᑐᐊᒐᖓᑦ, ᑕᒪᓐᓇ ᐊᓐᓄᕌᖃᖏᑦᑐᓂᑦ ᕿᓂᕆᐊᖃᕈᑎᐅᔪᖅ.

[49] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ, ᐊᑦᑕᓇᖅᑐᒦᖁᓇᒍ, ᓈᒻᒪᓚᐅᖅᑐᑦ ᖃᑦᓯᐅᓂᕆᓚᐅᖅᑕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᕿᓂᖃᑕᐅᓚᐅᖅᑐᑦ. ᐊᒻᒪᑦᑕᐅᖅ, A.B. ᐊᑯᓛᖏᑦ ᖃᖓᑐᐃᓐᓇᒃᑯᑦ ᓴᖅᑭᔮᓚᐅᕐᓂᖏᑦᑐᑦ. ᑭᓯᐊᓂᓕ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᑲᐅᓚᐅᖏᒻᒪᑦ ᕿᒪᑦᑕᐅᑐᐃᓐᓇᕐᓯᒪᓂᖓ A.B. ᓇᑎᐊᓂ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᐃᓗᐊᖏᓐᓈᑎᓪᓗᒍ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᕝᕙᓘᓐᓃᑦ ᐅᐊᑦᓯᐅᔪᒧᑦ ᐱᑎᑕᐅᓂᖏᓐᓂᖓ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᑦ. ᐱᔾᔪᑎᒋᓪᓗᒍ ᖃᓄᐃᓕᖓᒍᑎᐅᔪᕕᓂᖅ, A.B. ᐱᑎᑕᐅᒋᐊᓕᒥᓂᐅᒐᓗᐊᖅ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᒃ, ᑕᐃᒪᐃᒍᓐᓇᕐᓂᕈᑎᒃ ᐊᑦᑕᓇᔾᔭᐃᕐᓯᒪᓗᑎᒃ, ᐱᓗᐊᖅᑐᒥ ᐱᔾᔪᑎᒋᓪᓗᒍ ᐊᓐᓄᕋᐃᔭᖅᑕᐅᓂᒥᓂᖓ ᐊᑦᑕᓇᖅᑐᒦᖁᔭᐅᒐᓂ ᕿᐅᖁᓇᒍ. A.B. ᐃᓗᐊᕐᓯᒪᐃᓐᓇᓚᐅᖅᑐᖅ ᐃᑲᕐᕋᓄᑦ ᑎᓴᒪᐅᔪᖅᑐᑲᓴᓂᑦ (8) ᑎᒍᔭᐅᓚᐅᖅᑎᓪᓗᒍ. ᖃᐅᔨᓴᖅᑏᑦ ᐊᑐᖁᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᑎᑕᐅᖁᓪᓗᒋᑦ ᐊᐅᓚᑦᓯᔾᔪᑎᓂᑦ ᒪᓕᒋᐊᓕᓐᓂᑦ ᐃᓕᓐᓂᐊᖅᑎᑕᐅᓗᑎᒃ ᑕᒪᓐᓇ ᐱᔾᔪᑎᒋᓪᓗᒍ.

[50] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᖃᓄᑎᒋ ᐊᑦᓱᕈᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒪᑭᑎᑦᓯᑦᑕᐃᓕᒪᑎᓪᓗᒋᑦ A.B.-ᒥᑦ ᕿᓂᕐᕕᐅᑎᓪᓗᒍ ᐊᑦᓱᐊᓘᓚᐅᖏᒻᒪᑕ ᐊᒻᒪ ᐊᑐᖅᑕᐅᒋᐊᖃᖅᑐᓂ. ᐃᓚᖏᑦ ᐊᑦᓱᕈᕐᓂᕐᓴᐅᓗᑎᒃ ᐊᑐᖅᑕᐅᓚᖅᑐᑦ ᓅᑕᐅᓇᓱᐊᖅᑐᓂ A.B. ᐊᒻᒪ ᐃᓚᖏᓐᓂᑦ ᐊᓐᓄᕌᖏᓐᓂᑦ ᐲᔭᐃᕕᐅᓇᓱᐊᖅᑎᓪᓗᒍ ᐃᓱᒫᓗᒋᓂᕐᓴᕆᓚᐅᖅᑕᖏᑦ ᖃᐅᔨᓴᖅᑏᑦ. ᖃᐅᔨᓴᖅᑏᑦ ᐊᑐᓚᐅᖅᑐᑦ ᐊᑐᖁᔭᐅᓯᒪᔪᓂᑦ ᐃᖅᑲᖅᑐᐃᕕᓕᕆᔨᓂᑦ ᖃᐅᔨᓴᖅᑕᐅᓗᑎᒃ ᑕᒪᒃᑯᐊ ᐊᑐᖅᑕᐅᓯᒪᔪᑦ ᐊᒻᒪ ᖃᐅᔨᓕᓚᐅᖅᑐᑦ ᐊᑐᖅᑕᐅᓂᖓ ᖃᓄᑎᒋ ᐊᑦᓱᕈᖅᑐᑎᒃ ᓈᒻᒪᓚᐅᕆᐊᖓ. ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᓴᖅᑏᑦ ᐅᔾᔨᕈᓱᒋᐊᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐊᑐᖁᔭᐅᕙᑦᑐᑎᑦ ᐊᑦᓱᕈᓗᐊᖅᐸᖏᓪᓗᑎᒃ ᖃᖓᑐᐃᓐᓇᒃᑯᑦ.

[51] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᑐᑭᓯᒋᐊᕈᑎᐅᔪᑦ ᐃᓱᒪᓕᐅᕈᑎᐅᓯᒪᔪᑦ A.B. ᐋᓐᓂᖅᑐᒥᓂᐅᒋᐊᖓ ᐱᔾᔪᑎᒋᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ ᐊᐳᖅᑕᐅᓂᒥᓂᖓ ᐅᕝᕙᓘᓐᓃᑦ ᕿᓂᕐᕕᐅᑎᓪᓗᒍ. ᓈᒻᒪᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᕿᓂᓚᐅᖏᒻᒪᑕ ᐋᓐᓂᐊᔪᓕᕆᔨᑦᓴᒥᑦ A.B.-ᒥᑦ ᑎᒍᔭᐅᓚᐅᖅᑎᓪᓗᒍ, ᐅᐱᓐᓇᕋᓂ ᓇᓗᓇᐃᔭᐃᑎᖃᓚᐅᖏᑦᑐᖅ ᑲᒪᒋᔭᐅᔭᕆᐊᖃᕐᓂᖓᓂᑦ.

[52] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐊᒻᒪ ᐊᑐᖁᔭᖓᓂᑦ ᑕᒪᒃᑯᐊ ᐱᓪᓗᒋᑦ ᐱᔾᔪᑎᐅᔪᑦ.   

ᐱᒋᐊᖅᑕᐅᓂᒥᓂᖓ A.B. ᑎᒍᔭᐅᒪᑎᓪᓗᒍ ᐊᒻᒪ ᖃᓄᐃᑦᑑᓂᖏᑦ ᑎᒍᔭᐅᒪᔪᖃᖅᑎᓪᓗᒍ ᐃᓪᓗᕈᓯᕐᓂ ᑎᒍᔭᐅᒪᕕᓐᓂ

[53] ᐊᑦᓱᑲᓪᓚᒃ ᐃᓂᑭᑦᓴᓚᐅᖅᑐᑦ ᐃᓪᓗᕈᓯᕐᓂ ᑎᒍᔭᐅᒪᕕᓐᓂᑦ ᑭᖕᖓᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑎᒍᔭᐅᒪᕕᐊᓂ A.B. ᐃᓯᖅᑕᐅᕕᖓᓂ. ᑎᒍᔭᐅᒪᕕᒃ ᑎᓴᒪᐃᓐᓇᕐᓂᒃ (4) ᐃᓪᓗᕈᓯᖃᕐᒪᑦ ᑎᒍᔭᐅᒪᕕᓐᓂᑦ, ᓇᓗᓇᐃᔭᐃᑎᒍᑦ ᓇᓗᓇᐃᕐᓯᒪᓪᓗᑎᒃ ᓈᒻᒪᖏᑦᑐᒻᒪᕆᐅᔪᑦ ᐊᒻᒪ ᒪᓕᒐᑎᒃ ᐊᑐᖅᑕᐅᒋᐊᓕᓐᓂᑦ ᐱᔾᔪᓯᐅᔪᓂᑦ. ᐱᔾᔪᑎᒋᓪᓗᒋᑦ ᐊᒥᓱᕈᖅᐸᓪᓕᐊᓚᐅᖅᑐᑦ ᑎᒍᔭᐅᕙᑦᑐᑦ ᐊᕐᕌᒎᓐᓂ ᒪᕐᕉᓐᓂ (2) ᐊᓂᒍᓕᖅᑑᓐᓂᒃ, ᓇᓗᓇᐃᔭᐃᑎᐅᔪᑦ ᓵᖓᓃᑦᑐᑦ ᖃᐅᔨᓴᖅᑏᑦ ᓇᓗᓇᐃᔭᐃᔪᑦ ᑎᒍᔭᐅᒪᕕᒃ ᐃᓪᓗᕈᓯᖃᕆᐊᖃᓕᕐᒪᑦ ᑎᒍᔭᐅᒪᕕᓐᓂᑦ ᖁᓕᓂᑦ (10) ᑎᓴᒪᑐᐃᓐᓇᐅᖏᑦᑐᓂᑦ (4) ᐃᓪᓗᕈᓯᕐᓂᑦ.

[54] ᑕᐃᑲᓂ ᐅᓐᓅᑎᓪᓗᒍ, 15 ᑎᒍᔭᐅᒪᔪᑦ ᐃᓪᓗᕈᓯᕐᓃᑎᑕᐅᓚᐅᖅᑐᑦ ᑎᒍᔭᐅᒪᕕᓐᓂ ᑭᖕᖓᐃᑦ ᑎᒍᔭᐅᒪᕕᖏᑕ ᐱᓕᕆᕝᕕᖓᓂ. ᐊᑕᐅᓯᖅ (1) ᑎᒍᔭᐅᒪᕕᒃ ᐊᑐᖅᑕᐅᓚᐅᖅᑐᑦ ᐊᕐᓇᓄᑦ ᑎᒍᔭᐅᔪᓄᑦ, ᐊᓯᖏᑦ ᐱᖓᓱᑦ (3) ᑎᒍᔭᐅᒪᕖᑦ ᐊᑐᖅᑕᐅᓗᑎᒃ 9-ᓄᑦ ᐊᖑᑎᓄᑦ ᑎᒍᔭᐅᒪᔪᓄᑦ. ᐊᒥᓱᐊᓘᓚᐅᖅᑐᑦ ᐅᖄᓚᔾᔪᑎᓖᑦ ᐱᓪᓗᒋᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᒥᓱᓂᑦ ᐱᔭᕆᐊᑐᔪᓂᑦ ᐃᓱᒪᑦᓴᕐᓯᐅᕆᐊᖃᖅᐸᓚᐅᖅᑐᑦ ᐃᓂᑦᓴᓕᐅᕋᓱᑦᑐᑎᒃ ᐃᓵᕙᓪᓕᐊᔪᓄᑦ ᑎᒍᔭᐅᕙᑦᑐᓄᑦ. ᓲᕐᓗ, ᐊᑕᐅᓯᕐᒥᑦ ᑎᒍᔭᐅᒪᔪᒥᑦ ᐊᓯᐊᓅᖅᑕᐅᒋᐊᖃᓚᐅᖅᑐᖅ ᐊᐱᕐᓱᖅᑕᐅᕕᖓᓄᑦ ᐃᓪᓗᕈᓯᕐᒧᑦ, ᐊᓯᐊᓂᑦ ᐸᓖᓯᒃᑯᑦ ᓄᓇᒃᑰᔫᖓᑕ ᐃᓗᐊᓃᑎᑕᐅᑎᓪᓗᒍ ᐅᖓᑖᓂ ᐃᑦᓯᕚᕕᕐᒦᑎᑕᐅᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᖄᓚᕕᐅᒐᐃᒻᒪᑕ ᐅᐸᖃᑦᑕᑎᓪᓗᒋᑦ. ᐊᑕᐅᓯᐅᒐᓗᐊᒥᑦ ᑎᒍᔭᐅᒪᔪᒥᑦ ᓱᓕ ᐋᖓᔮᖅᑎᓪᓗᒍ ᐊᓂᑎᑕᐅᔪᖃᓚᐅᖅᑐᖅ ᐃᓂᓕᐅᕈᒪᓪᓗᑎᒃ ᐅᓗᕆᐊᓇᕐᓂᕐᓴᓄᑦ ᑎᒍᔭᐅᔪᓂᑦ. ᐊᑐᖅᑕᐅᒐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖓᑦ, ᑎᒍᔭᐅᒪᔪᑦ ᐃᓱᒪᓕᕆᔪᑦ ᐃᖕᒥᓂᒃ ᐅᕝᕙᓘᓐᓃᑦ ᐊᓯᖏᓐᓂᑦ ᐅᓗᕆᐊᓇᖅᑐᒦᑎᒍᓐᓇᖅᑐᑎᒃ ᐃᓄᑑᑎᑕᐅᕙᖏᑦᑐᑦ ᑎᒍᔭᐅᒪᓪᓗᑎᒃ, ᐱᔾᔪᑎᖃᖅᑐᑎᒃ ᐃᓂᑭᑦᓴᐸᓐᓂᕐᒥᑦ.

[55] ᓇᓪᓕᐊᑐᐃᓐᓇᑦᓯᐊᖅ ᑖᒃᑯᐊ ᖃᓄᐃᓕᖓᒍᑎᐅᓚᐅᖅᑐᑦ ᐊᑐᖅᑕᐅᔪᓐᓇᖅᑐᒥᓃᑦ ᐊᑦᑕᓇᑦᑕᐃᓕᒪᓂᒃᑯᑦ ᐃᓱᒫᓘᑎᐅᔪᓂᑦ ᑎᒍᔭᐅᖅᑲᔪᓄᑦ ᐅᕝᕙᓘᓐᓃᑦ ᐊᓯᖏᓐᓄᑦ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐃᓂᖃᑦᓯᐊᐸᖏᓐᓂᖏᓐᓂᑦ ᑎᒍᔭᐅᒪᔪᑦ ᓴᖅᑮᓚᐅᕐᒪᑕ ᐊᑦᑕᓇᖅᑐᒥᑦ ᑎᒍᔭᐅᒪᔪᓄᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓄᑦ, ᐊᒻᒪ ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑎᓄᑦ.

[56] A.B. ᐃᓄᑑᑎᑕᐅᒋᐊᖓᓚᐅᖅᑑᒐᓗᐊᖅ ᐃᓪᓗᕈᓯᖃᖅᑐᓂ ᐃᓄᑑᓗᓂ ᐃᓪᓗᕈᓯᕐᒥ 3, ᐊᓐᓄᕋᐃᔭᖅᑎᖅᑕᐅᕋᑖᑦᓯᐊᖅᑐᓂ. ᑭᓯᐊᓂᓕ, ᐃᓪᓗᕈᓯᕐᒨᖅᑕᐅᓚᐅᖅᑎᓪᓗᒍ ᑎᒍᔭᐅᒪᕕᒻᒧᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᖄᓚᕕᐅᓕᓚᐅᕐᒥᔪᑦ ᐊᖏᕐᕋᒥ ᐱᑦᓯᐊᖃᑦᑕᐅᑎᖏᑦᑐᓂᑦ ᐱᔾᔪᑎᓕᒻᒧᑦ ᐊᕐᕌᒍᓕᒻᒥᑦ 35-ᓂᑦ ᐊᖑᑎᒥᑦ (J.J.) ᑎᒍᔭᐅᓚᐅᖅᑐᓂ ᐱᒋᐊᕐᓯᓯᒪᓂᖓᓄᑦ ᐊᒻᒪ ᒪᓕᒋᐊᓕᖏᓐᓂᑦ ᓱᕋᐃᓂᖓᓄᑦ. J.J. ᐋᖓᔮᖅᑐᒻᒪᕆᐅᓚᐅᖅᑐᖅ ᐊᒻᒪ ᓂᖕᖓᐅᒪᕐᔪᐊᖅᑐᓂ ᐸᓖᓯᒃᑯᓐᓄᑦ. ᐸᐸᒧᑦ ᑎᒻᒥᑳᕐᕕᐅᒋᐊᖃᓕᓚᐅᕐᒪᑦ ᑎᒍᔭᐅᒪᕕᒻᒧᑦ ᐃᓪᓗᕈᓯᕐᒨᖅᑕᐅᕙᓪᓕᐊᓗᓂ ᖁᓄᓐᓂᓚᐅᕐᒪᑦ ᐊᒻᒪ ᑐᒃᑲᐸᑦᑐᓂ ᒥᑦᓵᓄᑦ ᑳᓐᔅᑕᐳᓪ ᑭᐅᓕᖕ.

[57] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓵᖕᖓᔭᐅᑲᓐᓂᓕᓚᐅᕐᒥᔪᑦ ᐃᓂᑭᑦᓴᓂᕐᒥᑦ ᐃᓪᓗᕈᓰᑦ ᑎᒍᔭᐅᒪᕕᒻᒥ ᐱᔾᔪᑎᒋᓪᓗᒋᑦ. ᑕᐃᑦᓱᒪᓂᐅᑎᓪᓗᒍ, ᐃᓪᓗᕈᓯᖅ ᓈᓴᐅᑎᓕᒃ 1 ᐃᓄᖃᓚᐅᖅᑐᖅ ᑎᓴᒪᓂᑦ (4) ᐊᖑᑎᓂᑦ ᑎᒍᔭᐅᒪᔪᓂᑦ, ᑕᐃᑦᓱᒧᖓ ᐃᓪᓗᕈᓯᕐᒧᑦ ᐃᓄᒋᐊᓗᐊᓚᐅᖅᑐᑦ; ᐃᓪᓗᕈᓯᖅ ᓈᓴᐅᑎᓕᒃ 2 ᒪᕐᕉᓐᓂᒃ (2) ᐊᖑᑏᓐᓂᒃ ᐃᓄᖃᓚᐅᖅᑐᖅ, ᐊᐃᑉᐸᖓ "ᐱᒋᐊᓲᖑᓪᓗᓂ ᓱᕋᐃᔨ ᒪᓕᒐᕐᒥᑦ" ᐱᐅᑦᓱᓗᐊᕋᓂᓗ J.J.-ᒥᑦ ᐊᒻᒪ ᓂᖕᖓᐅᑎᒐᓱᐊᖏᓐᓇᐸᑦᑐᓂ; ᐊᒻᒪ ᐃᓪᓗᕈᓯᖅ ᓈᓴᐅᑎᓕᒻᒥ 4 ᒪᕐᕉᓐᓂᒃ (2) ᐊᕐᓈᓐᓂᒃ ᐃᓄᖃᖅᑐᓂ. J.J. ᐃᓪᓗᕈᓯᕐᒨᖅᑕᐅᓕᓚᐅᖅᑐᖅ 3 ᓇᔪᖅᑕᖓᓄᑦ A.B.

[58] ᐸᓖᓯᒃᑯᑦ ᑎᒍᔭᐅᒪᖃᕐᕕᖓᑦ ᐊᑕᐅᓯᕐᒥᑦ (1) ᐃᖅᑲᓇᐃᔭᖅᑎᖃᖅᑐᑦ ᐅᐊᑦᓯᔨᒥᑦ, ᑖᓐᓇᓕ ᐃᓚᒋᔭᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ. ᐅᐊᑦᓯᓘᓐᓃᑦ ᐅᕝᕙᓘᓐᓃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯ ᑎᒍᓯᓚᐅᖅᑐᖅ J.J.-ᒥᑦ ᖃᓄᐃᓕᐅᕐᓂᖏᑦᑑᒃ ᓱᕈᐃᔭᐃᔾᔪᑎᑦᓴᖏᓐᓂᑦ J.J. ᐸᐸᒧᑦ ᑎᒻᒥᑳᕐᕕᐅᓚᐅᖅᑎᓪᓗᒍ. ᑎᒍᔭᐅᒪᕕᒻᒥ ᐃᓪᓗᕈᓰᕐᒥᓕᕋᒥ, J.J. ᑕᑯᔭᐅᓚᐅᖅᑐᖅ ᐃᔨᖏᓐᓂᑦ ᐊᑦᓴᓛᑦᑎᓪᓗᒍ ᐊᒻᒪ ᐅᖃᐅᓯᖃᖅᐸᑦᑐᓂ ᐃᔨᒥᓂᒃ ᐱᔾᔪᑎᖃᖅᑐᓂ. ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᖅ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ ᑕᑯᑦᓴᐅᑎᑦᓯᔪᑦ ᑯᕝᕕᕕᖏᓐᓂᑦ ᑯᕕᑎᑦᓯᒐᓱᑦᑎᓪᓗᒍ ᖁᓛᓃᑦᑐᓂᑦ ᐅᐊᕐᓴᕐᕕᖓᑕ ᐊᑕᐅᓯᐊᕋᓂ, ᐊᒻᒪ ᖁᕝᕕᒻᒥᒃ ᐃᒥᕐᒧᑦ ᑮᓇᕐᒥᓂᒃ ᖃᐅᓯᓕᖅᑎᕆᕙᑦᑎᓪᓗᒍ, ᐊᑕᐅᓯᐊᕋᓂ ᑕᐃᒪᐃᓕᐅᓚᐅᖅᑐᖅ ᐃᓗᐊᓂ 20 ᒪᓇᑦᓯᓂᑦ. ᐊᑕᐅᓯᐊᖅᑐᓂ, J.J. ᐲᕐᓯᓚᐅᖅᑐᖅ ᖃᓪᓕᖏᓐᓂᒃ ᐊᒻᒪ ᖃᓪᓕᕋᓛᖏᓐᓂᒃ, ᐊᒻᒪ ᑮᓇᓂ ᐊᓪᓚᑎᖅᑐᓂᐅᒃ ᑖᒃᑯᓄᖓ.

[59] ᓇᓗᓇᐃᔭᐃᑎᐅᔪᑦ ᓴᖅᑮᓚᐅᖅᑐᑦ ᐅᐊᓴᕐᕕᐅᑉ ᑯᕝᕕᕕᖏᑦ ᑯᕕᒍᓐᓇᖏᓯᒪᒻᒪᑎᒃ ᐃᓪᓗᕈᓯᕐᒥ ᓈᓴᐅᑎᓕᒻᒥ 3 (ᐊᓯᖏᓪᓗ) ᐊᑯᓂᑲᓪᓚᐅᓕᖅᑐᖅ ᐊᒻᒪ ᑕᒪᓐᓇᐅᑎᓪᓗᒍ, ᖃᐅᔨᒪᔭᐅᒐᓗᐊᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᕐᕌᒎᓐᓄᑦ ᒪᕐᕉᓐᓄᑦ (2), ᖁᕝᕕᖏᑦ ᐊᒻᒪ ᐅᐊᓴᕐᕕᖏᑦ ᓱᓕ ᑭᖑᕝᕕᖅᑕᐅᓯᒪᖏᑦᑐᑦ. ᓇᓗᓇᐃᔭᐃᑎᐅᔪᑦ ᓴᖅᑮᓚᐅᕐᒥᔪᑦ ᑎᒍᔭᐅᒪᕕᒻᒥ ᐱᑕᖃᓚᐅᕐᒪᑦ ᐃᔩᓐᓂᒃ ᐅᐊᓴᐅᑎᖃᕐᕕᒻᒥᑦ ᐊᑐᖅᑕᐅᒋᐊᓕᒻᒥᑦ, ᑭᓯᐊᓂ ᐃᒪᖃᓚᐅᖏᑦᑐᖅ, ᐊᒻᒪ ᐃᓂᖃᓚᐅᕆᓪᓗᓂ ᐅᐊᑦᓯᐅᑉ ᐊᓇᕐᕕᖃᕐᕕᖓᓂ ᐃᔨᕐᓯᒪᐸᓗᑦᑐᓂ, ᐅᐸᒐᑦᓴᐅᓗᐊᕋᓂᓗ.

[60] ᖃᐅᔾᓴᖅᑏᑦ ᖃᐅᔨᒪᖁᔨᓚᐅᖅᑐᑦ ᑕᒪᓐᓇ ᓈᒻᒪᖏᑦᑐᒻᒪᕆᐅᔪᖅ ᐊᑐᖅᑕᐅᓚᐅᖅᑐᖅ ᓴᖅᑮᔪᖅ ᐃᓱᒫᓘᑎᐅᔪᓂᑦ ᐱᒻᒪᕆᐅᔪᓂᑦ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᓂᕐᒧᑦ, ᐊᒻᒪ ᐱᔾᔪᑎᐅᓚᐅᖅᑐᑦ ᐃᓚᓯᓂᕐᒥᑦ ᐅᓗᕆᐊᓇᖅᑐᓂᑦ A.B.-ᒧᑦ ᐃᓪᓗᕈᓯᕐᒥᐅᖃᑎᖃᖅᑎᑕᐅᓗᓂ J.J.-ᒥᑦ. ᖃᐅᔨᓴᖅᑏᑦ ᐊᒥᓱᓂᑦ ᐊᑐᖁᔭᒥᓂᒃ ᓴᖅᑮᓕᓚᐅᖅᑐᑦ ᑲᒪᒋᔭᐅᖁᓪᓗᒋᑦ ᐊᑲᐅᖏᓕᐅᕈᑎᐅᓚᐅᖅᑐᑦ ᑕᑯᓐᓇᖅᑕᐅᔪᑦ.

[61] 20 ᒪᓇᑦᓯᑦ ᐊᓂᒍᕐᒪᑕ ᐃᓪᓗᕈᓯᕐᒨᖅᑕᐅᓚᐅᖅᑎᓪᓗᒍ 3, J.J. ᐊᑦᓱᑲᓪᓚᒃ ᐱᒋᐊᖃᑦᑕᓕᕐᓂᓚᐅᖅᑐᖅ A.B.-ᒥᑦ ᑎᓪᓗᐊᓪᓗᓂᐅᒃ, ᑐᒃᑲᖅᑐᓂᐅᒃ, ᐊᒻᒪ ᒥᓯᕝᕕᒋᕙᑦᑐᓂᐅᒃ ᒪᕐᕈᐊᑎᖅᑐᒍ. ᐊᒥᓱᐊᖅᑎᖅᑐᓂ ᐊᑦᓱᑲᓪᓛᖅᑐᓂ ᑎᓪᓗᐸᑦᑐᓂᐅᒃ ᑮᓇᖓᒍᑦ, A.B. ᐅᕐᕈᓯᒪᑎᓪᓗᒍ ᓄᓇᒥ.

[62] ᑕᒪᒃᑮᒃ A.B. ᐊᒻᒪ J.J. ᐊᑦᓱᑲᓪᓚᒃ ᐋᖓᔮᖅᑐᐃᓐᓇᐅᓚᐅᖅᑑᒃ ᐊᒻᒪ ᐱᐅᓯᖃᖅᑐᑎᒃ ᓇᓗᓇᖅᑐᒻᒪᕆᐅᓗᑎᒃ ᖃᓄᐃᓕᐅᓕᕐᓂᖏᓐᓂᑦ. ᓯᕗᓂᑦᓯᐊᖓᓂ ᐱᒋᐊᖅᑕᐅᓚᐅᖅᑎᓐᓇᒍᑦ, A.B. ᑕᑯᑦᓴᐅᕙᑦᑐᖅ ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᐃᓗᐊᓂ ᐅᕐᕈᔮᖃᑦᑕᑎᓪᓗᒍ, ᐃᓛᓐᓂᒃᑯᑦ ᐊᐳᖅᐸᑦᑐᓂᐅᒃ J.J. A.B. ᐊᓱᐃᓪᓛᒃ "ᐆᑦᑐᕋᖅᑐᓂ" ᑎᓪᓗᐃᖑᐊᓗᓚᐅᖅᑐᖅ J.J.-ᒥᑦ, ᐊᓱᐃᓪᓛᒃ J.J. ᐱᒋᐊᕐᓯᖃᑦᑕᕆᐊᓕᓚᐅᖅᑐᖅ ᑕᐃᒪᐃᓕᔭᐅᒐᒥ.

[63] ᒪᓕᑦᑐᓂᐅᒃ ᐱᓕᒻᒪᓴᕐᓯᒪᔭᓂ, ᐅᐊᑦᓯᐅᔪᖅ ᒪᑐᐃᕐᓯᓚᐅᖏᑦᑐᖅ ᐃᓪᓗᕈᓯᐅᑉ ᒪᑐᐊᓂᑦ ᐅᐸᓪᓗᓂᐅᒃ ᐱᒋᐊᖅᑐᖅᑕᐅᑎᓪᓗᒍ; ᐅᖄᓚᕕᒋᓚᐅᖅᑕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ, ᑕᐃᒃᑯᐊᓕ ᐊᓃᓚᐅᖅᑐᑦ ᑎᒍᔭᐅᒪᕕᒻᒥᒃ ᐅᐸᑦᓯᒪᓪᓗᑎᒃ ᐅᖄᓚᓯᒪᔪᓄᑦ, ᐅᑎᖁᓪᓗᒋᑦ ᐃᑲᔪᕐᓂᐊᕐᒪᑕ. ᒪᕐᕉᒃ (2) ᒪᓇᑦᓯ ᑐᖔᓂ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᑭᓚᐅᖅᑐᑦ ᐃᓪᓗᕈᓯᕐᒧᑦ ᐊᒻᒪ ᓅᑕᐅᓗᓂ J.J. ᑎᒍᔭᐅᓚᐅᖅᑐᖅ ᐊᒻᒪ ᐃᖅᑲᖅᑐᕋᓴᕈᖅᑎᑕᐅᓗᓂ ᐊᑦᓱᑲᓪᓚᒃ ᐱᒋᐊᕐᓯᓯᒪᓂᖓᓂᑦ, ᐊᒻᒪ ᐸᓯᔭᑦᓴᐅᓂᖓᓂᑦ ᖃᐅᔨᔭᐅᓕᖅᑐᒥᓂᖅ ᑭᖑᓂᐊᒍᑦ.

[64] ᐱᒋᐊᖅᑐᖅᑕᐅᓚᐅᖅᑎᓪᓗᒍ, A.B. ᐅᕐᕈᓯᒪᓚᐅᖅᑐᖅ ᓇᓚᓪᓗᓂ ᓴᓂᕋᖓᓪᓗᓂ, ᑮᓇᖓ ᐊᐅᖏᓐᓇᐅᓗᓂ, ᐊᐅᓈᖅᑐᒻᒪᕆᐅᓯᒪᓪᓗᓂ ᓇᑎᕐᒧᑦ, ᑲᑎᓯᒪᔪᒥᑦ ᐃᒥᕐᒧᑦ ᖁᕝᕕᐅᑉ ᐃᓗᐊᓂ ᓯᖅᐸᕿᓯᒪᔪᒧᑦ J.J. ᐅᐊᓴᖅᑎᓪᓗᒍ ᑮᓇᕐᒥᓂᒃ.

[65] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᒫᓐᓇ ᐱᓕᕆᐊᖑᔪᖅ, ᐅᒡᒍᐊᓇᖅᑐᓂ, ᐆᑦᑑᑎᐅᔪᖅ ᐱᒻᒪᕆᐅᔪᓂᑦ ᐅᓗᕆᐊᓇᖅᑐᒦᒍᑎᐅᔪᓐᓇᖅᑐᓂᑦ ᐱᔾᔪᑎᒋᓪᓗᒋᑦ ᐃᓪᓗᕈᓯᑭᑦᓴᕐᓂᐅᕙᑦᑐᖅ ᑎᒍᔭᐅᒪᕕᑦᓴᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᓚᐅᖅᑐᑎᒃ ᐊᑐᕈᓐᓇᖅᑕᖏᓐᓂᑦ ᐊᑐᐃᓐᓇᐅᔪᓂᑦ ᐊᒻᒪ ᓇᓗᓇᐃᕐᓯᓕᖅᑐᒥᓃᑦ J.J. ᐃᓪᓗᕈᓯᕐᒨᖅᑕᐅᓂᖓ 3-ᒧᑦ ᓇᔪᖅᑕᖓᓄᑦ A.B. "ᐱᐅᖏᒃᑲᓗᐊᖅᑐᓂ ᖃᓄᐃᖏᓂᖅᐹᖑᓂᐊᕐᒪᑦ" ᓇᓖᕌᕈᑎᓂᑦ. ᐊᑐᐃᓐᓇᐅᔪᓂᑦ ᐊᒥᕋᕐᓯᔪᒻᒪᕆᐅᓗᑎᒃ, ᐱᔭᕆᐊᑐᔪᖅ ᐸᓯᐅᕆᔭᕆᐊᑦᓴᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᐱᔾᔪᑎᒋᓪᓗᒍ ᐊᑐᓕᓚᐅᖅᑕᖓᑦ. ᐱᔭᕆᐊᑐᒐᓗᐊᖅᑎᓪᓗᒍ, ᐃᓪᓗᕈᓯᕐᒨᖅᑕᐅᓂᒥᓂᖓ ᑕᕝᕗᖓᑦᓴᐃᓐᓇᖅ J.J. ᓇᔪᖅᑕᖓᓄᑦ A.B. ᓴᖅᑮᓚᐅᖅᑐᑦ ᐊᑐᖅᑕᐅᓕᓚᐅᖅᑐᒥᑦ ᐊᑦᓱᑲᓪᓚᐅᔪᖅ ᐱᒋᐊᕐᓯᔪᖃᓕᖅᑐᓂ.

[66] ᐱᒋᐊᕐᓯᔪᕕᓂᖅ, J.J., ᐱᓕᕆᔾᔪᑎᐅᓂᐊᓕᖅᑐᓂ ᐊᑐᖅᑐᒥᓂᐅᓂᖓᓄᑦ ᐱᕋᔭᓐᓂᒃᑯᑦ ᓱᕋᐃᓗᓂ ᒪᓕᒐᕐᒥᑦ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓇᓗᓇᓚᐅᕈᓐᓃᖅᑐᖅ ᑕᕝᕗᖓᑦᓴᐃᓐᓈᖅᑕᐅᓂᖏᒃ J.J. ᐊᒻᒪ A.B. ᐃᓪᓗᕈᓯᕐᒧᑦ ᑎᒍᔭᐅᒪᕕᒻᒧᑦ ᖁᕕᐊᓇᖏᑦᑐᒥᑦ ᓴᖅᑮᓂᐊᕐᓂᖏᓐᓂᑦ.

[67] ᖃᐅᔨᓴᖅᑏᑦ ᐊᑐᓕᖁᔨᔾᔪᑎᓕᐅᓚᐅᖅᑐᑦ ᐅᖃᐅᓯᐅᖁᓪᓗᒋᑦ ᑕᑯᑦᓴᓪᓚᕆᐅᔪᑦ ᐃᓪᓗᕈᓯᑭᑦᓴᕐᓂᐅᕙᑦᑐᖅ ᐱᓪᓗᒍ ᐱᔾᔪᑎᐅᔪᓂᑦ ᑕᑯᔭᐅᓚᐅᖅᑐᓂᑦ ᑭᖕᖓᐃᑦ ᑎᒍᔭᐅᒪᕕᖏᑕ ᐱᓕᕆᕝᕕᖓᓂ.

[68] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᓯᖏᓐᓂᑦ ᐱᒻᒪᕆᐅᔪᓂᑦ ᓱᕋᑦᓯᒪᐅᓚᐅᕐᒪᑕ ᐃᓗᐊᒍᑦ ᓯᓚᑖᒍᑦ ᑭᖕᖓᐃᑦ ᑎᒍᔭᐅᒪᕕᐅᑉ ᐱᓕᕆᕝᕕᖓᑕ, ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᓂᕐᒧᑦ ᐅᓗᕆᐊᓇᕈᓐᓇᖅᑐᓂᑦ ᓴᖅᑮᔪᓐᓇᖅᑐᓂᑦ. ᐃᓚᖏᓐᓂ ᐱᓕᕆᐊᓂ, ᓱᕋᑦᓯᒪᐅᖅᑐᑦ ᓇᓗᓇᐃᖅᑕᐅᓯᒪᔪᑦ ᐊᕐᕌᒍᒐᓴᐅᓕᖅᑐᓂᑦ ᓯᕗᓂᐊᒍᑦ ᐊᒻᒪ ᓱᓕ ᑲᒪᒋᔭᐅᓚᐅᕐᓯᒪᒐᑎᒃ.

[69] ᖃᐅᔨᓴᖅᑏᑦ ᐊᒥᓱᓂᑦ ᐊᑐᓕᖁᔨᔾᔪᑎᓕᐅᓕᓚᐅᖅᑐᑦ ᑲᒪᒋᔭᐅᖁᓪᓗᒋᑦ ᐊᑦᑕᓇᑦᑕᐃᓕᒪᓂᕐᒨᖓᔪᑦ ᓱᕋᑦᓯᒪᐅᖅᑐᑦ ᐱᓪᓗᒋᑦ ᑕᑯᔭᐅᕙᓚᐅᖅᑐᑦ. ᖃᐅᔨᓴᖅᑏᑦ ᐅᖃᐅᓯᖃᓚᐅᕐᒥᔪᑦ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᕿᒥᕐᕈᓂᕐᒥᑦ (IOR) ᐊᑦᑐᐊᔪᓂᑦ ᐃᓗᐊᑕ ᓯᓚᑖᑕ ᖃᓄᐃᓕᖓᓂᖓᓂᑦ ᑭᖕᖓᐃᑦ ᑎᒍᔭᐅᕕᐅᑉ ᐱᓕᕆᕝᕕᖓᑕ. ᕿᒥᕐᕈᓂᐅᔪᖅ ᐊᐅᓚᑕᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᑐᖅᑕᐅᓚᐅᖅᑎᓪᓗᒋᑦ ᖃᓄᐃᒍᑎᐅᓚᐅᖅᑐᑦ ᐱᓕᕆᐊᖑᔪᒥ, ᐊᒻᒪ ᐊᒥᓱᓂᑦ ᐊᑐᓕᖁᔨᔾᔪᑎᓂᑦ ᓴᖅᑮᓕᓚᐅᖅᑐᑦ, ᖃᐅᔨᓴᖅᑎᓄᑦ ᐅᖃᐅᓯᐅᓚᐅᖅᑐᓂᑦ ᐃᓘᓐᓇᖏᓐᓂᑦ ᐱᒋᐊᖅᑎᑦᓯᖁᔨᓪᓗᑎᒃ.

[70] ᐱᔾᔪᑎᐅᓗᑎᒃ ᖃᓄᑎᒋ ᐊᓯᔾᔨᐅᑎᐅᒋᐊᓕᒃ ᐱᓪᓗᒋᑦ, ᖃᐅᔨᓴᖅᑏᑦ ᐊᑐᖁᔨᔪᑦ ᐅᑯᐊ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᖁᔭᐅᓗᑎᒃ ᑭᖑᕝᕖᓂᖏᓐᓂᑦ ᐃᓘᓐᓇᖓᓂᑦ ᑭᖕᖓᐃᑦ ᑎᒍᔭᐅᒪᕕᖓᓐᓂᑦ ᐃᓪᓗᒥᑦ.

ᖃᐅᔨᔭᐅᔪᖅ #14: ᐃᓂᖃᑦᑎᐊᖏᓐᓂᖅ ᑎᒍᔭᐅᒪᔪᓄᑦ ᓴᖅᑮᓯᒪᓚᐅᖅᑐᖅ ᐊᑦᑕᓇᖅᑐᒥᑦ ᐊᕙᑎᖃᓕᕐᓂᖏᓐᓂᑦ ᑎᒍᔭᐅᒪᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ, ᐊᒻᒪ ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑏᑦ.

ᖃᐅᔨᔭᐅᔪᖅ #15: ᐱᓪᓗᒍ J.J. ᓴᓗᒻᒪᓴᖅᑕᐅᓚᐅᖏᓐᓂᖓ ᓯᕗᓂᐊᒍᑦ ᐃᓪᓗᕈᓯᕐᒨᖅᑕᐅᓚᐅᖏᓐᓂᖓᓂ ᑎᒍᔭᐅᒪᕕᒻᒥ ᐱᓗᖅᑯᑎᖃᓗᐊᓚᐅᕐᒥᔪᖅ ᐃᒪᖃᖏᓐᓂᖓᓂᑦ ᐃᓪᓗᕈᓯᐅᑉ ᐱᓪᓗᒍ ᓱᕋᑦᓯᒪᔪᖅ ᐅᐊᓴᕐᕕᒃ, ᐊᑐᖅᑕᐅᓕᖅᑐᓂ ᓈᒻᒪᖏᑦᑐᒻᒪᕆᐅᔪᖅ ᖃᓄᐃᓕᖓᒍᑎᐅᓕᓚᐅᖅᑐᖅ ᑎᒍᔭᐅᒪᔪᖅ ᐊᑐᓕᖅᑭᖅᑖᓚᐅᕐᓂᖓ ᐃᒥᕐᒥᒃ ᖁᕝᕕᒻᒥᒃ ᐊᑲᐅᓯᔾᔪᑎᒋᓇᓱᐊᖅᑐᓂᐅᒃ ᐊᑲᐅᔪᓐᓃᕈᑎᒥᓂᒃ. ᑕᒪᐅᓇ ᓴᖅᑮᔪᖅ ᐱᒻᒪᕆᐅᔪᓂᑦ ᐃᓗᓯᒃᑯᑦ ᐊᒻᒪ ᐊᑦᑕᓇᔾᔭᐃᕐᓯᒪᓂᒃᑯᑦ ᐃᓱᒫᓘᑎᐅᔪᓂᑦ, ᐊᒻᒪ ᐃᑲᔫᑎᖃᖅᑐᓂ ᐊᖏᓪᓕᑎᒋᐊᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ A.B.-ᒧᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᓗᓂ ᓇᔪᖅᑕᖓᓄᑦ J.J.

ᖃᐅᔨᔭᐅᔪᖅ #16: ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ, J.J. ᐱᑎᑕᐅᒋᐊᓕᒥᓂᖅ ᐃᒥᕐᒥᒃ ᓴᓗᒻᒪᕐᓴᐃᑎᑦᓴᒥᑦ, ᐱᓗᐊᖅᑐᒥ ᓇᓗᓇᖅᑎᓐᓇᒍ ᐊᑲᐅᔪᓐᓃᕐᓯᒪᓂᖓ.

ᖃᐅᔨᔭᐅᔪᖅ #17: ᓈᒻᒪᓚᐅᖏᑦᑐᖅ ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᐃᒪᖃᓚᐅᖏᓐᓂᖓᓄᑦ ᐊᒻᒪ ᐃᓂᖃᖅᑎᑕᐅᓂᖓ ᐊᑲᐅᖏᑦᑐᕖᖔᓗᒻᒥ.

ᖃᐅᔨᔭᐅᔪᖅ #18: ᓈᒻᒪᓚᐅᖏᑦᑐᖅ ᐅᐊᓴᕐᕕᖓ ᐃᓪᓗᕈᓯᐅᑉ 3 ᐃᑉᐱᒋᔭᐅᓚᐅᖏᓐᓂᖓ ᐱᔪᓐᓇᑎᓐᓇᒍ, ᐊᑯᓂᐅᑎᒋᔪᖅ ᒪᕐᕉᒻᒪᕇᓐᓂᒃ (2) ᐊᕐᕌᒎᓐᓂᒃ.

ᖃᐅᔨᔭᐅᔪᖅ #19: ᐅᐱᓐᓇᕋᓂᐅᒐᓗᐊᖅ ᓇᓗᓇᓚᐅᖏᒻᒪᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᒻᒪᑎᒃ J.J. ᐊᒻᒪ A.B. ᓴᖅᑭᖅᑐᖃᓚᐅᕋᒥ ᖁᕕᐊᓇᖏᑦᑐᒥᑦ. ᐃᓪᓗᕈᓯᕐᒨᖅᑕᐅᓂᖏᒃ J.J. ᐊᒻᒪ A.B. ᐊᑕᐅᑦᑎᒃᑯᑦ ᓴᖅᑮᓚᐅᖅᑐᑦ ᐊᑦᓱᐊᓘᖅᑐᒥᑦ ᐋᓐᓂᕐᓯᔪᖃᓕᖅᑐᓂ.  

ᖃᐅᔨᔭᐅᔪᖅ #20: J.J. ᐊᒻᒪ A.B. ᑕᕝᕗᖓᑦᓴᐃᓐᓈᖅᑕᐅᔪᒪᓕᕐᓂᖏᒃ ᐃᓪᓗᕈᓯᕐᒧᑦ ᑐᕌᒐᓪᓗᐊᒃᑯᑦ ᖃᓄᐃᒍᑎᐅᔪᖅ ᐊᒥᒐᕐᓯᕙᓐᓂᖏᓐᓄᑦ ᓈᒻᒪᑦᑐᓂᑦ ᓇᓖᕌᕈᑎᑦᓴᓂᑦ ᐊᑐᕈᓐᓇᖅᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᔾᔪᑎᒋᓪᓗᒍ ᐊᒥᒐᕐᓯᓂᐅᕙᑦᑐᖅ ᐃᓂᑦᓴᐅᔪᓂᑦ ᑎᒍᔭᐅᒪᔪᓄᑦ.

ᖃᐅᔨᔭᐅᔪᖅ #21: ᑕᑯᑦᓴᓪᓚᕆᐅᔪᓂᑦ ᐱᐅᖏᑦᑐᑕᖃᐅᓚᐅᖅᑐᖅ ᐃᓗᐊᒍᑦ ᑭᖕᖓᐃᑦ ᑎᒍᔭᐅᒪᕕᐅᑉ, ᓴᖅᑮᓯᒪᓕᖅᑐᑎᒃ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ. ᓈᒻᒪᓚᐅᖏᑦᑐᖅ ᑎᒍᔭᐅᒪᕕᐅᔪᖅ ᑕᐃᒪᐃᑦᑑᑎᓪᓗᒍ ᐃᓗᐊ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓄᒋᐊᕝᕕᐅᓗᑎᒃ ᐃᑉᐱᒍᓱᑦᑎᐅᓚᐅᖅᑐᑦ ᐱᔾᔪᑎᒋᓪᓗᒍ ᑎᒍᔭᐅᒪᕕᐅᑉ ᐊᒻᒪ ᐃᓪᓗᕈᓯᖃᕐᕕᐅᑉ ᑎᒍᔭᐅᒪᕕᓐᓂᑦ ᐃᓗᐊ ᖃᓄᐃᑦᑑᓂᖓᓄᑦ ᓴᖅᑮᓯᒪᖏᓪᓗᑎᒃ ᓈᒻᒪᖏᑦᑐᓂᑦ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᒍᔭᐅᒪᔪᓄᑦ.

ᐊᑐᖁᔭᖅ #4: ᑭᖕᖓᐃᑦ ᑎᒍᔭᐅᒪᕕᖓ ᐊᖏᓪᓕᒋᐊᖅᑕᐅᔭᕆᐊᓕᒃ ᐃᓚᔭᐅᖁᓪᓗᒋᑦ ᐃᓪᓗᕈᓯᐅᔪᑦ ᑎᒍᔭᐅᒪᔪᓄᑦ ᐊᑐᖅᑕᐅᕙᑦᑐᑦ ᖁᓪᓗᓄᑦ (10) ᐃᓪᓗᕈᓯᖃᕈᓐᓇᓕᕐᓗᓂ.

ᐊᑐᖁᔭᖅ #5: ᑳᓐᔅᑕᐳᓪ ᑭᐅᓕᖕ ᐊᒻᒪ ᓵᔨᓐ ᒋᐅᓪ ᐱᑎᑕᐅᔪᐃᓐᓇᐅᒋᐊᓖᑦ ᐊᐅᓚᑦᓯᔾᔪᑎᒍᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᕐᓴᐃᔭᕆᐊᖃᕐᓂᐅᔪᖅ ᑎᒍᔭᐅᒪᔪᓂᑦ.

ᐊᑐᖁᔭᖅ #6: ᐅᐊᓴᕐᕕᖏᑦ ᐊᒻᒪ ᖁᕝᕕᖏᑦ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐃᓪᓗᕈᓯᖏᓐᓂ ᓴᓇᔭᐅᒋᐊᓖᑦ ᐊᒻᒪ ᒪᑭᒪᑎᑕᐅᕙᓪᓗᑎᒃ ᒪᓕᑦᑕᐅᓗᑎᒃ ᐃᓗᓕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᑕ.

ᐊᑐᖁᔭᖅ #7: ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᑭᖕᖓᐃᑦ ᑎᒍᔭᐅᒪᕕᖏᓐᓂ ᓅᑕᐅᒋᐊᓕᒃ ᐅᐸᒐᕐᓂᓂᕐᓴᒧᑦ ᐊᒻᒪ ᐃᒻᒪᑦᑕᐅᕙᓪᓗᓂ ᖃᐅᑕᒫᑦ ᐃᒻᒪᒋᐊᖃᓕᕋᐃᑉᐸᑦ.

ᐊᑐᖁᔭᖅ #8: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᒋᐊᖅᑎᑦᓯᔭᕆᐊᓖᑦ ᐃᓘᓐᓇᖏᓐᓂᑦ ᐊᑐᖁᔭᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᔨᐅᑉ ᐃᓱᒪᒋᔭᖏᓐᓂ ᐃᓱᒋᔭᖏᓐᓂ ᐅᓂᒃᑳᓕᐊᖓᑕ ᐊᑦᑐᐊᓂᕆᔭᖏᑦ ᐃᓗᐊᑕ ᖃᓄᐃᑦᑑᓂᖓᓄᑦ ᑭᖕᖓᐃᑦ ᑎᒍᔭᐅᒪᕕᖓᑕ.

ᐊᑐᖁᔭᖅ #9: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᕆᐊᓖᑦ ᑭᖑᕝᕕᖅᑕᐅᓗᓂ ᑭᖕᖓᐃᑦ ᑎᒍᔭᐅᒪᕕᖓᑕ ᐃᓪᓗᑦᑕᖓ.

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖓ

[71] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᑦ ᐃᓘᓐᓇᖏᓐᓂᑦ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ, ᑭᓯᐊᓂ ᐊᑕᐅᓯᕐᒥᑦ (1) ᖃᐅᔨᒪᖁᔨᓂᕐᒥᑦ ᓇᓗᓇᓚᐅᖏᒻᒪᑦ ᓯᕗᓂᐊᒍᑦ ᐃᓪᓗᕈᓯᕐᒧᑦ ᐊᑕᐅᑦᓯᒨᖅᑕᐅᓂᖏᒃ J.J. ᐊᒻᒪ A.B. ᓴᖅᑮᔪᓐᓇᓚᐅᕐᒪᑦ ᐱᐅᖏᑦᑐᒥᑦ ᐊᒻᒪ ᑕᒪᓐᓇ ᐊᕙᑎᓕᐅᓚᐅᕐᒪᑦ ᐊᑦᓱᑲᓪᓚᐅᔪᖅ ᐱᒋᐊᕐᓯᔪᖃᓕᖅᑐᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐃᓱᒪᓚᐅᖅᑐᑦ ᑕᒪᓐᓇ ᐃᓱᒪᒋᔭᐅᓕᖅᑐᑦ ᑎᑭᔭᐅᔪᓐᓇᓂᕐᒪᑦ ᑭᓯᐊᓂ ᐃᑲᔫᑎᖃᖅᑐᑎᒃ ᑕᒪᑦᓱᒥᖓ ᑭᖑᓂᐊᒍᑦ ᑭᓯᐊᓂ ᐃᓱᒪᒋᔭᐅᑦᑕᓯᓐᓇᓕᖅᑐᒥᓂᕐᒥᒃ, ᐊᒻᒪ ᖃᐅᔨᔭᐅᔪᑦ ᓈᒻᒪᑦᑐᒥᑦ ᐃᓱᒪᑦᓴᕐᓯᐅᕈᑎᖃᕐᓂᖏᒻᒪᑕ ᓇᓖᕌᕈᑎᐅᔪᓂᑦ ᐊᑐᐃᓐᓇᐅᓚᐅᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᒻᒪ ᑐᑭᓯᐅᒪᔭᖏᑦ ᐱᔾᔪᑎᒋᓪᓗᒋᑦ ᖃᐅᔨᒪᔭᓂ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᖃᐅᔨᒪᖁᔨᓚᐅᖅᑐᖅ ᐋᖓᔮᖅᑐᑦ ᑎᒍᔭᐅᒪᕙᒻᒪᑕ ᐊᑕᐅᑦᓯᒃᑯᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓪᓗᕈᓯᖏᓐᓂ ᑎᒍᔭᐅᒪᕕᓐᓂ ᓇᒥᑐᐃᓐᓇᖅ ᑲᓇᑕᒥ, ᐊᒥᓱᑲᓪᓚᐅᓗᑎᒃ ᖃᓄᐃᓕᐅᖃᑦᑕᐅᑎᓚᐅᕐᓯᒪᒐᑎᒃ ᑲᑎᒪᒐᓗᐊᕋᒥᒃ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᕙᓂ ᐱᓕᕆᐊᖑᔪᒥ ᖃᐅᔨᒪᓚᐅᖏᑦᑐᑦ ᖃᓄᐃᓕᐅᕈᑎᖃᑦᑕᕐᓂᖏᓐᓂᑦ A.B. ᐊᒻᒪ J.J.

[72] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᒃᑲᓐᓂᓚᐅᖅᑐᖅ, ᖁᓕᐅᓐᓂᕋᓗᐊᖅᐸᑕ (10) ᐃᓪᓗᕈᓰᑦ ᑎᒍᔭᐅᒪᕖᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ ᑕᐃᑲᓂ ᐅᓐᓅᔪᒥ ᒪᓕᑦᑐᒋᑦ ᐊᑐᖅᑕᐅᖁᔭᐅᓯᒪᔪᑦ ᖃᐅᔨᓴᖅᑎᓄᑦ, ᐊᑕᐅᓯᐅᖏᑦᑐᒥᑦ ᑭᓯᐊᓂ ᐃᓄᖃᕆᐊᖃᕋᔭᕐᓂᕐᒥᔪᑦ ᐃᓪᓗᕈᓯᕐᓂ ᑎᒍᔭᐅᒪᕕᓐᓂ ᐅᓐᓅᔪᒥᑦ ᐱᔭᑦᓴᓕᒻᒪᕆᐅᑎᓪᓗᒋᑦ. ᖃᐅᔨᒪᖁᔨᓚᐅᖅᑐᖅ ᖃᖓᑐᐃᓐᓇᒃᑯᑦ ᐱᑦᑎᐊᖏᑦᑐᖃᑐᐃᓐᓇᕆᐊᖃᖅᐸᓐᓂᖓᓂᑦ ᑕᒪᒃᑯᐊ ᐊᑐᖅᑕᐅᑎᓪᓗᒋᑦ ᖃᓄᐃᓕᖓᒍᑎᐅᔪᑦ, ᑭᒃᑯᑐᐃᓐᓇᐃᑦ ᐋᖓᔮᕋᓗᐊᖅᑎᓪᓗᒋᑦ ᐅᕝᕙᓘᓐᓃᑦ ᐋᖓᔮᖏᒃᑲᓗᐊᖅᑎᓪᓗᒋᑦ. ᐋᖓᔮᕐᓂᐅᔪᖅ ᐊᒻᒪ ᐋᖓᔮᕐᓇᖅᑐᓂᑦ ᐊᑐᕐᓂᐅᔪᖅ ᐱᔾᔪᑎᐅᒻᒪᑕ ᐃᓱᒪᒋᔭᐅᖏᓐᓇᐸᑦᑐᑦ ᓈᒻᒪᓂᖅᐹᒥᑦ ᐋᖅᑮᓇᓱᐊᖅᑎᓪᓗᒋᑦ ᖃᓄᐃᓕᐅᕈᑎᑦᓴᒥᑦ ᐊᒻᒪ ᐱᓗᐊᔾᔭᐃᕐᓯᒪᖁᓪᓗᒍ ᐅᓗᕆᐊᓇᕐᓂᖓ ᐱᒋᐊᕐᓯᔪᖃᕐᓂᐊᕆᐊᖓ ᐊᔪᕐᓇᖏᓐᓂᖏᒍᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᐅᓯᖃᓚᐅᖅᑐᖅ ᑕᒪᓐᓇ ᑕᑯᓐᓇᖅᑐᒍ, ᒪᓕᑦᑐᒋᑦ ᖃᓄᐃᓕᖓᒍᑎᐅᔪᑦ, ᓈᒻᒪᖏᒻᒪᑕ ᓇᓗᓇᐃᔭᐃᑏᑦ ᐃᓱᒪᒋᓂᐊᕐᓗᒍ ᐱᒋᐊᕐᓯᓂᐅᓚᐅᖅᑐᖅ ᓈᒻᒪᑐᒃᑯᑦ ᓇᓗᓇᓚᐅᖏᓐᓂᖓᓄᑦ ᐊᑐᖅᑕᐅᓂᐊᕆᐊᖓ.

[73] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐃᑲᔪᕐᓱᐃᓚᐅᖅᑐᖅ ᐃᓘᓐᓇᖏᓐᓂᑦ ᖃᐅᔨᓴᖅᑏᑦ ᐊᑐᖁᔭᖏᓐᓂᑦ. ᐱᔾᔪᑎᒋᓪᓗᒍ ᐊᑐᖁᔭᐅᔪᖅ ᐊᖏᓪᓕᒋᐊᖁᓪᓗᒍ ᑭᖕᖓᐃᑦ ᑎᒍᔭᐅᒪᕕᖓᑕ ᐃᓪᓗᖓ ᐊᒻᒪ ᐃᓚᔭᐅᓗᑎᒃ ᐃᓪᓗᕈᓰᑦ ᑎᒍᓯᓯᒪᕕᑦᓴᑦ ᖁᓕᓄᑦ (10) ᐃᓪᓗᕈᓯᕐᓄᑦ, ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᐃᑲᔪᕐᓱᐃᓂᕋᖅᑐᓂ ᐃᓚᖓᓂ. ᐅᖃᕆᐊᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ "V" ᐱᓕᕆᕝᕕᖓᑦ (ᓄᓇᕗᑦ) ᑐᑭᓯᒋᐊᕐᕕᐅᓚᐅᕐᒪᑕ ᐊᒻᒪ, ᔪᓚᐃᒥ 2022, ᐊᐅᓚᑎᑦᓯᓕᓚᐅᖅᑐᑦ ᐃᓪᓗᕈᓯᕐᓂᑦ ᑎᒍᔭᐅᒪᕕᑦᓴᓂᑦ ᓇᓖᕌᕈᑎᑦᓴᓂᑦ ᖃᐅᔨᓴᕐᓂᕐᒥᑦ ᖃᓄᐃᑦᑐᓂᑦ ᐃᓪᓗᕈᓯᕐᓂ ᐱᑕᖃᕆᐊᖃᕐᒪᖔᑕ ᑎᒍᔭᐅᒪᕕᒻᒥ. ᖃᐅᔨᓴᓚᐅᖅᑐᑎᒃ ᐊᔾᔨᒌᖏᑦᑐᓂᑦ ᓇᓖᕌᕈᑎᑦᓴᓂᑦ, "V" ᐱᓕᕆᕝᕕᒃ ᐃᓱᒪᓕᓚᐅᖅᑐᑦ ᑭᖕᖓᐃᑦ ᑎᒍᔭᐅᒪᕕᖓ ᐃᓘᓐᓇᖓᒍᑦ ᑭᖑᕝᕕᖅᑕᐅᒋᐊᖃᕐᓂᖓᓂᑦ, ᐊᒻᒪ ᓄᑖᕐᒥ ᑎᒍᔭᐅᒪᕕᒻᒥ ᐃᓪᓗᒥ ᑎᓴᒪᐅᔪᖅᑐᓂᑦ (8) ᐃᓪᓗᕈᓯᖃᓕᕐᓗᓂ ᑎᒍᔭᐅᒪᕕᑦᓴᓂᑦ.

[74] ᑕᐃᒪᐃᒻᒪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐃᑲᔪᕐᓱᐃᓚᐅᖅᑐᖅ ᖃᐅᔨᓴᖅᑏᑦ ᐊᑐᖁᔭᖏᓐᓂᑦ ᐃᓱᒪᑦᓴᕐᓯᐅᓂᒃᑯᑦ ᑭᖑᕝᕕᖅᑕᐅᓂᖓᓄᑦ ᑭᖕᖓᐃᑦ ᑎᒍᔭᐅᒪᕕᖓᑦ ᐃᓘᓐᓇᓯᐊᒻᒪᕆᐊᓂᑦ. ᐅᖃᓚᐅᖅᑐᖅ ᓄᑖᒥ ᑎᒍᔭᐅᒪᕕᒻᒥ ᑎᓴᒪᐅᔪᖅᑐᓂᑦ (8) ᐃᓪᓗᕈᓯᖃᕋᔭᖅᑐᖅ ᑎᒍᔭᐅᒪᕕᑦᓴᓂᑦ.

ᖃᐅᔨᓴᖅᑏᑦ ᖃᐅᔨᓴᐅᑎᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑭᐅᔾᔪᑎᖏᓐᓂᑦ

[75] ᓯᕗᓪᓕᕐᒥ, ᖃᐅᔨᓴᖅᑏᑦ ᑐᖕᖓᓱᑦᑎᑦᓯᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑕ ᐃᓱᒪᓕᐅᕆᔾᔪᑎᖓᓐᓂᑦ ᑭᖑᕝᕕᖁᓪᓗᒍ ᑭᖕᖓᐃᑦ ᑎᒍᔭᐅᒪᕕᖓ ᐃᓘᓐᓇᖓᒍᑦ, ᐊᒻᒪ ᐃᓪᓗᕈᓯᖏᑦ ᑎᒍᔭᐅᒪᕕᖏᑦ ᐊᒥᓲᓂᕐᓴᐅᓕᕐᓗᑎᒃ ᓄᑖᒥ ᑎᒍᔭᐅᒪᕕᑦᓴᒥ. ᑕᒪᓐᓇ ᐃᓱᒪᓕᐅᕆᔾᔪᑎᐅᔪᖅ ᐱᔾᔪᑎᖃᖅᑐᖅ ᖃᐅᔨᓴᖅᑏᑦ ᖃᐅᔨᓚᐅᖅᑕᖏᓐᓄᑦ ᐊᒥᓱᓄᑦ ᐊᒻᒪ ᐊᑐᖁᔭᖏᓐᓂᑦ ᐱᔾᔪᑎᒋᓪᓗᒍ ᐱᐅᖏᑐᒻᒪᕆᐅᔪᖅ ᖃᓄᐃᓕᖓᓂᕆᔭᖓ ᑭᖕᖓᐃᑦ ᑎᒍᔭᐅᒪᕕᖓᑕ. ᑎᒍᔭᐅᒪᕕᒃ ᑐᖔᓃᑦᑐᒻᒪᕆᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᔾᔪᓯᖏᑎᒍᑦ ᐊᑐᖅᐸᑦᑕᖏᓐᓂᑦ ᐊᒻᒪ ᓴᖅᑮᓯᒪᓗᑎᒃ ᐊᑦᑕᓇᑦᑕᐃᓕᒪᐅᑎᓂᑦ ᐃᓱᒫᓘᑎᐅᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᒻᒪ ᑎᒍᔭᐅᒪᔪᓄᑦ. ᐱᒻᒪᕆᐅᔪᖅ ᓯᕗᒧᐊᒋᐊᕈᑎᐅᓗᓂ ᐋᖅᑭᑦᑕᐅᔪᓂᑦ ᖃᓄᐃᓕᐅᕈᑎᐅᓂᐊᓕᕐᓂᖏᓐᓄᑦ, ᐱᓗᐊᖅᑐᒥ ᐃᓚᖏᑦ ᐊᑲᐅᖏᓕᐅᕈᑎᐅᓯᒪᔪᑦ ᓇᓗᓇᐃᖅᑕᐅᓯᒪᓕᕐᓂᕐᒪᑕ ᐊᕐᕌᒍᒐᓴᓄᑦ.

[76] ᒪᓕᑦᑐᒋᑦ ᐅᖃᐅᓯᐅᓚᐅᖅᑐᑦ ᖃᐅᔨᓴᖅᑏᑦ ᐅᓂᒃᑳᓕᐊᖏᓐᓂ, ᐃᓂᑦᓴᑭᓐᓂᐅᔪᖅ ᑎᒍᔭᐅᔪᓄᑦ ᑎᒍᔭᐅᒪᕕᓐᓂ ᐊᑐᓚᕿᔾᔪᑎᐅᓚᐅᖅᑐᑦ ᓈᒻᒪᑦᑐᓂᑦ ᓇᓖᕌᕈᑎᑦᓴᖃᓗᐊᕋᑎᒃ ᐊᑐᕈᓐᓇᖅᑕᒥᓂᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ. ᐃᓱᒪᓕᐅᕈᑎᐅᓚᐅᖅᑐᖅ J.J. ᐊᒻᒪ A.B. ᑕᕝᕗᖓᑦᓴᐃᓐᓈᖅᑕᐅᓂᒥᓂᖏᒃ ᐃᓪᓗᕈᓯᕐᒧᑦ ᓴᖅᑭᓚᕿᓚᐅᖅᑐᖅ ᑕᒪᓐᓇ ᐊᒥᒐᕐᓯᓂᐅᕙᑦᑐᖅ ᐊᑐᖅᑕᐅᔪᓐᓇᖅᑐᓂᑦ ᐱᔾᔪᑎᐅᓗᓂ. ᖃᐅᔨᓴᖅᑏᑦ ᖃᐅᔨᕙᓪᓕᐊᑐᐃᓐᓇᑎᓪᓗᒋᑦ ᐱᐅᖏᑦᑐᒥᑦ ᓴᖅᑭᖅᑐᖃᕐᓂᐅᓴᑐᐃᓐᓇᓂᕐᒪᑦ ᓇᓗᓇᕋᓂ ᑕᕝᕗᖓᑦᓴᐃᓐᓈᖅᑕᐅᒻᒪᑎᒃ J.J. ᐃᓪᓗᕈᓯᕐᒧᑦ ᑎᒍᔭᐅᒪᕕᒻᒧᑦ ᓇᔪᖅᑕᖓᓄᑦ A.B., ᐊᒻᒪ ᑕᒪᐅᓇ ᐋᖅᑭᑦᑕᐅᓂᒥᓂᖓ ᐱᓪᓗᒍ ᐊᕙᑎᓕᐅᓕᖅᑐᒥᓃᑦ ᐱᒋᐊᕐᓯᔪᖃᖅᑐᓂ, ᑕᒪᓐᓇ ᖃᐅᔨᔭᐅᔪᖅ ᐲᔭᐃᔾᔪᑎᐅᖏᑦᑐᖅ ᐃᓕᑕᕆᔭᐅᔪᒥᑦ, ᐅᖃᐅᓯᐅᒃᑲᓐᓂᖅᑐᒥᑦ ᖃᐅᔨᓴᖅᑏᑦ ᐅᓂᒃᑳᓕᐊᖏᓐᓂ, ᐱᔭᕆᐊᑐᔪᒥᑦ ᐃᓱᒪᑦᓴᕐᓯᐅᕈᑎᐅᔪᕕᓂᕐᒥᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᓕᖅᑕᒥᓂᖓᓂᑦ ᐱᔾᔪᑎᐅᓗᑎᒃ ᐱᓕᕆᔾᔪᑎᓂᑦ ᐃᑲᔫᑎᑦᓴᓂᑦ ᐱᑕᖃᖅᐸᖏᓐᓂᖏᓐᓂᑦ ᐊᒻᒪ ᐃᓂᑦᓴᑭᓐᓂᕐᒥᑦ ᐃᓄᖕᓄᑦ.

[77] ᖃᐅᔨᓴᖅᑏᑦ ᖃᐅᔨᒪᓂᕋᖅᑐᑦ ᓯᕗᓂᐊᒍᑦ A.B. ᐊᒻᒪ J.J. ᖃᓄᐃᓕᐅᖃᑦᑕᐅᑎᓚᐅᕐᓯᒪᖏᒻᒪᑎᒃ ᖃᖓᑐᐃᓐᓇᒃᑯᑦ ᖃᐅᔨᒪᔭᐅᔪᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ. ᑭᓯᐊᓂᓕ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᒪᓚᐅᖅᑐᑦ ᖃᓄᐃᓕᖓᓂᖏᓐᓂᑦ ᐊᖑᑏᑦ, ᐋᖓᔮᓪᓗᐊᑐᒡᒍᑎᐅᓗᑎᒃ ᐊᒻᒪ ᓇᓗᓇᖅᑐᑎᒃ ᖃᓄᐃᓕᐅᕐᓂᐊᓕᕐᓂᖏᓐᓂᑦ, ᐊᒻᒪᑦᑕᐅᖅ ᐃᓱᒪᒋᓪᓗᒋᑦ ᓂᖕᖓᐅᒪᒐᔪᓐᓂᖏᓐᓂᑦ ᐊᒻᒪ ᑎᒥᒃᑯᑦ ᓂᖕᖓᐅᑎᖃᑎᖃᕐᓯᒪᓂᖓᓂᑦ ᑕᐃᑲᓂᑦᓴᐃᓐᓇᖅ ᐅᓐᓅᔪᒥ. ᐱᓗᐊᖅᑐᒥ, J.J. ᑎᒍᔭᐅᔪᕕᓂᖅ ᐊᑦᓱᑲᓪᓚᒃ ᐱᒋᐊᕐᓯᓯᒪᓂᖓᓄᑦ, ᐊᒻᒪ ᓂᖕᖓᐅᒪᔪᒻᒪᕆᐅᓗᓂ ᐸᓖᓯᒃᑯᓐᓄᑦ ᐸᐸᒧᑦ ᑎᒻᒥᑳᕐᕕᐅᒋᐊᖃᒻᒪᕆᓕᖅᑐᓂ. ᐅᖃᐅᓯᐅᓚᐅᖅᑐᖅ ᖁᓄᔪᕕᓂᐅᓂᖓᓄᑦ ᐊᒻᒪ ᓄᕚᕿᓪᓗᓂ ᖃᓂᖓ. A.B. ᖃᓄᑎᒋ ᐋᖓᔮᕐᓂᕆᓚᐅᖅᑕᖓ ᐊᑦᓱᑲᓪᓚᐅᓚᕐᒥᔪᖅ. ᐅᕐᕈᔮᓚᐅᖅᑐᖅ ᓇᖏᕈᓐᓇᑦᓯᐊᕋᓂ, ᓇᓗᓇᖅᑐᓂ ᖃᓄᐃᓕᐅᕐᓂᐊᓕᕐᓂᖓᓂᑦ, ᐊᒻᒪ ᐅᕐᕈᔮᑲᑕᑦᑐᓂ ᐃᓪᓗᕈᓯᐅᑉ ᐃᓗᐊᓂ. ᑕᒪᒃᑯᓄᖓᓕᒫᕌᓗᒃ ᐱᔾᔪᑎᐅᔪᓄᑦ, ᐊᒻᒪ ᐃᓕᑕᕆᔭᐅᓯᒪᒐᓗᐊᖅᑎᓪᓗᒍ ᑕᒪᓐᓇ ᐊᑐᖅᑕᐅᓚᕿᓐᓂᕐᒪᑦ ᐱᔾᔪᑎᒋᓪᓗᒋᑦ ᖃᓄᐃᓕᖓᓂᕆᓂᕋᓚᐅᖅᑕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᓚᐅᖅᑕᖏᑦ, ᖃᐅᔨᓴᖅᑏᑦ ᐅᖃᐅᓯᖃᒃᑲᓂᖅᑐᑦ ᖃᐅᔨᔭᖏᑦ ᐱᔾᔪᑎᒋᓪᓗᒍ ᓇᓗᓇᓚᐅᖏᓐᓂᖓᓂᑦ ᐱᐅᖏᑦᑐᒥᑦ ᓴᖅᑭᖅᑐᖃᕈᓇᕐᓂᐅᔪᒥᑦ ᐊᒻᒪ ᐊᕙᑎᒥᑦ ᐊᑐᖅᑕᐅᓕᓚᐅᖅᑐᒥᑦ ᒪᕐᕉᔫᒃ (2) ᐊᖑᑏᒃ ᑕᕝᕗᖓᑦᓴᐃᓈᖅᑕᐅᓂᒥᓂᖏᒃ ᐃᓪᓗᕈᓯᕐᒧᑦ ᑎᒍᔭᐅᒪᕕᒻᒧᑦ.

ᖃᓄᐃᓕᖓᓂᖓ A.B. ᐃᓪᓗᕈᓯᖓᑕ ᑎᒍᔭᐅᒪᕕᖓᑕ ᐱᒋᐊᕐᓯᔪᖃᓚᐅᖅᑎᓪᓗᒍ

[78] ᐊᐅᓚᔫᖅ ᐊᔾᔨᓕᐅᖅᑕᐅᓯᒪᔪᖅ ᐃᓪᓗᕈᓯᕐᒥᑦ ᑎᒍᔭᐅᒪᕕᒻᒥᑦ ᑕᑯᑦᓴᐅᑎᑦᓯᔪᖅ ᓇᑎᖓ ᐃᓪᓗᕈᓯᐅᑉ 3 ᐊᐅᖏᓐᓇᐅᖏᓐᓇᓚᐅᕐᒪᑦ ᐊᒻᒪ ᐃᒪᐃᓐᓇᐅᓗᓂ (ᐊᒻᒪ ᑭᖑᓂᐊᒍᑦ, ᐃᑎᕈᖅᑕᖃᖅᑐᓂ ᐊᒻᒪ ᒥᕆᐊᒥᓂᕐᒥᒃ) ᖁᓛᓃᒌᕐᓯᒪᓕᖅᑎᓪᓗᒍ ᐅᓐᓄᐊᒃᑯᑦ (ᐋᓐᓂᑎᖅᑕᐅᑎᓪᓗᒍ A.B.) ᐅᓪᓛᒧᓄᑦ 10:15-ᒧᓄᑦ, A.B. ᓅᑕᐅᓇᓱᐊᕐᓂᖓᓄᑦ ᐃᓪᓗᕈᓯᕐᒥᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓴᓗᒻᒪᕐᓴᐃᓕᖅᑐᑎᒃ ᓇᑎᕐᒥᒃ. ᖃᐅᔨᓴᖅᑏᑦ ᖃᐅᔨᒪᓂᕋᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᖅᑲᓚᐅᓚᐅᖏᒻᒪᑕ ᐱᔭᑦᓴᓕᕆᓪᓗᑎᒃ ᑕᐃᒃᑲᓂ ᐅᓐᓅᔪᒥ, ᑭᓯᐊᓂ ᖃᐅᔨᒪᖁᔨᓚᐅᖅᑐᑦ ᐃᓗᓯᖏᑦ ᐊᒻᒪ ᐊᑦᑕᓇᑦᑕᐃᓕᒪᓂᖏᑦ ᐃᓱᒫᓘᑎᐅᔪᓂᑦ ᕿᒪᑦᑕᐅᑐᐃᓐᓇᕐᓯᒪᓂᖓᓄᑦ ᓇᑎᖓ ᑕᐃᒪᐃᓕᖓᑎᓪᓗᒍ ᑎᒍᔭᐅᒪᔪᖃᖅᑎᓪᓗᒍ ᐃᓪᓗᕈᓯᕐᒥ ᑎᒍᔭᐅᒪᕕᒻᒥ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓈᒻᒪᓚᐅᖏᑦᑐᖅ ᕿᒪᑦᑕᐅᑐᐃᓐᓇᕐᓯᒪᓂᖓ ᐃᓪᓗᕕᓯᐅᑉ ᑎᒍᔭᐅᒪᕕᐅᑉ ᓇᑎᖓ ᐊᔾᔨᒌᖏᑦᑐᓂᑦ ᑎᒥᒦᖔᕐᓯᒪᔪᓂᑦ ᐱᑕᖃᖅᑎᓪᓗᒍ ᐃᑲᕐᕋᓄᑦ ᖁᓕᐅᓗᐊᓄᑦ (10).

[79] ᖃᐅᔨᓴᖅᑏᑦ ᐊᑐᖁᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᑎᑕᐅᕙᒻᒪᑕ ᐊᐅᓚᑦᓯᔾᔪᑎᓂᑦ ᒪᓕᒋᐊᓕᓐᓂᑦ ᐱᔾᔪᑎᓕᓐᓂᑦ ᐱᔾᔪᑎᐅᔪᒥᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐊᒻᒪ ᐊᑐᖁᔭᖓᓐᓂᑦ.

ᖃᓄᐃᓕᐅᕈᑎᒥᓂᖏᑦ ᐃᓪᓗᕈᓯᖃᕐᕕᒻᒥᑦ ᐅᐊᑦᓯᐅᔫᑉ

[80] ᐃᓗᐊᓄᑦ ᐅᓂᒃᑳᓕᐊᕆᔭᒥᓂ, ᖃᐅᔨᓴᖅᑏᑦ ᖃᐅᔨᒪᖁᔨᔪᑦ, ᐅᐊᑦᓯᐅᔪᖅ ᓇᓗᓇᓚᐅᖏᒻᒪᑦ ᐊᒻᒪ ᐱᓕᕆᔪᒪᑦᓯᐊᖅᑐᓂ ᐃᖅᑲᓇᐃᔭᑦᓯᐊᕈᒪᓪᓗᓂ ᐊᑦᓱᕉᑎᖃᕋᓗᐊᖅᑐᑎᒃ ᐊᑐᖅᑕᖏᓐᓂ, ᐊᒥᓲᓚᐅᖅᑐᑦ ᓱᕋᐃᔭᖅᑕᐅᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖓᓐᓂ ᑎᑎᕋᕐᓯᒪᔪᓂᑦ ᐱᔾᔪᑎᒋᓪᓗᒋᑦ ᑎᑎᕋᖅᐸᓐᓂᖅ ᐱᓕᕆᐊᒥᓂᕐᓂᒃ ᐊᒻᒪ ᐊᓯᖏᓐᓂᑦ ᐱᓕᕆᐊᑦᓴᖏᓐᓂ ᐅᐊᑦᓯᐅᔫᑉ, ᑖᓐᓇᓕ ᖃᐅᔨᓴᖅᑎᖃᓚᐅᖅᑐᖅ ᓵᔨᓐ ᒋᐅᓪᒥᑦ ᐱᓕᕆᑎᓪᓗᒍ. ᐃᓚᖏᑦ ᓱᕋᐃᔭᐃᓯᒪᓚᐅᖅᑐᑦ ᐱᒻᒪᕆᐅᔪᓂᑦ ᐱᐅᖏᑦᑐᓂᑦ ᐊᑐᖅᑎᑦᓯᒍᓐᓇᖅᑐᒥᓂᐅᑎᓪᓗᒋᑦ, ᓲᕐᓗ ᑎᒥᒥᑦ ᖃᐅᔨᓴᕆᐊᖃᕐᓂᐅᔪᑦ ᐊᑐᖅᑕᐅᓚᐅᖏᒻᒪᑦ ᐊᒻᒪ ᖃᐅᔨᓴᖅᑕᐅᒐᑎᒃ ᖃᓄᖅ ᑭᐅᔪᓐᓇᕐᓂᖏᑦ ᑎᒍᔭᐅᓯᒪᔪᑦ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓵᔨᓐ ᒋᐅᓪ ᓈᒻᒪᖏᑦᑐᒥᑦ ᖃᐅᔨᓴᕐᓂᖃᓚᐅᕐᓂᖓᓂᑦ ᐅᐊᑦᓯᐅᔪᒥᑦ.

[81] ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ ᐱᓕᒻᒪᑦᓴᐅᑎᐅᔪᑦ ᐊᑐᖅᑕᒥᓂᖏᑦ ᐅᐊᑦᓯᐅᔫᑉ ᓈᒻᒪᓚᐅᖏᒻᒪᑕ. ᓇᓗᓇᐃᔭᐃᒐᓗᐊᖅᑐᓂ ᑐᑭᓯᐅᒪᒋᐊᖃᕐᓂᖏᓐᓂᑦ ᐊᑑᑎᖏᓐᓂᑦ ᐊᒻᒪ ᐱᓕᕆᐊᕆᔭᕆᐊᓕᖏᓐᓂᑦ ᐅᐊᑦᓯᐅᔪᑦ, ᓈᒻᒪᑦᑐᒃᑯᑦ ᐊᑐᕐᓯᒪᓚᐅᖏᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᐊᒐᖏᑎᒍᑦ ᐊᑐᖁᔭᐅᔪᓂᑦ.

[82] ᖃᐅᔨᓴᖅᑏᑦ ᐊᑐᓕᖁᔨᔾᔪᑎᓕᐅᓚᐅᖅᑐᑦ ᑕᒪᒃᑯᐊ ᐱᔾᔪᑎᐅᔪᑦ ᑲᒪᒋᔭᐅᖁᓪᓗᒋᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᓐᓄᑦ ᐊᖏᕈᑎᐅᓚᐅᖅᑐᑎᒃ ᐱᒋᐊᖅᑎᑕᐅᒋᐊᖃᕐᒪᑕ.

[83] ᐱᔾᔪᑎᒋᓪᓗᒍ ᑭᐅᔾᔪᑎᐅᔪᕕᓂᖅ ᐱᒋᐊᖅᑕᐅᓂᖓᓄᑦ A.B., ᖃᐅᔨᓴᖅᑏᑦ ᖃᐅᔨᒪᖁᔨᓚᐅᖅᑐᑦ ᐊᑲᐅᓂᕐᓴᐅᑲᓴᒻᒪᑦ ᐊᑕᐅᓯᐅᒐᓗᐊᒥᑦ (1) ᐱᑕᖃᕐᓂᖅᐸᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓂ, ᑕᐃᒪᐃᑉᐸᒻᒪᑕ, ᑕᕝᕙᓴᐃᓐᓇᐸᓗᒃ ᑲᒪᒋᐊᑲᓴᑦᓴᐅᑎᒋᔪᑦᓴᐅᔪᕕᓃᑦ. ᑭᓯᐊᓂᓕ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑭᐅᑦᓴᐃᓐᓇᕆᐊᖃᖅᐸᒻᒪᑕ ᐊᒥᓱᓄᑦ ᐅᖄᓚᔾᔪᑎᐅᔪᓂᑦ ᐅᐸᑦᓴᐅᑎᒋᒋᐊᖃᖅᐸᑦᑐᓂᑦ.

ᐋᓐᓂᐊᔪᓕᕆᓂᒃᑯᑦ ᑲᒪᒋᔭᐅᔪᖅ A.B. ᑭᖑᓂᐊᓂ ᖃᓄᐃᒍᑎᖃᓚᐅᖅᑎᓪᓗᒋᑦ ᐃᓪᓗᕈᓯᕐᒥ ᑎᒍᔭᐅᒪᕕᒻᒥ

[84] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑕᕝᕙᓴᐃᓐᓇᖅ ᕿᓂᕐᓂᖏᑦᑐᑦ ᐃᓗᓯᖓᓂᑦ ᖃᐅᔨᓴᖅᑎᑦᓴᒥᑦ A.B.-ᒥᑦ ᐱᒋᐊᖅᑐᖅᑕᐅᓚᐅᖅᑎᓪᓗᒍ. ᑭᓯᐊᓂᓕ, ᐅᑕᖅᑭᑎᓪᓗᒋᑦ ᐋᓐᓂᐊᓯᐅᖅᑎᒥᑦ (ᐋᓐᓂᐊᓯᐅᖅᑎᑑᓚᐅᖅᑐᖅ ᐅᖄᓚᕕᐅᕐᓯᖅᑐᓂ ᑕᐃᑲᓂ ᐅᓐᓅᔪᒥ) ᖃᐃᑦᓯᐊᕆᓪᓗᒍ, ᐅᐊᑦᓯᓘᓐᓃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓘᓐᓃᑦ ᐃᑲᔪᕋᓱᓚᐅᖏᑦᑐᑦ A.B. ᒪᑦᑐᓯᒃᑯᓘᓐᓃᑦ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐃᑲᔪᕋᓱᒋᐊᖃᕐᓂᕋᓗᐊᕐᒪᑕ, ᐊᑦᑕᓇᔾᔭᐃᕐᓯᒪᓗᑎᒃ ᐃᑲᔪᕈᓐᓇᕐᓂᕈᑎᒃ.

[85] ᐋᓐᓂᐊᓯᐅᖅᑎ ᖃᐅᔨᓴᕇᕈᓐᓇᓚᐅᖏᑦᑐᖅ A.B. ᐋᖓᔮᓗᐊᓚᐅᕐᓂᑯᖓᓄᑦ, ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑕᑎᒋᔭᖃᕐᓂᖏᓐᓂᑦ ᐋᓐᓂᐊᓯᐅᖅᑎᐅᑉ ᐃᓱᒪᒋᔭᖓᓂᑦ A.B. ᑎᒍᔭᐅᒪᐃᓐᓇᕈᓐᓇᕐᓂᖓᓂᑦ ᑎᒍᔭᐅᒪᕕᓐᓂ ᖃᐅᔨᓴᖅᑕᐅᓚᐅᖏᓐᓂᖓᓂ ᐅᕙᑦᓯᐊᕈᒃᑲᓐᓂᖅ.

[86] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᓈᒻᒪᓚᐅᖏᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᐸᑦᓯᒪᓚᐅᖅᑐᑦ ᐋᓐᓂᐊᓯᐅᖅᑎ ᐅᐸᑦᓯᒪᑎᓪᓗᒍ ᓇᓗᓇᐃᕐᓗᑎᒃ ᐅᖃᐅᓯᖃᕐᓂᖏᒻᒪᑕ ᐅᓪᓗᒃᑯᑦ ᐃᖅᑲᓇᐃᔭᕆᐊᖅᑐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐊᑐᖁᔭᐅᓯᒪᔪᒥᑦ ᐋᓐᓂᐊᔪᓕᕆᓂᕐᒥᑦ ᐸᕐᓇᐅᑕᐅᓯᒪᔪᒥᑦ A.B.-ᒧᑦ, ᐊᒻᒪ ᑎᑎᖅᑕᐅᓐᓂᕋᓂ ᐸᕐᓇᐅᑎ ᒪᓕᑦᑕᐅᓗᓂ. ᑕᒪᓐᓇ ᑲᔪᓯᔭᐅᖏᑦᑐᒥᓂᐅᓂᖓ ᑲᒪᒋᔭᐅᒋᐊᖃᖅᑐᒥᑦ ᐅᓗᕆᐊᓇᖅᑐᒦᒍᑎᒋᔪᓐᓇᖅᑕᒥᓂᖓ A.B.

[87] ᑕᐃᒪᐃᓐᓂᖓᓄᑦ, ᐃᓱᒪᓕᕆᔨᒧᑦ ᐋᓐᓂᐊᓯᐅᖅᑎᒧᑦ ᐅᖃᖅᑐᖃᒃᑲᓐᓂᓚᐅᖅᑐᖅ ᑎᒥᖓ ᐋᓐᓂᐊᔪᓕᕆᔨᒧᑦ ᖃᐅᔨᓴᖅᑕᐅᒋᐊᖃᓛᕆᐊᖓ ᖃᐅᑉᐸᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐋᓐᓂᐊᓯᐅᖅᑎᑦᓴᖓᓂᑦ ᕿᓂᕆᐊᓕᓚᐅᖅᑐᑦ A.B.-ᒧᑦ. ᐋᓐᓂᐊᓯᐅᖅᑎ ᐱᓕᕆᓚᐅᖅᑐᖅ ᐋᓐᓂᐊᓯᐅᕐᕕᒻᒥ ᐅᖃᐅᔾᔨᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ A.B. ᖃᐃᑕᐅᖁᓪᓗᓂᐅᒃ ᐃᑲᕐᕋᐃᑦ ᓯᓚᑎᖏᓐᓂ ᐱᓕᕆᕝᕕᐅᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑕᐃᑯᖕᖓᐅᔾᔨᓕᓚᐅᖅᑐᑎᒃ. ᖃᐅᔨᓴᖅᑏᑦ ᖃᐅᔨᓚᐅᖅᑐᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᒪᑎᑕᐅᓕᕋᒥᒃ ᑎᒥᖓ ᖃᐅᔨᓴᖅᑕᐅᒋᐊᖃᕆᐊᖓ A.B., ᑭᖑᓂᑦᓯᐊᖓᒍᑦ ᖃᐅᔨᓴᖅᑕᐅᑎᑕᐅᓕᓚᐅᖅᑐᖅ.

[88] ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ, A.B. ᖃᓄᐃᔾᔪᓯᖏᑦ ᐱᓯᒪᑐᐃᓐᓇᕆᐊᖃᕐᓂᕋᓗᐊᕐᒪᑕ ᐋᖓᔮᕐᓗᐊᕐᓂᖓ ᐱᓪᓗᒍ (ᐊᒻᒪ ᑕᐃᒪᐃᑐᒥᓂᐅᔮᖅᑐᓂᓗ, ᓂᐊᖁᒃᑯᑦ ᐋᓐᓂᕐᓯᒪᒋᐊᖓ ᐅᖃᐅᓯᐅᓚᐅᕋᓂ), ᖃᐅᔨᒪᔭᐅᒐᔭᓚᐅᖏᑦᑐᖅ ᐋᓐᓂᕐᓯᒪᓪᓚᕆᓐᓂᖓᓄᑦ ᑎᒍᔭᐅᒪᕕᒻᒦᑎᓪᓗᒍ ᐃᓪᓗᕈᓯᕐᓂ. ᖃᐅᔨᓴᖅᑏᑦ ᐊᑐᖁᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓴᖅᑮᖁᓪᓗᒋᑦ ᑐᓴᕋᑦᓴᓂᑦ ᓇᓗᓇᐃᕐᓯᒪᖁᓪᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐳᐃᒍᐃᖁᔭᐅᖃᑦᑕᖁᓇᒋᑦ ᐱᒻᒪᕆᐅᓂᖏᓐᓂᑦ ᓂᐊᖁᒃᑯᑦ ᐱᒻᒪᕆᐅᑎᑉᐸᓪᓗᒋᑦ ᐋᓐᓂᕐᓯᒪᑐᐃᓐᓇᕆᐊᓕᓐᓂᑦ ᐊᒻᒪ ᑕᕝᕙᓴᐃᓐᓇᖅ ᖃᐅᔨᒋᐊᖃᑦᑕᖁᓪᓗᒋᑦ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑎᑦᓴᓂᑦ.

[89] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᔭᐅᔪᓂᑦ ᐊᒻᒪ ᐊᑐᖁᔭᐅᓯᒪᔪᓂᑦ ᖃᐅᔨᓴᖅᑎᓄᑦ ᐱᔾᔪᑎᒋᓪᓗᒋᑦ ᑕᒪᒃᑯᐊ ᐱᔾᔪᑎᐅᔪᑦ.

ᐊᑦᓱᑲᓪᓛᓗᒃ ᐱᓕᕆᔾᔪᑎᖃᑦᓯᐊᖏᓐᓂᐅᔪᖅ ᐊᒻᒪ ᐊᑐᖅᑕᐅᑐᐃᓐᓇᕆᐊᓕᐅᔪᑦ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᔪᖅ

[90] ᖃᐅᔨᓴᖅᑏᑦ ᐊᐱᕐᓱᕋᒥᒃ ᐋᓐᓂᐊᓯᐅᖅᑎᒥᑦ ᖃᐅᔨᓴᖅᑐᒥᓂᕐᒥᒃ A.B.-ᒥᑦ ᐋᓐᓂᐊᓯᐅᕐᕕᒻᒥ (ᐋᓐᓂᐊᓯᐅᖅᑎ C), ᐅᖃᐅᓯᖃᓚᐅᖅᑐᖅ ᑕᑯᓐᓇᓚᐅᖅᑕᒥᓂᒃ ᐱᔾᔪᑎᒋᓪᓗᒍ ᖃᓄᑎᒋ ᐱᓕᕆᔾᔪᑎᑦᓴᑭᓐᓂᕆᕙᑦᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑭᖕᖓᕐᓂ. ᐅᖃᓚᐅᖅᑐᖅ:

ᖃᓄᐃᒍᑎᖃᓪᓚᕆᓚᐅᖅᑐᖓ ᐊᑲᐅᖏᑦᑐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᖅᐸᑦᑕᖏᓐᓂᑦ ᑕᐃᑲᓂ ᓄᓇᓕᐅᔪᒥ. . . . ᑕᕝᕙᓂᑐᐊᖑᖕᖏᑦᑐᖅ ᖃᓄᐃᒍᑎᐅᓚᐅᖅᑐᒥ, ᑕᐃᒪᖕᖓᓕᒫᖅ ᑕᐅᕙᓃᑎᓪᓗᖓ. ᒪᒥᐊᒍᑎᖃᓚᐅᕐᓯᒪᖏᓯᐊᖅᑐᖓ ᑭᒃᑯᑐᐃᓐᓇᕐᓂᑦ ᑲᑎᖕᖓᔪᓂᑦ ᖃᖓᓕᒫᑦᓯᐊᖅ ᐃᖅᑲᓇᐃᔮᕆᔭᓐᓂ, ᖃᖓᑐᐃᓐᓇᖅ, ᑕᐃᒪᐃᓚᐅᕋᒪ [ᑭᖕᖓᕐᓂ], ᑕᐃᒪᐃᓚᐅᕋᒪ ᑕᐃᒃᑯᓄᖓ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᓂᑦ . . . ᐃᓘᓐᓇᑦᑎᐊᖏᓐᓂᑦ.

[91] ᐅᖃᕆᐊᓚᐅᖅᑐᖅ ᓄᓇᓕᓐᓃᖃᑦᑕᕐᓯᒪᒐᒥ ᐅᖄᓚᕕᐅᓗᐊᖅᐸᒐᑎᒃ ᐱᔨᑦᓯᕋᖅᑎᐅᔪᑦ ᐊᒻᒪ ᐊᒥᓲᓂᕐᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᖃᖅᐸᑦᑐᑎᒃ ᑕᐃᒃᑯᐊ. ᖃᐅᔨᒪᖁᔨᓚᐅᖅᑐᖅ ᐅᕙᑦᓯᐊᕈᓂᑦ ᐊᑐᖅᐸᒻᒪᑕ ᑭᖑᕚᕇᖑᔪᑦ ᖁᐊᕐᓵᕈᑎᖃᖅᐸᓂᕐᒥᑦ ᑭᖕᖓᐃᑦ ᓄᓇᓕᖓᓐᓂ, ᐊᒻᒪ ᐱᔾᔪᑎᑕᖃᐅᖅᑐᓂ ᐊᑦᓱᑲᓪᓚᒃ ᐱᑦᑎᐊᐸᖏᑦᑐᑦ ᐱᓪᓗᒋᑦ. ᐆᑦᑑᑎᒋᓗᒍ ᐊᑦᑐᐃᔾᔪᑎᐅᓯᒪᔪᑦ ᐊᒥᒐᕐᓯᕙᓐᓂᖏᓐᓄᑦ ᐱᓕᕆᔾᔪᑎᑦᓴᓄᑦ ᐃᑲᔫᑎᑦᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ, ᖃᐅᔨᒪᖁᔨᓚᐅᖅᑐᖅ ᐊᑲᐅᓂᖅᐹᖅᑕᖃᖏᒻᒪᑦ ᐅᕝᕙᓘᓐᓃᑦ ᐊᑦᑕᓇᖏᓂᖅᐹᓂᑦ ᓅᑎᕆᔭᕆᐊᑦᓴᖅ ᐋᓐᓂᐊᔪᓂᑦ ᐋᓐᓂᐊᓯᐅᕈᑎᐅᒋᐊᓕᓐᓂᑦ ᑭᖕᖓᕐᓂ ᐊᒻᒪ, ᑕᒪᓐᓇ ᐱᓪᓗᒍ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓂᕆᐅᒋᔭᐅᕙᑦᑐᑦ ᐋᓐᓂᐊᔪᓂᑦ ᐋᓐᓂᐊᓯᐅᖅᑎᑯᓐᓄᑦ ᐅᓯᒋᐊᖃᕐᓂᖏᓐᓂᑦ, ᓈᒻᒪᑦᑐᓂᑦ ᐱᓕᕆᔾᔪᑎᖃᕋᑎᒃ ᐅᕝᕙᓘᓐᓃᑦ ᐱᓕᒻᒪᓴᕐᓯᒪᒐᑎᒃ. ᐅᖃᕆᐊᓚᐅᖅᑐᖅ, ᑕᐃᒪᐃᑉᐸᑎᓐᓇᒋᑦ ᐊᓯᖏᓐᓂ ᓄᓇᓕᓐᓂ, ᐋᓐᓂᐊᔪᑦ ᐅᕝᕙᓘᓐᓃᑦ ᐃᓚᒋᔭᖏᑦ ᐅᖄᓚᒐᐃᒻᒪᑕ ᐋᓐᓂᐊᓯᐅᖅᑎᑯᓐᓄᑦ ᐋᓐᓂᐊᔪᖃᕐᓂᖓᓂᑦ, ᐅᖄᓚᖁᔭᐅᕙᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ. ᑕᑯᓯᒪᓂᕋᓚᐅᖅᑐᖅ ᐋᓐᓂᐊᔪᒥᒃ ᐋᓐᓂᐊᓯᐅᕐᕕᒻᒨᕈᔾᔭᐅᔪᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ "ᑎᒥᖓᓂᑦ ᑎᒋᖕᖔᕈᑎᖃᖏᑦᑐᒥᑦ, ᑎᒍᒥᐊᖅᑕᐅᒐᓂ ᐋᓐᓂᐊᔪᓂᑦ ᑎᒍᒥᐊᕈᑎᒧᑦ, ᓱᓇᖃᕋᑎᒃ, ᑎᒍᒥᐊᖅᑕᐅᓗᑎᒃ ᑕᓕᖏᒍᑦ ᐊᒻᒪ ᓂᐅᖏᒍᑦ, ᑕᑯᑦᓴᐅᓗᓂ ᖀᕐᓱᖅᑐᖅ." ᐋᓐᓂᐊᓯᐅᖅᑎ C ᐅᖃᓚᐅᖅᑐᖅ, "ᖃᓄᐃᒻᒪᑦ – [ᓈᒻᒪᖏᑦᑐᖅ] ᓇᒥᑐᐃᓐᓇᖅ ᑲᓇᑕᒥ. ᖃᓄᐃᒻᒪᓕ ᖃᓄᐃᖏᓚᖅ ᐅᑭᐅᖅᑕᖅᑐᒥ, ᐊᒻᒪ ᖃᓄᐃᖃᑦᑕᕐᓯᒪᖏᓚᖅ ᒫᓐᓇᒧᑦ?"

[92] ᑕᒪᒃᑯᐊ ᐅᖃᐅᓯᐅᓯᒪᔪᑦ ᐊᔾᔨᖃᖅᐸᓚᐅᖅᑐᑦ ᓇᓗᓇᐃᔭᐃᑎᓂᑦ ᓄᐊᑕᐅᓯᒪᔪᓂᑦ ᐱᓕᕆᐊᒥ, ᑎᒃᑯᐊᖓᒍᑎᐅᓗᑎᒃ ᐊᒥᒐᕐᓯᔪᒻᒪᕆᐅᓂᖏᓐᓂᑦ ᑭᖕᖓᕐᓂ, ᐊᒻᒪ ᐊᑦᑐᐃᔾᔪᑎᓪᓗᐊᖑᕙᑦᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᐅᓚᑦᓯᔾᔪᑎᖏᓐᓂᑦ ᐱᔾᔪᑎᐅᓗᓂ.

[93] ᐃᓚᖓᒍᑦ ᑕᒪᓐᓇ ᐱᓕᕆᔾᔪᑎᑦᓴᑭᓐᓂᐅᔪᖅ ᑕᑯᓐᓇᖅᑕᐅᓚᐅᕐᒥᔪᖅ ᓇᓗᓇᖏᓯᐊᖅᑐᓂᑦ ᓈᒻᒪᖏᑦᑐᓂᑦ ᐃᖅᑲᓇᐃᔭᖅᑎᖃᕐᓂᖏᓐᓂᑦ ᑭᖕᖓᐃᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖓᓐᓂ. ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᖕᒥᓂᖏᑦ ᓈᓴᐅᑎᒍᑦ ᐱᓕᕆᐊᖏᑦ, ᑭᖕᖓᐃᑦ ᑎᒍᔭᐅᒪᕕᖓᑦ ᐱᓕᕆᕝᕕᒃ ᐃᖅᑲᓇᐃᔭᖅᑎᖃᖏᓗᐊᓚᐅᖅᑐᖅ ᐊᕝᕙᐅᓗᐊᖏᓐᓂᑦ ᐃᖅᑲᓇᐃᔭᖅᑎᐅᒋᐊᓕᐅᒐᓗᐊᑦ ᖃᐅᑕᒫᑦ. ᑎᒍᔭᐅᒪᕕᒻᒥ ᐱᔨᑦᓯᕋᖅᑎᒥᑦ ᐃᑲᔪᖅᑎᖃᖏᑦᑐᑦ, ᑕᒪᐅᓇ ᑐᑭᖃᖅᑐᖅ ᐃᓘᓐᓇᑎᒃ ᐸᐃᑉᐹᓕᕆᒋᐊᓖᑦ ᑲᒪᒋᕙᑦᑕᖏᑦ ᓵᔨᓐᖑᔫᑉ.

[94] ᔪᓂ 1, 2020, ᐱᖓᓲᔪᖅᑑᓚᐅᖅᑐᑦ (6) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᓕᓐᓂ, ᐱᖃᓯᐅᔾᔭᐅᓗᑎᒃ ᐱᖓᓱᐃᑦ (3) ᑳᓐᔅᑕᐴᓪᔪᑦ ᑭᖑᕝᕕᖅᑎᐅᓚᐅᖅᑐᑦ. ᐊᒥᓲᓂᕐᓴᐅᓚᐅᖅᑐᑦ ᐊᑕᐅᓯᕐᒥᑦ (1) ᑯᐊᐳᕈᒥᑦ/ᑎᓴᒪᓂᑦ (4) ᐱᐅᓯᒃᑯᑦ ᐱᓕᕆᒋᐊᓕᓐᓂᑦ ᑎᒍᔭᐅᒪᕕᒻᒥ. ᐱᖓᓱᓂᑦ (3) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐃᖅᑲᓇᐃᔭᖅᑐᖃᓚᐅᖅᑐᖅ ᐅᓐᓄᓯᐅᖅᑐᓂᑦ, ᑭᓯᐊᓂ ᐊᒥᓱᐊᓘᓚᐅᕐᓂᖏᓐᓄᑦ ᐊᒻᒪ ᐱᒻᒪᕆᐅᕙᓐᓂᖏᓐᓄᑦ ᐅᖄᓚᔾᔪᑎᐅᕙᑦᑐᑦ, ᐃᓚᖏᑦ ᐅᓪᓗᕐᓯᐅᑎᐅᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐃᑲᔪᕆᐊᖁᔭᐅᓚᐅᖅᑐᑦ ᐃᑲᔪᕆᐊᖁᔭᐅᓗᑎᒃ ᐃᖅᑲᓇᐃᔭᕐᕕᖏᓐᓄᑦ.

[95] ᖃᐅᔨᒪᔭᐅᖁᔭᐅᓯᒪᒻᒪᑦ ᐅᕙᓂ ᐅᓂᒃᑳᓕᐊᒥ, ᐊᑦᓱᑲᓪᓚᒃ ᐱᓕᕆᔾᔪᑎᑦᓴᑭᓐᓂᐅᔪᖅ ᐱᔾᔪᑎᐅᓚᐅᕐᒪᑦ ᓇᐅᒃᑯᑐᐃᓐᓇᑦᓯᐊᖅ ᐊᑐᓚᐅᖅᑕᖏᓐᓂᑦ A.B. ᐅᕙᓂ ᔪᓂ 1-2, 2020, ᐊᒻᒪ ᐅᖃᐅᓯᐅᖏᓐᓇᓚᐅᖅᑐᖅ ᐅᖃᐅᓯᐅᑎᓪᓗᒋᑦ ᖃᓄᐃᓕᐅᕈᑎᐅᓯᒪᔪᑦ. ᐃᖅᑲᓇᐃᔭᑭᑦᓴᓂᕐᒥᑦ ᐊᒻᒪ ᐊᒥᓲᓚᐅᕐᓂᖏᑦ ᖃᓄᐃᒍᑎᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐅᐸᑦᑕᐅᓚᕿᓂᕆᓚᐅᖅᑕᖓ A.B. ᑐᐊᕖᓐᓈᓗᒃ ᓄᓇᒃᑰᔫᒥᓄᑦ, ᐊᒻᒪ ᕿᒪᐃᓯᒪᒋᐊᖃᕐᓂᕆᓚᐅᖅᑕᖏᑦ ᑎᒍᔭᐅᒪᕕᒻᒥᑦ A.B. ᐱᒋᐊᖅᑕᐅᑎᓪᓗᒍ; ᐃᓂᑭᑦᓴᓂᕐᒧᑦ, ᓱᓇᒃᑯᑖᑭᒃᓴᓂᕐᒧᑦ, ᐱᓕᒻᒪᓴᕐᓯᒪᑦᓯᐊᖏᓐᓂᕐᒧᑦ, ᐊᒻᒪ ᑯᕕᒍᓇᖏᑦᑐᑦ ᐃᓪᓗᕈᓯᕐᓂ ᑎᒍᔭᐅᒪᕕᓐᓂ ᓴᖅᑮᓚᐅᖅᑐᑦ ᐅᓗᕆᐊᓇᖅᑐᒥᑦ A.B. ᐃᓪᓗᕈᓯᕐᒨᖅᑕᐅᓗᓂ ᐅᓗᕆᐊᓇᖅᑐᒻᒪᕆᒻᒥᑦ ᐊᒻᒪ ᐋᖓᔮᖅᑐᒥᑦ ᐃᓄᓕᒻᒧᑦ ᐃᔨᖏᒍᑦ ᓴᓗᒻᒪᓴᕐᓯᒪᖏᑦᑐᒧᑦ ᐃᔨᖏᑦ ᐸᐸᒧᑦ ᑎᒻᒥᑳᕐᕕᐅᓚᐅᖅᑐᑎᒃ; ᐃᓪᓗᕈᓯᐅᑉ ᑎᒍᔭᐅᒪᕕᐅᑉ ᓴᓗᒻᒪᓴᖅᑕᐅᖏᓐᓂᒥᓂᖓᓄᑦ, ᐱᒻᒪᕆᓐᓂᑦ ᑐᑭᓯᒋᐊᕈᑎᓂᑦ ᐅᖃᐅᓯᐅᓐᓂᕋᑎᒃ ᐱᓪᓗᒍ ᐋᓐᓂᐊᔪᓕᕆᔭᐅᔪᒪᔪᖅ ᐸᕐᓇᐅᑕᐅᓯᒪᔪᖅ, ᐊᒻᒪ ᑭᓪᓕᖃᖅᑐᑦ ᐋᓐᓂᐊᔪᓕᕆᓂᕐᒧᑦ ᐱᓕᕆᔾᔪᑎᐅᔪᑦ, ᑕᕝᕙᓴᐃᓐᓇᖅ ᐅᐸᑦᑎᑦᓯᒍᓐᓇᓚᐅᖏᑦᑐᑦ ᑎᒍᔭᐅᒪᕕᒻᒧᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᑕᖅᑭᒋᐊᖃᓕᕐᓂᖅᑐᑎᒃ ᐃᑲᕐᕋᐃᑦ ᐱᓕᕆᕝᕕᐅᔪᑦ ᐊᓂᒍᕋᓱᓐᓂᖏᓐᓂ A.B. ᐋᓐᓂᐊᓯᐅᕐᕕᒻᒨᕈᔾᔭᐅᓂᐊᕐᓂᖓ ᐱᓪᓗᒍ.

[96] ᑕᑯᓐᓇᖅᑐᒍ ᖃᓄᐃᓕᖓᒍᑎᐅᔪᖅ ᐃᓘᓐᓇᖏᒍᑦ, ᖃᐅᔨᓴᖅᑏᑦ ᑕᐃᒫᓗᖏᖅᑐᒥ ᑭᓯᐊᓂ ᐃᓱᒪᓕᓚᐅᖅᑐᑦ ᖃᓄᐃᑦᑑᓂᖓ ᐱᔨᑦᓯᕋᐅᑎᐅᕙᑦᑐᑦ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐊᑦᓱᑲᓪᓚᒃ ᓈᒪᖏᑦᑐᕐᔪᐊᖑᓚᐅᖅᑐᖅ.

[97] ᐅᖃᐅᑎᑦᓴᖏᓐᓂ, ᐋᓐᓂᐊᓯᐅᖅᑎ C ᐃᓱᒫᓘᑎᖃᓚᐅᖅᑐᖅ ᑕᒻᒪᖅᑐᖃᖅᑎᓪᓗᒍ, ᑐᕌᒐᕆᔭᐅᒐᔪᒻᒪᑕ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ, ᐱᔾᔪᑎᐅᖏᑦᑐᓂᑦ ᓴᓇᓯᒪᔪᑦ ᐱᓪᓗᒋᑦ ᖃᓄᖅ ᐅᕝᕙᓘᓐᓃᑦ ᐱᓕᕆᔾᔪᑎᓕᕆᔪᑦ. ᐅᖃᓚᐅᖅᑐᖅ, "ᒐᕙᒪᒃᑯᑦ ᓄᓇᕘᒧᑦ ᑕᑯᒋᐊᕆᐊᖃᓪᓚᕆᓕᖅᑐᑦ ᐱᓕᕆᔾᔪᑎᐅᕙᑦᑐᓂᑦ ᐊᑐᖅᐸᑦᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᖅᑕᐅᒋᐊᓕᓐᓄᑦ ᐸᓖᓯᓕᕆᔾᔪᑎᐅᓗᑎᒃ. ᖁᕕᐊᓇᖏᑦᑐᓂᑦ ᐊᑐᖅᑕᐅᔪᖃᕐᓂᐅᓴᑐᐃᓐᓇᐸᒻᒪᑦ ᐊᒥᒐᕐᓯᔪᖃᓗᐊᖅᐸᑎᓪᓗᒍ ᐱᓕᕆᔾᔪᑎᑦᓴᓂᑦ ᐱᓕᕆᔾᔪᑎᐅᔪᓐᓇᖅᑐᓂᑦ."

[98] ᐱᐅᖏᑦᑐᒥᑦ ᐊᑐᖅᑕᐅᔪᖃᓕᓚᐅᖅᑐᖅ ᑕᕝᕙᓂ ᐱᓕᕆᐊᖑᔪᒥ. ᐅᓂᒃᑳᖏᓐᓂ, ᖃᐅᔨᓴᖅᑏᑦ ᑕᑯᓚᐅᖅᑐᑦ ᖃᓄᐃᓚᐅᖏᒻᒪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᒥᑦ ᑲᒪᔨᒧᑦ ᕿᒥᕐᕈᓂᕐᒥᑦ (IOR) ᓇᓗᓇᐃᔭᐃᒍᓐᓇᓚᐅᕐᒪᑦ ᐊᒥᓱᓂᑦ ᓱᕋᐃᔭᕐᓯᒪᔪᓂᑦ ᖃᓄᐃᓕᖓᓂᖓᓄᑦ ᐊᒻᒪ ᐃᖅᑲᓇᐃᔭᖅᑎᖏᒍᑦ ᑎᒍᔭᐅᒪᕕᐅᑉ, ᑭᓯᐊᓂ ᐃᒪᐃᑦᑐᒥᑦ ᖃᓄᐃᒍᑎᐅᔪᒥᑦ ᐊᑐᖅᑐᖃᕆᐊᖃᓕᕐᓂᕐᒪᑦ ᕿᒥᕐᕈᔭᐅᒋᐊᖃᓕᖅᑐᓂ. ᖃᐅᔨᓴᖅᑏᑦ ᑕᑯᓐᓇᓚᐅᖅᑐᑦ ᓱᓇᑐᐃᓐᓇᐃᑦ ᑎᑭᒋᐊᑐᓐᓂᖏᒃᑲᓗᐊᕐᒪᑕ ᐊᑐᖅᑕᐅᓕᖅᑐᒧᑦ ᓯᕗᓂᐊᒍᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᓄᐃᓕᐅᓚᐅᖏᓂᕐᒥᓂ ᖃᓄᐃᓕᐅᕈᑎᒋᔪᓐᓇᖅᑕᒥᓂᒃ ᐋᖅᑭᒍᑎᐅᔪᓐᓇᖅᑐᓂᑦ.

[99] ᖃᐅᔨᓴᖅᑏᑦ ᐃᓱᒪᑦᓴᕐᓯᐅᓚᐅᖅᑐᑦ ᐅᕕᓂᖃᑎᒌᖏᓂᕐᒥᑦ ᐃᓚᐃᓐᓈᓂᕐᒥᑦ ᐊᒻᒪ/ᐅᕝᕙᓘᓐᓃᑦ ᐊᔾᔨᒌᖏᑎᑦᓯᓂᒃᑯᑦ ᐱᓕᕆᐊᖃᕐᓂᕐᒥᑦ ᐊᑐᖅᑐᖃᓚᐅᕐᒪᖔᖅ ᖃᓄᐃᓕᐅᕈᑎᐅᓯᒪᔪᓂ ᖃᐅᔨᓴᖅᑕᐅᔪᓂ ᑕᕝᕙᓂ ᐱᓕᕆᐊᒥ. ᖃᐅᔨᓴᖅᑏᑦ ᖃᐅᔨᓚᐅᖏᑦᑐᑦ ᓇᓗᓇᐃᔭᐃᑎᑦᓴᓂᑦ ᓇᓗᓇᐃᔭᐃᓯᒪᔪᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᐊᑐᖅᑕᐅᓚᐅᕐᒪᖔᑕ ᐱᔾᔪᑎᒋᓪᓗᒍ ᐅᕕᓂᖃᑎᒌᖏᓐᓂᐅᔪᖅ ᐅᕝᕙᓘᓐᓃᑦ ᓇᓪᓕᐊᑕ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᕐᒪᖔᑕ ᐃᓚᐃᓐᓈᕐᓂᐅᔪᓂᑦ ᐱᓕᕆᔾᔪᑎᐅᑎᓪᓗᒍ A.B.

[100] ᑭᓯᐊᓂᓕ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᑲᒪᓇᖅᑐᒻᒪᕆᐅᔪᓂᑦ ᖃᓄᐃᑦᑑᓂᖏᓐᓄᑦ ᐱᓕᕆᔾᔪᑎᑦᓴᑭᓐᓂᐅᕙᑦᑐᓂᑦ ᑕᑯᓐᓇᖅᑕᐅᔪᓂᑦ ᐱᓕᕆᐊᖑᔪᒥ ᐃᓱᒫᓘᑎᐅᓕᓚᐅᖅᑐᑎᒃ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᔪᒥᑦ. ᑲᓇᑕᒥᐅᑕᐃᑦ ᓈᒻᒪᑦᑐᓂᑦ ᐱᔨᑦᓯᕋᐅᑕᐅᒋᐊᖃᕐᒪᑕ, ᓇᒥᒥᐅᑕᐅᒐᓗᐊᕈᑎᒃ, ᐊᒻᒪ ᑕᐃᒪᐃᑦᑐᓂᑦ ᐱᔨᑦᓯᕋᐅᑎᓂᑦ ᐱᑕᖃᖅᐸᖏᑦᑐᖅ ᑭᖕᖓᕐᓂ.

[101] ᖃᐅᔨᓴᖅᑏᑦ ᖃᐅᔨᓚᐅᖅᑐᑦ 93%-ᐳᓴᓗᐊᖏᑦ ᑭᖕᖓᕐᒥᐅᑕᐃᑦ ᐃᓄᐃᖑᒻᒪᑕ, ᐱᖃᓯᐅᔾᔭᐅᓗᓂ A.B. ᐅᓐᓄᖓᓂ ᖃᓄᐃᓕᐅᕐᕕᐅᓚᐅᖅᑐᒥ, A.B. ᐊᑐᓚᐅᖅᑐᖅ ᐊᒥᓱᑲᓪᓚᓐᓂᒃ ᐱᐅᖏᑦᑐᓂᑦ ᐊᑦᑐᐃᔾᔪᑎᐅᔪᓂᑦ ᐱᔪᓂᑦ ᐱᓕᕆᔾᔪᑎᑦᓴᑭᓐᓂᐅᔪᓂᑦ. ᐊᓯᖏᑦ ᓄᓇᓕᕐᒥᐅᑕᐅᔪᑦ ᑕᐃᒪᐃᑦᑐᑦᓴᐅᕙᒻᒥᔪᑦ ᐱᓕᕆᔾᔪᑎᐅᕙᑦᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ, ᐱᔾᔪᑎᒋᓪᓗᒋᑦ ᓈᒻᒪᖏᑦᑐᒻᒪᕆᐅᔪᑦ ᐃᖅᑲᓇᐃᔭᖅᑎᖃᕐᓂᒃᑯᑦ ᐊᒻᒪ ᑕᑯᑦᓴᐅᔪᑦ ᐱᓕᕆᔾᔪᑎᐅᔪᑦ ᓴᖅᑭᖅᑕᐅᓯᒪᔪᑦ ᓇᓗᓇᐃᔭᐃᑎᓂᑦ.

[102] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᖃᑎᖃᖅᐸᑦᑐᑦ ᐃᓄᖕᓂᒃ ᐃᓗᓕᖃᐅᒻᒪᕆᑦᑐᒥᑦ ᐅᕙᑦᓯᐊᕈᕐᓂᑕᓂᑦ ᖁᕕᐊᓇᖏᓯᒪᔪᓂᑦ ᐱᓕᕆᖃᑎᒌᓐᓂᕐᒥᑦ ᓄᓇᕘᒥ ᐊᒻᒪ ᐊᓯᖏᓐᓂ ᓄᓇᓕᖃᕐᕕᐅᔪᓂ ᐃᓄᐃᑦ ᐊᖏᕐᕋᖏᓐᓂ. ᐱᖃᓯᐅᔾᔭᐅᔪᑦ, ᐊᓯᖏᓐᓂᓪᓗ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᔾᔪᑎᒋᕙᑦᑕᖏᑦ ᐊᑐᖅᑐᑎᒃ ᒐᕙᒪᓄᑦ ᐊᑐᐊᒐᐅᔪᓂᑦ ᐱᖃᓯᐅᔾᔨᓯᒪᔪᓂᑦ ᐱᕕᖃᖅᑎᑕᐅᒐᑎᒃ ᓅᑎᕆᕙᓐᓂᐅᓚᐅᖅᑐᖅ ᐃᓄᖕᓂᒃ ᖁᑦᓯᑦᑐᒧᑦ ᐅᑭᐅᖅᑕᖅᑐᒧᑦ, ᐱᔭᐅᕙᓚᐅᕐᓂᖏᓐᓂᑦ ᐃᓄᐃᑦ ᓱᕈᓰᑦ ᐃᓕᓐᓂᐊᕆᐊᖅᑎᑕᐅᕙᑦᑐᑎᒃ ᓇᔪᒐᕐᓄᑦ, ᐊᒻᒪ ᑐᖁᕋᖅᑕᐅᕙᓚᐅᕐᓂᖏᓐᓂᑦ ᕿᒧᑦᓯᐅᑎᐅᕙᓚᐅᖅᑐᑦ ᕿᒻᒦᑦ. ᒫᓐᓇᓂᓴᐅᓂᕐᓴᐅᔪᖅ, ᐸᓯᐅᖅᑕᐅᓯᒪᒻᒥᔪᑦ ᐱᓕᕆᔾᔪᑎᒍᑦ ᐊᑲᐅᖏᓕᐅᕈᑎᐅᔪᓂᑦ ᐊᒻᒪ ᑭᒃᑯᓐᓂᒃ ᐱᑦᑎᐊᐸᖏᓂᕐᒥᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐸᓖᓯᓕᕆᔾᔪᑎᖏᓐᓂ ᓄᓇᕘᒥ ᓄᓇᓕᐅᔪᓂ, ᐃᓚᖏᑦ ᐅᓂᒃᑳᓕᐅᕈᑎᐅᕙᑦᑐᑎᒃ ᖃᐅᔨᓴᖅᑎᓂᑦ.

[103] ᐱᔾᔪᑎᒋᓪᓗᒍ ᑕᒪᓐᓇ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᖃᐅᔨᓴᖅᑕᐅᑲᓐᓂᕆᐊᖃᕐᓂᖓᓂᑦ ᓇᓗᓇᐃᔭᐃᓗᑎᒃ ᖃᓄᑎᒋ ᐊᑲᐅᖏᓕᐅᕈᑎᐅᔪᖅ ᐱᒻᒪᖔᖅ ᐊᒻᒪ ᖃᐅᔨᓴᖅᑕᐅᓗᑎᒃ ᐱᓕᕆᔾᔪᑎᑦᓴᑭᓐᓂᐅᔪᖅ ᐱᓪᓗᒍ ᐃᓚᐃᓐᓈᕈᑎᐅᕙᓕᕐᒪᖔᑕ.

[104] ᖃᐅᔨᓴᖅᑏᑦ ᖃᐅᔨᓚᐅᕐᒥᔪᑦ, ᑕᕝᕙᐅᒐᓗᐊᖅᑎᓪᓗᒋᑦ ᐊᑦᑐᐊᓂᐅᔪᑦ ᐃᓚᐃᓐᓈᓂᕐᒧᑦ, ᖃᓄᐃᓕᐅᕆᐊᑦᑕᐅᑎᒋᔭᕆᐊᓖᑦ ᑲᒪᒋᔭᐅᖁᓪᓗᒍ ᐱᐅᖏᑐᒻᒪᕆᐅᔪᖅ ᖃᓄᐃᓕᖓᒍᑎᐅᔪᖅ ᑭᖕᖓᕐᓂ ᐊᒻᒪ ᐊᓯᖏᓐᓂ ᓄᓇᕘᑉ ᓄᓇᓕᖏᓐᓂ ᓵᖕᖓᕙᑦᑐᓂᑦᑕᐅᖅ ᐊᔾᔨᐸᓗᑦᓯᐊᖏᓐᓂᑦ ᐱᔾᔪᑎᐅᔪᓂᑦ. ᖃᐅᔨᓴᖅᑏᑦ ᖃᐅᔨᒪᖁᔨᓚᐅᖅᑐᑦ ᑐᑭᓯᓯᒪᒻᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓄᑑᔾᔨᔪᓐᓇᖏᒻᒪᑕ ᐱᓕᕆᔾᔪᑎᒍᑦ ᓈᒻᒪᑦᑐᓂᑦ ᐱᓕᕆᔾᔪᑎᑦᓴᖃᕋᑎᒃ ᐱᔾᔪᑎᒋᓪᓗᒋᑦ ᐱᓕᕆᔾᔪᑎᖃᕆᐊᖃᖅᐸᓐᓂᐅᔪᖅ. ᑕᐃᒪᐃᓐᓂᖏᓐᓄᑦ, ᖃᐅᔨᓴᖅᑏᑦ ᐊᑐᖁᔨᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐅᖃᖃᑎᖃᕆᐊᑦᑕᐅᑎᒋᖁᓪᓗᒋᑦ ᒐᕙᒪᒃᑯᓐᓂᑦ ᑲᑐᔾᔨᖃᑎᒋᕙᑦᑕᖏᓐᓂᑦ ᓇᓗᓇᐃᔭᐃᓯᒪᖁᓪᓗᒋᑦ ᓈᒻᒪᑦᑐᓂᑦ ᐱᓕᕆᔾᔪᑎᓂᑦ ᐊᒻᒪ ᑮᓇᐅᔭᓂᑦ ᐊᑐᐃᓐᓇᕈᐃᕕᐅᖁᓪᓗᒋᑦ ᓄᓇᕗᑦ ᑎᒍᔭᐅᒪᕕᖏᓐᓂ.

ᖃᐅᔨᔭᐅᔪᖅ #23: ᓈᒻᒪᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᖅᑎᑭᓐᓂᖓᑦ ᑭᖕᖓᐃᑦ ᑎᒍᔭᐅᒪᕕᖓᑕ ᐊᕝᕙᐅᓗᐊᖏᓐᓂᑦ ᐸᓖᓯᐅᒋᐊᓕᓐᓂᑦ ᑕᐃᑲᓂ.

ᖃᐅᔨᔭᐅᔪᖅ #36: ᖃᓄᐃᓪᓗᐊᕐᓂᖓ ᐱᔨᑦᓯᕋᐅᑎᐅᕙᑦᑑᑉ ᑭᖕᖓᐃᑦ ᑎᒍᔭᐅᒪᕕᒻᒥ ᓈᒻᒪᖏᑦᑐᒻᒪᕆᐅᓚᐅᖅᑐᖅ. ᖃᓄᐃᓪᓗᐊᕐᓂᖓ ᐱᓕᕆᔾᔪᑎᖃᑦᓯᐊᖏᓐᓂᐅᑉ ᑕᑯᓐᓇᐅᖅᑕᐅᓯᒪᔫᑉ ᐊᑐᖅᑕᐅᔪᑦ ᐃᓱᒫᓘᑎᐅᓕᖅᑐᑎᒃ ᐊᑐᖅᑕᐅᑐᐃᓐᓇᕆᐊᓕᓐᓂᑦ ᐱᓕᕆᔾᔪᑎᒍᑦ ᐃᓚᐃᓐᓈᓂᕐᒥᑦ.

ᖃᐅᔨᔭᐅᔪᖅ #35: ᓇᓗᓇᐃᔭᐃᑎᑕᖃᖏᑦᑐᖅ ᓇᓗᓇᐃᔭᐃᓯᒪᔪᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᐊᑐᖅᑕᐅᓚᐅᕐᒪᖔᑕ ᐱᔾᔪᑎᒋᓪᓗᒍ ᐅᕕᓂᖃᑎᒌᖏᓐᓂᐅᔪᖅ ᐅᕝᕙᓘᓐᓃᑦ ᓇᓪᓕᐊᑕ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᕐᒪᖔᑕ ᐃᓚᐃᓐᓈᕐᓂᐅᔪᓂᑦ ᐱᓕᕆᔾᔪᑎᐅᑎᓪᓗᒍ A.B.

ᐊᑐᖁᔭᖅ #11: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᓗᓇᐃᕐᓯᒪᒋᐊᓕᐅᔪᑦ ᓈᒻᒪᑦᑐᓂᑦ ᐃᖅᑲᓇᐃᔭᖅᑎᖃᑦᓯᐊᓕᕋᓗᐊᕐᒪᖔᕐᒥᒃ ᐃᓘᓐᓇᖏᓐᓂ ᑎᒍᔭᐅᒪᕕᖏᓐᓂ ᐱᓕᕆᕝᕕᓐᓂ, ᐱᖃᓯᐅᔾᔭᐅᓗᓂ ᑭᖕᖓᐃᑦ ᑎᒍᔭᐅᒪᕕᖓᑦ.

ᓯᕗᓪᓕᖅ ᐊᑐᖁᔭᖅ #19: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᐅᔨᓴᕆᐊᓖᑦ ᖃᓄᑎᒋ ᐊᔾᔨᒌᓐᓂᖃᕐᒪᖔᑕ ᐊᔾᔨᒌᖏᓐᓂᖃᕐᒪᖔᑕᓗ ᐱᓕᕆᔾᔪᑎᐅᕙᑦᑐᑦ ᐊᒻᒪ ᑮᓇᐅᔭᐅᕙᑦᑐᑦ ᑎᒍᔭᐅᒪᕕᖏᓐᓄᑦ ᓄᓇᕘᒥ ᓴᓂᖏᓐᓂ ᐊᔾᔨᖏᑕ ᑎᒍᔭᐅᒪᕕᐅᕙᑦᑐᑦ ᐊᓯᖏᓐᓂ ᓄᓇᓕᖃᕐᕕᐅᔪᓂ ᐊᒻᒪ ᑐᓴᐅᒪᑎᑕᐅᒐᔭᕐᓗᑎᒃ ᑕᒪᒃᑯᓂᖓ ᖃᐅᔨᓴᐅᑎᒥᓂᕐᓂᒃ ᖃᐅᔨᓴᖅᑏᑦ.

ᐊᑐᖁᔭᖅ #20: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒫᓐᓇᑲᐅᑎᒋ ᐅᖃᖃᑎᖃᕆᐊᖃᓕᖅᑐᑦ ᒐᕙᒪᒃᑯᓐᓂᑦ ᓄᓇᕘᒥ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᕐᓯᒪᓇᓱᐊᕐᓗᑎᒃ ᓈᒻᒪᑦᑐᓂᑦ ᐱᓕᕆᔾᔪᑎᖃᖅᐸᒃᑲᓗᐊᕐᒪᖔᑕ ᐊᒻᒪ ᑮᓇᐅᔭᓂᑦ ᓄᓇᕘᒥ ᑎᒍᔭᐅᒪᕕᐅᔪᑦ ᓈᒻᒪᑦᑐᓂᑦ ᐱᔨᑦᓯᕋᖅᐸᓂᐊᕐᒪᑕ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐊᒻᒪ ᐊᓯᖏᓐᓂ ᓄᓇᕘᒥ ᑎᒍᔭᐅᒪᕕᖃᕐᕕᓐᓂ ᓵᖕᖓᕙᒻᒥᔪᓂᑦ ᐊᔾᔨᐸᓗᖏᓐᓂᑦ ᖃᓄᐃᓕᖓᒍᑎᐅᔪᓂᑦ.

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖓ

[105] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᐃᓚᖏᓐᓂᑦ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐱᓪᓗᒍ ᐃᖅᑲᓇᐃᔭᖅᑎᑦᓴᑭᓐᓂᐅᔪᖅ ᑭᖕᖓᐃᑦ ᑎᒍᔭᐅᒪᕕᖓᑕ ᐱᓕᕆᕝᕕᖏᓐᓂ (ᖃᐅᔨᔭᐅᔪᖅ #23). ᖃᐅᔨᒪᓂᕋᓚᐅᖅᑐᖅ ᐃᖅᑲᓇᐃᔭᖅᑎᖃᕐᓂᐅᔪᖅ ᐱᔭᑦᓴᓕᒻᒪᕆᐅᔪᓂ ᑎᒍᔭᐅᒪᕕᒻᒥ ᑐᖔᓃᑦᑐᓂᑦ ᐊᕝᕙᖏᑕ ᐃᖅᑲᓇᐃᔭᖅᑎᐅᒋᐊᓕᐅᒐᓗᐊᓂᑦ ᑕᑯᓐᓇᖅᑐᒍ ᓈᒻᒪᖏᓪᓚᕆᑦᑐᖅ. ᑭᓯᐊᓂᓕ, ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓈᒻᒪᑦᑐᓂᑦ ᐱᓕᕆᐊᖃᓚᐅᕐᒪᑕ ᑕᒪᓐᓇ ᐊᑐᖅᑕᐅᒍᒪᒐᓂ. ᐅᖃᕆᐊᓚᐅᖅᑐᖅ ᐱᓕᕆᔾᔪᑎᑦᓴᓂᑦ ᑭᓯᐊᓂ ᑕᑎᒋᔭᖃᖅᐸᒻᒪᑕ ᓄᓇᓕᖃᕐᕕᓐᓂ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᑲᑐᔾᔨᖃᑕᐅᕙᑦᑐᓂᑦ. ᑕᐃᒪᐃᑉᐸᒻᒪᑕ ᓄᓇᓕᓐᓂᑦ ᐊᐅᓚᑦᓯᔨᓄᑦ ᐸᓖᓯᐅᕙᑦᑐᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᖃᑎᖃᕆᐊᖃᖅᐸᑦᑐᑦ ᐊᔾᔨᒌᖏᑦᑐᓂᑦ ᒐᕙᒪᓕᕆᔨᓂᑦ ᐊᒻᒪ ᐱᓕᕆᕝᕕᓐᓂᑦ ᐃᖅᑲᓇᐃᔭᖅᑎᑦᓴᓂᑦ ᑐᑦᓯᕋᓕᕋᐃᒻᒪᑕ, ᐊᒻᒪ ᑭᖑᓪᓕᖅᐹᑦ ᐋᖅᑭᑦᓱᐃᔨᐅᕙᑦᑐᑎᒃ ᓄᓇᓕᖃᕐᕕᓐᓂᑦ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᓄᓇᓕᖃᕐᕕᓐᓂ ᒐᕙᒪᓕᕆᔨᒃᑯᑦ.

[106] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᓇᓗᓇᐃᔭᐃᓯᒪᑦᓯᐊᖅᑐᒥᑦ ᐅᖃᐅᓯᖃᓚᐅᖅᑐᖅ ᖃᓄᖅᑑᕈᑎᐅᕙᑦᑐᓂᑦ "V" ᐱᓕᕆᕝᕕᒃᑯᑦ ᐱᓕᕆᔾᔪᑎᓂᑦ ᐃᓚᓯᒐᓱᐊᕈᑎᐅᕙᑦᑐᓂᑦ ᐊᕐᕌᒍᓂ ᖁᓕᓂ (10) ᐊᓂᒍᓕᖅᑐᓂᑦ. ᐱᒐᓗᐊᖅᑎᓪᓗᒋᑦ ᐊᒥᓱᑲᓪᓚᐃᑦ ᐱᓕᕆᔾᔪᑎᑦᓴᐃᑦ ᐅᓂᒃᑳᖑᓚᐅᖅᑐᑦ ᑐᑦᓯᕋᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓂᑦ ᐃᓚᒋᔭᐅᔪᑦᓴᓂᑦ ᓄᓇᕘᒥ ᑎᒍᔭᐅᒪᕕᖏᓐᓄᑦ, ᐊᒥᓱᐊᖅᑎᖅᑐᑎᒃ ᐃᓚᒍᒪᔪᑦ ᐊᖏᖅᑕᐅᕙᓚᐅᖏᑦᑐᑦ. ᐊᓯᖏᓐᓂ ᐊᑐᖅᑕᐅᔪᓂ, ᖃᑦᓰᓐᓇᐅᓂᕐᓴᓂᑦ ᐃᖅᑲᓇᐃᔮᑦᓴᓂᑦ ᑐᑦᓯᕌᖑᓚᐅᖅᑐᓂᑦ ᐊᖏᓚᐅᖅᑐᑦ. ᐃᓚᖓᓂ, ᑮᓇᐅᔭᓂᑦ ᐱᑎᑕᐅᒃᑲᓐᓂᓚᐅᖅᑐᑦ, ᑭᓯᐊᓂ ᖁᕝᕙᒋᐊᕈᑎᐅᔪᑦ ᐃᓘᓐᓇᖏᓐᓂᑦ ᑮᓇᐅᔭᐃᑦ ᐊᑐᖅᑐᑦᓴᒃᑯᑦ ᐱᔾᔪᑎᒋᓪᓗᒋᑦ ᐊᐅᓚᑕᐅᓗᐊᖏᑦᑐᑦ ᐊᑭᓕᕆᐊᓖᑦ ᐊᒻᒪ ᐊᑭᑦᑐᐸᓪᓕᐊᓂᐅᔪᖅ ᓱᓇᑐᐃᓐᓇᒃᑯᑦ ᑐᑭᖃᖅᐸᑦᑐᑦ ᑮᓇᐅᔭᐃᑦ ᐊᑐᖅᑕᐅᔪᓐᓇᖏᒻᒪᑕ ᐃᖅᑲᓇᐃᔭᖅᑎᑖᒃᑲᓐᓂᕈᑎᐅᓗᑎᒃ.

[107] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᓇᓗᓇᐃᔭᐃᓚᐅᖅᑐᖅ ᐃᓚᒋᔭᐅᔪᑦ "V" ᐱᓕᕆᕝᕕᒻᒥ ᐊᐅᓚᑦᓯᔨᒻᒪᕆᖏᑦ ᐃᓱᒫᓘᑎᖃᕐᓯᒪᒻᒪᑕ ᐱᓪᓗᒋᑦ "ᐱᔭᕆᐊᑐᔪᓂᑦ ᖃᓄᐃᒍᑎᖃᖅᐸᓐᓂᖏᓐᓂᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ ᐊᑐᕆᐊᖃᖅᐸᑦᑕᖏᓐᓂᑦ" ᐊᒻᒪ ᐅᖃᐅᓯᖃᖅᑐᓂ ᐊᑐᖅᑕᒥᓂᕐᒥᒃ ᐃᓚᒋᔭᐅᔪᑦ ᐊᓯᐊᓅᖅᑕᐅᒋᐊᖃᕐᓂᕐᒪᑕ ᐊᑦᑕᓇᖅᑐᒦᖁᔭᐅᒐᑎᒃ ᓄᓇᓕᕐᒥᐅᑕᓂᑦ ᐅᓗᕆᐊᑦᓵᕆᔭᐅᓚᐅᖅᑎᓪᓗᒋᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᖃᓗᓐᓂ ᓇᓪᓕᑭᑕᐅᑎᒍᒪᓚᐅᖏᒻᒪᑕ ᑭᖑᕝᕖᕙᓪᓗᑎᒃ ᑭᖕᖓᐃᑦ ᑎᒍᔭᐅᒪᕕᖓᓐᓂ; ᑕᒪᓐᓇ ᐱᓪᓗᒍ, "ᑐᖕᖓᕕᒻᒥᑦ" ᐆᑦᑑᑎᑦᓴᒥᑦ ᐃᑲᔫᑎᑦᓴᖏᓐᓂᑦ ᑭᖕᖓᕐᓂ ᐸᓖᓯᒃᑯᑦ ᐃᖃᓗᓐᓂ ᐸᓖᓯᐅᔪᑦ ᐱᖃᑕᐅᓗᑎᒃ ᐋᖅᑭᒍᓐᓇᓚᐅᖏᑦᑐᖅ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᐊᖃᓚᐅᖅᑐᑦ ᑲᓇᑕᐅᑉ ᐃᓗᐊᓂ ᐃᖅᑲᓇᐃᔭᖅᑎᑖᕋᓱᐊᕈᑎᓂᑦ ᐱᑕᖃᕐᓂᖓᓂᑦ ᑭᖕᖓᕐᓂ, ᑭᓯᐊᓂ ᐃᖅᑲᓇᐃᔮᑦᓴᓂᑦ ᐱᔪᓐᓇᓚᐅᖏᑦᑐᑦ ᐱᐅᓯᕐᓂᑦ ᐊᑐᖅᑐᑎᒃ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ "ᑭᖕᖓᐃᑦ ᓇᓗᓇᐃᔭᐃᓯᒪᔪᖅ ᐱᐅᓗᐊᖏᓐᓂᖓᓄᑦ ᐃᖅᑲᓇᐃᔭᕐᕕᒋᓗᒍ."

[108] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ, ᐃᓛᓐᓂᒃᑯᑦ, ᑭᖕᖓᐃᑦ ᑎᒍᔭᐅᒪᕕᖓᑦ ᐊᒥᓲᓂᕐᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᖃᖅᐸᑦᑐᑦ ᐱᔪᓐᓇᐅᑎᒍᑦ ᐋᖅᑭᑦᓯᒪᔪᓂᑦ, ᑭᓯᐊᓂ ᐅᖃᕆᐊᓚᐅᖅᑐᖅ ᑕᒪᒃᑯᐊ ᐊᒥᓲᓗᐊᕈᑏᑦ ᑭᖑᕝᕖᔨᐅᕙᒻᒪᑕ ᑲᓇᑕᐅᑉ ᓂᒋᐊᓂᑦ ᓄᓇᓕᓐᓃᖔᕐᓯᒪᕙᑦᑐᑎᒃ ᑎᒍᔭᐅᒪᕕᓐᓂᑦ, ᐅᕝᕙᓘᓐᓃᑦ ᓇᓪᓕᐅᒃᑯᒫᓂᑦ.

[109] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᖃᐅᔨᒪᓂᕋᓚᐅᖅᑐᖅ, ᐱᓕᕆᔨᐅᔪᑦ ᖃᓄᑐᐃᓐᓇᑦᓯᐊᖅ ᖃᓄᖅᑑᕋᓱᑉᐸᒃᑲᓗᐊᕐᒪᑕ, ᑎᑭᑦᑎᓪᓗᒍ ᔪᓂ 1, 2020, ᐱᓕᕆᔾᔪᑎᐅᔪᑦ ᑭᖕᖓᕐᓂ ᑎᓴᒪᓂᑦ (4) ᐊᒥᐊᒃᑯᓯᒪᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᔪᑦ (ᖁᓕᐅᒐᑎᒃ (10) ᑕᐃᑲᓃᒋᐊᓖᑦ), ᐊᒻᒪ ᐸᐃᑉᐹᓕᕆᔨᒥᑦ ᐃᑲᔪᖅᑎᖃᕋᑎᒃ, ᓵᔨᓐᒧᑦ ᐱᓕᕆᐊᖑᒋᐊᖃᓕᖅᑐᑎᒃ ᐸᐃᑉᐹᓕᕆᒋᐊᓖᑦ.

[110] ᖃᐅᔨᒪᒐᓗᐊᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐋᔩᖃᑕᐅᔪᓐᓇᕐᒪᑕ ᐱᓕᕆᔪᓐᓇᕐᓂᖏᓐᓂᑦ ᐊᓯᖏᓐᓂᑦ ᐱᑎᑦᓯᑐᐃᓐᓇᕐᓂᐅᑉ ᐱᓕᕆᐊᖑᕙᓪᓕᐊᔪᓂᑦ ᓇᓗᓇᐃᔭᐃᑎᑦᓴᓂᑦ ᑭᖕᖓᐃᑦ ᑎᒍᔭᐅᒪᕕᖓ ᓈᒻᒪᑦᑐᓂᑦ ᐃᖅᑲᓇᐃᔭᖅᑎᖃᕐᓂᖓᓄᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᓖᕌᕈᑎᖏᑦ ᐊᒥᒐᖅᑐᒻᒪᕆᐅᒻᒪᑕ, ᐱᔾᔪᑎᒋᓪᓗᒋᑦ ᑮᓇᐅᔭᑎᒍᑦ ᖃᓄᐃᓕᖓᓂᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ, ᐊᒥᒐᖅᐸᑦᑐᑦ ᐱᓕᕆᔾᔪᑎᐅᔪᑦ ᓄᓇᕗᑦ ᓄᓇᓕᖃᕐᕕᖓᓂ ᒐᕙᒪᒃᑯᑦ, ᐊᒻᒪ ᐊᒥᒐᖅᐸᓐᓂᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᔨᑦᓯᕋᖅᑎᐅᔭᕆᐊᓕᐅᔪᑦ ᓇᒧᑐᐃᓐᓇᖅ ᐊᖅᑯᑎᖃᓗᐊᖏᑦᑐᓂ ᐊᒻᒪ ᖃᐅᑕᒫᕈᔪᒃ ᐅᓗᕆᐊᓇᖅᑐᒻᒪᕆᐅᔪᓂ ᐃᓂᖃᖅᐸᑦᑐᑎᒃ.

[111] ᑭᐅᔾᔪᑎᐅᓗᑎᒃ ᖃᐅᔨᓴᖅᑎᐅᑉ ᖃᐅᔨᓚᐅᖅᑕᖏᓐᓂᑦ ᐱᓪᓗᒋᑦ ᐃᓱᒫᓘᑎᐅᔪᑦ ᓴᖅᑭᑕᐅᓚᐅᖅᑐᑦ ᐱᓪᓗᒍ ᖃᓄᑎᒋ ᐃᖅᑲᓇᐃᔭᖅᑎᑭᑦᓴᕐᓂᐅᕙᑦᑐᑦ ᐊᒻᒪ ᐱᔨᑦᓯᕋᐅᑎᒍᑦ ᓈᒻᒪᒋᑦᑐᒻᒪᕆᐅᔪᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ (ᖃᐅᔨᔭᐅᔪᖅ #36), ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᑎᒍᔭᐅᒪᕕᒻᒥ ᓈᒻᒪᖏᒻᒪᑕ ᐱᓕᕆᔾᔪᑎᐅᔪᑦ, ᑭᓯᐊᓂ ᐊᖏᖃᑎᖃᓚᐅᖏᑦᑐᖅ ᐱᓕᕆᔾᔪᑎᒍᑦ ᖃᓄᐃᓐᓂᖓ ᓇᓗᓇᐃᔭᐃᔾᔪᑎᐅᓚᐅᕐᒪᑦ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᕙᑦᑐᒥᑦ ᐅᕝᕙᓘᓐᓃᑦ ᑕᐃᓐᓇ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᔪᖅ ᐊᑐᖅᑕᐅᕙᒻᒪᑦ ᓇᐅᒃᑯᑐᐃᓐᓇᑦᓯᐊᖅ ᐱᓕᕆᔾᔪᑎᒍᑦ ᐱᔾᔪᑎᑕᖃᖅᑎᓪᓗᒍ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᑭᖕᖓᐃᑦ ᑎᒍᔭᐅᒪᕕᖓ ᐃᖅᑲᓇᐃᔭᖅᑎᓴᒃᑭᓐᓂᖓᓄᑦ ᐱᔾᔪᑎᖃᖅᑐᑎᒃ ᑮᓇᐅᔭᑭᑦᓴᓂᕐᒥᑦ ᐊᒻᒪ ᐃᖅᑲᓇᐃᔭᖅᑎᓂᑦ ᐊᐅᓚᑎᑦᓯᒋᐊᖃᖅᐸᓐᓂᖏᑦ ᓄᓇᓕᐅᑉ ᓯᓚᑖᓄᑦ ᐊᑦᑕᓇᖅᑐᒦᖁᓇᒋᑦ.

[112] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᐅᓯᖃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᔪᓯᔾᔪᑎᒋᔪᓐᓇᖏᑕᖏᓐᓂᑦ ᖃᓄᖅᑑᕈᑎᓂᑦ ᓇᓗᓇᐃᕐᓯᒪᖁᓪᓗᒋᑦ ᓄᓇᕘᒥ ᑎᒍᔭᐅᒪᕕᐅᔪᑦ ᓈᒻᒪᑦᑐᓂᑦ ᐱᓕᕆᔾᔪᑎᖃᖁᓪᓗᒋᑦ. ᐅᖃᓚᐅᖅᑐᖅ ᐱᑕᖃᕐᓂᐊᕈᑎᒃ ᓈᒻᒪᑦᓯᐊᖅᑐᒥᑦ ᐃᖅᑲᓇᐃᔭᖅᑎᖏᒍᑦ ᐊᒻᒪ ᓱᓇᒃᑯᑖᖃᑦᓯᐊᖅᑐᓂᑦ ᐱᓕᕆᔨᓂᑦ "V" ᐱᓕᕆᕝᕕᖏᓐᓂ ᓴᖅᑭᑕᐅᔪᓐᓇᕐᒪᑦ ᑲᑐᔾᔨᖃᑎᒌᓐᓂᒃᑯᑦ ᑭᓯᐊᓂ ᒐᕙᒪᒃᑯᑦ ᓄᓇᕘᒧᑦ ᐃᓚᒋᔭᐅᓗᑎᒃ. ᐅᖃᓚᐅᖅᑐᖅ ᐊᑦᓱᕉᑎᐅᕙᑦᑐᑦ ᓈᒻᒪᑦᑐᓂᑦ ᐱᓕᕆᔾᔪᑎᖃᖅᑎᑦᓯᒐᓱᐊᕐᓂᕐᒥᑦ ᑎᒍᔭᐅᒪᕕᓐᓂᑦ ᐅᑭᐅᖅᑕᖅᑐᒥ ᓄᑖᖑᖏᒻᒪᑦ, ᐅᖃᐅᓯᖃᖅᑐᓂ 2007-ᒥ ᐅᓂᒃᑳᓕᐊᒥᓂᕐᒥᑦ ᓇᓗᓇᐃᔭᐃᓯᒪᔪᒥᑦ ᐊᒥᓱᓂ ᐱᑕᖃᐃᓐᓇᖅᑐᓂᑦ ᐱᔾᔪᑎᐅᔪᓂᑦ.

[113] ᐱᓪᓗᒍ ᐃᓱᒫᓘᑎᐅᔪᖅ ᐱᓕᕆᔾᔪᑎᒍᑦ ᐃᓚᐃᓐᓈᕈᑎᐅᑐᐃᓐᓇᕆᐊᓕᓐᓂᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᑎᑎᕋᓚᐅᖅᑐᖅ, "ᑐᑭᓯᓯᒪᔪᖓ ᐱᓪᓗᒍ ᐊᑦᑐᐃᔾᔪᑎᐅᔪᖅ ᐱᐅᖏᑐᒃᑯᑦ ᐊᑦᑐᐃᓂᐅᔪᒥᑦ ᐱᒻᒪᕆᐅᔪᒥᑦ ᓇᓗᓇᐃᔭᐃᓂᕐᒥᑦ ᐃᓚᐃᓐᓈᕐᓂᐅᔪᖅ ᐊᑐᖅᑕᐅᓚᐅᕐᒪᖔᖅ ᐃᓱᒪᒋᖏᓪᓗᒍ ᐃᓚᐃᓐᓈᕐᓂᐅᔪᖅ ᐊᑐᖅᑕᐅᒐᓱᓚᐅᕐᒪᖔᖅ ᐅᕝᕙᓘᓐᓃᑦ ᐊᑐᖅᑕᐅᒐᓱᓚᐅᖏᒻᒪᖔᖅ." ᑭᓯᐊᓂᓕ, ᐅᖃᓚᐅᖅᑐᖅ ᐱᓕᕆᔾᔪᑎᓕᕆᔪᓂᑦ ᐋᖅᑭᒍᑎᓕᕆᔪᑦ ᑐᓴᐅᒪᑎᑕᐅᕙᑦᑐᑦ ᐊᑐᓂ ᐱᓕᕆᐊᖑᕙᓪᓕᐊᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ. ᐊᑐᐃᓐᓇᐅᔪᓂᑦ ᑮᓇᐅᔭᓂᑦ, ᐊᒻᒪ ᐊᑐᐃᓐᓇᐅᔪᓂᑦ ᐃᑲᔪᖅᑎᓂᑦ ᐊᑭᓕᕐᓱᖅᑕᐅᖏᑦᑐᓂᑦ ᐃᖅᑲᓇᐃᔭᕈᒪᕙᑦᑐᓂᑦ ᑭᖕᖓᕐᓂ, ᐊᒻᒪᑦᑕᐅᖅ ᐱᓕᕆᐊᑦᓴᖃᕐᓂᒃᑯᑦ ᐊᑦᓱᕉᑎᖃᖅᐸᑦᑐᑎᒃ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᕆᐊᓚᐅᖅᑐᖅ "ᖃᖓᑐᐃᓐᓇᒃᑯᑦ ᐅᕕᓂᖃᑎᒌᖏᓂᕐᒥᑦ ᐅᕝᕙᓘᓐᓃᑦ ᓇᒥᒥᐅᑕᐅᓂᕐᒥᑦ ᐱᔾᔪᑎᐅᔪᓂᑦ ᐱᓕᕆᔾᔪᑎᖏᓐᓂᑦ ᐋᖅᑭᒍᑎᐅᕙᑦᑐᓂ ᐱᑕᖃᓚᐅᖏᑦᑐᖅ [ᐅᑯᓄᖓ] ᑭᖕᖓᐃᑦ ᑎᒍᔭᐅᒪᕕᓐᓂ ᐅᕝᕙᓘᓐᓃᑦ ᓇᓪᓕᑐᐃᓐᓇᖏᓐᓂ ᐊᓯᖏᓐᓂ ᑎᒍᔭᐅᒪᕕᓐᓂ "V" ᐱᓕᕆᕝᕕᖏᓐᓂ."

[114] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐱᑕᖃᖏᓐᓂᖓᓂᑦ ᓇᓗᓇᐃᔭᐃᑎᑦᓴᓂᑦ ᐅᕕᓂᖃᑎᒌᖏᓂᕐᒥᑦ ᓈᒻᒪᓴᖏᓂᕐᒥᑦ ᐃᔾᔪᑎᒋᓪᓗᒋᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᐅᔪᑦ (ᖃᐅᔨᔭᐅᔪᖅ #35).

[115] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐃᑲᔪᕐᓱᐃᓚᐅᖅᑐᖅ ᐊᑐᖁᔭᐅᔪᓂᑦ ᓇᓗᓇᐃᕐᓯᒪᖁᓪᓗᒋᑦ ᓈᒻᒪᑦᑐᓂᑦ ᑮᓇᐅᔭᓂᑦ ᐱᑎᑕᐅᖃᑦᑕᖁᓪᓗᒋᑦ ᐃᓘᓐᓇᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖏᑦ ᐊᒻᒪ ᐅᖃᖃᑕᐅᒋᐊᕐᓗᑎᒃ ᑕᕝᕙᓴᐃᓐᓇᖅ ᒐᕙᒪᒃᑯᑦ ᓄᓇᕘᒧᑦ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᕐᓯᒪᒍᒪᓂᕐᒥᑦ ᓈᒻᒪᑦᑐᓂᑦ ᐱᓕᕆᔾᔪᑎᖃᖅᐸᒃᑲᓗᐊᕐᒪᖔᑕ ᓄᓇᕘᒥ ᑎᒍᔭᐅᒪᕕᐅᔪᑦ (ᐊᑐᔭᖁᔪᑦ #11 ᐊᒻᒪ #20).

[116] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐃᑲᔪᕐᓱᐃᓚᐅᖏᑦᑐᖅ ᖃᐅᔨᓴᖅᑏᑦ ᐊᑐᖁᔭᖓᓐᓂᑦ ᖃᐅᔨᓴᖁᔨᑎᓪᓗᒍ ᖃᓄᖅ ᐊᔾᔨᒌᖏᓐᓂᖃᕐᒪᖔᑕ ᐊᔾᔨᒌᓐᓂᖃᕐᒪᖔᑕᓘᓐᓃᑦ ᐱᓕᕆᔾᔪᑎᓕᕆᔪᓂᑦ (ᐊᑐᖁᔭᖅ #19). ᖃᐅᔨᒪᓂᕋᕋᓗᐊᖅᑐᓂ ᖃᐅᔨᓴᖅᑏᑦ ᐃᓱᒫᓘᑎᖏᓐᓂᑦ, ᐊᖏᖃᑎᖃᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᐅᓚᑦᓯᒋᐊᖃᕆᐊᖏᓐᓂᑦ ᖃᐅᔨᓴᕐᓂᕐᒥᑦ ᐱᓕᕆᔪᖃᓕᕐᓂᕐᒪᖔᖅ ᐃᓚᐃᓐᓈᕐᓂᐅᔪᒥᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᕆᐊᓚᐅᖅᑐᖅ ᐱᓕᕆᕝᕕᑕᖃᖏᒻᒪᑦ ᐊᔾᔨᐸᓗᓕᒻᒥᑦ ᖃᓄᐃᓕᖓᒍᑎᐅᔪᒥᑦ "V" ᐱᓕᕆᕝᕕᒻᒥ ᓱᓕᔪᒥᑦ ᖃᓄᖅ ᐊᔾᔨᒌᖏᓐᓂᖃᕐᒪᖔᑕ ᐊᔾᔨᒌᓐᓂᖃᕐᒪᖔᑕ ᖃᐅᔨᓴᖅᑕᐅᔪᓐᓇᖅᑐᓂᑦ ᑎᒍᔭᐅᒪᕕᐅᔪᑦ ᐱᓪᓗᒋᑦ. ᖃᐅᔨᒪᖁᔨᓚᐅᖅᑐᖅ "V" ᐱᓕᕆᕝᕕᒻᒥ ᐊᔾᔨᐅᖏᑦᑐᓂᑦ ᐱᓕᕆᔾᔪᑎᒍᑦ ᓴᓂᕐᕙᐃᔭᕋᑦᓴᓂᑦ ᐊᑦᓱᕉᑎᖃᖅᐸᒻᒪᑕ ᐱᔾᔪᑎᒋᓪᓗᒍ ᐊᖏᔪᐊᓘᓂᖓ ᐊᒻᒪ ᓇᒥᑐᐃᓐᓈᖅᑐᓂᑦ ᓄᓇᓕᖃᕐᓂᖏᓐᓄᑦ. ᐊᒻᒪᑦᑕᐅᖅ, ᐱᒻᒪᕆᐅᔪᓂᑦ ᐃᓪᓗᓕᕆᓂᒃᑯᑦ ᐊᑦᓱᕉᑎᖃᕐᒥᔪᑦ ᓄᓇᕘᒥ ᓇᒥᑐᐃᓐᓇᖅ, ᐱᔭᕆᐊᑐᓕᖅᐸᑦᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᐃᓪᓗᖃᖅᑎᑦᓯᓇᓱᐊᕐᓂᕐᒥᑦ ᐃᖅᑲᓇᐃᔭᖅᑎᖏᓐᓄᑦ, ᑕᒪᐅᓇ ᐊᔪᕐᓇᑐᒻᒪᕆᐅᓕᖅᐸᑦᑐᓂ ᐃᓚᓯᒋᐊᑦᓴᖅ ᐃᖅᑲᓇᐃᔭᖅᑎᑦᓴᓂᑦ. ᐅᖃᒃᑲᓐᓂᓚᐅᖅᑐᖅ ᐊᓯᖏᓐᓂᑦ ᐱᑕᖃᕐᒪᑦ ᐱᓕᕆᔾᔪᑎᒍᑦ ᐊᑦᓱᕉᑎᐅᕙᑦᑐᓂᑦ ᐊᔾᔨᐅᖏᑦᑐᓂᑦ ᓄᓇᕘᒦᑦᑐᓂᑦ ᐊᕝᕕᐊᕈᑎᐅᕙᑦᑐᓂᑦ ᐃᖅᑲᓇᐃᔭᖅᑎᓕᕆᓂᕐᒥᑦ.

[117] ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᐅᓯᖃᓚᐅᖅᑐᖅ ᑕᑯᓐᓇᖅᑕᒥᓂᒃ, ᑲᔪᓯᑦᓯᐊᖅᑐᒥᑦ ᐃᓗᓕᖏᓐᓂᑦ ᖃᐅᔨᓴᕐᓂᕐᒥᑦ ᐊᐅᓚᑦᓯᒐᓗᐊᕈᑎᒃ, ᓈᒻᒪᓂᕐᓴᐅᒐᔭᖅᑐᑦ ᖃᐅᔨᓴᖅᑏᑦ ᓇᖕᒥᓂᖅ ᐊᐅᓚᑦᓯᒍᑎᒃ ᖃᐅᔨᓴᐅᑎᓂᑦ ᑕᑯᑦᓴᐅᓗᑎᒃ ᐊᒻᒪ ᓈᒻᒪᑐᒃᑯᑦ ᐱᓕᕆᓗᑎᒃ, ᓂᕈᐊᒐᖃᓚᐅᕐᓗᑎᒃ ᐱᓕᕆᔾᔪᑎᒋᓂᐊᖅᑕᒥᓂᒃ ᐊᒻᒪ ᐊᓯᖏᓐᓂᑦ ᐊᔾᔨᓱᖅᐸᓪᓗᒋᑦ ᖃᐅᔨᓴᕐᒥᓗᑎᒃ ᐊᓯᖏᓐᓂᑦ ᑎᒍᔭᐅᒪᕕᓐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᑕᒪᐅᓇ ᓇᓗᓇᐃᕈᑎᐅᔪᓐᓇᕋᔭᕐᒪᑕ ᑭᖑᓪᓕᖅᐹᓂᑦ ᐃᓱᒪᒋᔭᐅᓕᖅᑐᓂᑦ ᐱᔾᔪᑎᒋᓪᓗᒋᑦ ᐱᑕᖃᕐᓂᖏᑦ ᐱᓕᕆᔾᔪᑎᒍᑦ ᐃᓚᐃᓐᓈᕈᑎᐅᔪᓂᑦ ᒪᓕᑦᓯᒪᒐᔭᕐᓗᑎᒃ ᓇᓗᓇᐃᔭᐃᑎᐅᔪᓂᑦ ᐱᔭᐅᒐᔭᖅᑐᓂᑦ ᖃᐅᔨᓴᖅᑏᑦ ᖃᐅᔨᓴᐅᑎᓂᑦ ᐅᐸᓗᖓᐃᔭᐅᑎᖏᓐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᑐᐃᓐᓇᕈᐃᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᑲᔪᖁᔭᐅᒍᑎᒃ ᐊᑑᑎᓕᓐᓄᑦ ᑮᓇᐅᔭᑎᒍᑦ ᐅᕝᕙᓘᓐᓃᑦ ᐃᖅᑲᓇᐃᔭᐅᑎᒍᑦ ᐱᓕᕆᔾᔪᑎᑦᓴᓂᑦ ᑐᑭᓯᒋᐊᕈᑎᐅᔪᓂᑦ.

ᖃᐅᔨᓴᖅᑏᑦ ᖃᐅᔨᓴᐅᑎᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑭᐅᔾᔪᑎᖏᓐᓂᑦ

[118] ᑐᑭᓯᒋᐊᕈᑎᐅᔪᑦ ᐱᔭᐅᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᓐᓂᑦ ᐱᔾᔪᑎᖃᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᔪᓯᕙᖏᑦᑐᑦ ᖃᓄᖅᑑᕈᑎᒋᕙᑦᑕᖏᑦ ᐊᕐᕌᒍᒐᓴᓂ ᐱᓇᓱᐊᖅᑐᑎᒃ ᑮᓇᐅᔭᒃᑲᓂᕐᓂᒃ, ᐊᒻᒪ ᐃᓱᒫᓘᑎᐅᔪᓂᑦ ᐅᖃᐅᓯᐅᓯᒪᔪᓂᑦ "V" ᐱᓕᕆᕝᕕᐅᑉ ᐊᐅᓚᑦᓯᔨᒻᒪᕆᖏᓐᓄᑦ, ᓇᓗᓇᐃᔭᐃᒃᑲᓂᖅᑐᑦ ᐱᒻᒪᕆᐅᓂᖏᓐᓂᑦ ᐱᓕᕆᔾᔪᑎᑦᓴᑭᓐᓂᐅᕙᑦᑑᑉ ᑭᖕᖓᐃᑦ ᑎᒍᔭᐅᒪᕕᖓᓐᓂ ᐊᒻᒪ ᓇᒥᑐᐃᓐᓇᑦᓯᐊᖅ ᓄᓇᕘᒥ. ᐱᒻᒪᕆᐅᔪᑦ ᐊᑦᑐᐃᔾᔪᑎᐅᔪᑦ ᓈᒻᒪᖏᑦᑐᒻᒪᕆᒻᒥᑦ ᐱᔨᑦᓯᕋᐅᑎᐅᔪᓂᑦ ᐊᒻᒪ ᐱᓕᕆᔾᔪᑎᐅᔪᓂᑦ ᐊᒥᒐᕐᓯᓂᐅᔪᖅ ᓇᓗᓇᐃᔭᖅᑕᐅᓯᒪᑦᓯᐊᖅᑐᑦ ᖃᐅᔨᓴᖅᑏᑦ ᐅᓂᒃᑳᓕᐊᕆᒋᐊᖓᖅᑕᖏᓐᓂ.

[119] ᖃᐅᔨᓴᖅᑏᑦ ᖃᐅᔨᒪᔪᑦ ᐊᒥᓱᓂᑦ ᐊᑦᓱᕉᑎᐅᕙᑦᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓵᖕᖓᕙᑦᑕᖏᓐᓂᑦ ᖃᓄᐃᓕᖓᒍᑎᐅᔪᑦ ᑲᒪᒋᔭᐅᓇᓱᐊᕐᓂᖏᒍᑦ. ᐊᒻᒪᑦᑕᐅᖅ, ᓇᓗᓇᐃᖅᑕᐅᓗᓂ ᐅᖃᐅᓯᐅᓯᒪᒌᕐᒪᑦ ᐅᓂᒃᑳᓕᐊᖏᓐᓂ, ᖃᐅᔨᓴᖅᑏᑦ ᖃᐅᔨᒪᑦᓯᐊᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓄᑑᔾᔨᔪᓐᓇᖏᒻᒪᑕ ᐃᓘᓐᓇᖏᓐᓂᑦ ᐱᔾᔪᑎᐅᔪᓂᑦ ᐱᓕᕆᐊᖃᕐᓗᑎᒃ. ᖃᐅᔨᓴᖅᑏᑦ ᐊᔭᐅᖅᑕᐅᔾᔪᑎᖃᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᖃᐅᔨᒪᓂᕋᑐᐃᓐᓇᖏᒻᒪᑦ ᐊᑲᐅᖏᓕᐅᕈᑎᒥᑦ, ᑭᓯᐊᓂ ᐱᓕᕆᐊᖃᕐᓂᐊᖅᑐᖅ, ᑭᐅᔾᔪᑎᒋᓗᒍ ᖃᐅᔨᓴᖅᑏᑦ ᐊᑐᖁᓯᒪᔭᖏᓐᓂᑦ, ᓇᓗᓇᐃᔭᐃᓂᕐᒥᑦ ᓈᒻᒪᑦᑐᓂᑦ ᐃᖅᑲᓇᐃᔭᖅᑎᑦᓴᓂᑦ ᑭᖕᖓᐃᑦ ᑎᒍᔭᐅᒪᕕᖓᓐᓂ (ᐊᒻᒪ ᐃᓘᓐᓇᖏᓐᓂ ᑎᒍᔭᐅᒪᕕᓐᓂ), ᐊᒻᒪ ᐅᖃᖃᑎᖃᕆᐊᑦᑕᐅᑎᒋᓗᑎᒃ ᒐᕙᒪᒃᑯᓐᓂᑦ ᓄᓇᕘᒧᑦ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᔭᐃᓂᒃᑯᑦ ᓈᒻᒪᑦᑐᓂᑦ ᐱᓕᕆᔾᔪᑎᑦᓴᓂᑦ ᐊᒻᒪ ᑮᓇᐅᔭᑦᓴᓂᑦ ᐱᑎᑕᐅᖃᑦᑕᖁᓗᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓄᓇᕘᒥ ᑎᒍᔭᐅᒪᕕᖏᑦ ᓈᒻᒪᑦᑐᒥᑦ ᐱᔨᑦᓯᕋᐅᑎᖃᖁᓪᓗᒋᑦ ᓄᓇᕘᒥᐅᑕᐃᑦ.

[120] ᖃᓄᐃᓕᖓᒍᑎᐅᔪᑦ ᐊᒻᒪ ᓱᕋᐃᔭᕐᓯᒪᔪᑦ ᓇᓗᓇᐃᔭᖅᑕᐅᓯᒪᔪᑦ ᖃᐅᔨᓴᖅᑏᑦ ᐅᓂᒃᑳᓕᐊᖏᓐᓂ ᕿᓄᓪᓚᕆᑦᑐᑦ ᖃᓄᐃᓕᐅᕈᑎᑦᓴᖃᕈᒪᓪᓗᑎᒃ. ᖃᐅᔨᓴᖅᑏᑦ ᑐᖕᖓᓱᑦᑎᑦᓯᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑕ ᐱᓕᕆᐊᕆᔪᒪᔭᖏᓐᓂᑦ ᑲᒪᒋᔭᐅᖁᓪᓗᒍ ᖃᓄᐃᓕᖓᒍᑎᐅᔪᖅ, ᐊᒻᒪᑦᑕᐅᖅ ᐱᓕᕆᓂᐅᔪᒪᔪᒥᑦ ᑭᖑᕝᕖᓂᕐᒥᑦ ᑭᖕᖓᐃᑦ ᑎᒍᔭᐅᒪᕕᖓᑕ ᐃᓪᓗᖓᓂᑦ. ᖃᐅᔨᓴᖅᑏᑦ ᐃᓱᒪᔫᒐᓗᐊᑦ ᑕᒪᒃᑯᐊ ᐱᓕᕆᔾᔪᑎᐅᔪᑦ ᐊᓯᔾᔨᐅᑎᓪᓚᕆᓐᓂᑦ ᓴᖅᑮᔪᓐᓇᖅᑐᑦ ᓄᓇᒥ, ᐊᒻᒪ ᐱᓕᕆᔾᔪᑎᑦ ᓯᕗᒧᐊᒍᑎᐅᑦᓯᐊᑐᑦᓴᓂᑦ ᓈᒻᒪᑦᑐᓂᑦ ᐸᓖᓯᓕᕆᔪᓂᑦ ᐱᔨᑦᓯᕋᐅᑎᓕᕆᔪᑦᓴᓂᑦ ᑭᖕᖓᕐᓂ ᐊᒻᒪ ᓇᒥᑐᐃᓐᓇᖅ ᐃᓗᐊᓂ ᓄᓇᕘᑉ.

[121] ᐱᔾᔪᑎᒍᓪᓗᒍ ᐱᑕᖃᑐᐃᓐᓇᕆᐊᖃᕐᓂᖓ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᔪᒥᑦ, ᖃᐅᔨᓴᖅᑏᑦ ᖃᐅᔨᒪᓂᕋᖅᑐᑦ ᐱᔭᕆᐊᑐᓂᖏᓐᓂᑦ ᐊᐅᓚᑦᑎᓂᕐᒥᑦ ᖃᐅᔨᓴᖅᑕᐅᒋᐊᓕᓐᓂᑦ ᐱᓪᓗᒍ ᐱᔾᔪᑎᐅᔪᖅ, ᒪᓕᑦᑐᒋᑦ ᓇᓗᓇᐃᔭᖅᑕᐅᓯᒪᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑕ ᑭᐅᔾᔪᑎᖏᓐᓂ. ᖃᐅᔨᓴᖅᑏᑦ ᐃᓱᒪᒋᔭᐃᓐᓇᖃᖅᑎᓪᓗᒋᑦ ᑕᑯᓐᓇᕐᓂᖏᓐᓂᑦ ᖃᐅᔨᓴᖅᑕᐅᑲᓐᓂᕆᐊᖃᕐᒪᑕ ᐆᒪ ᐱᔾᔪᑎᒋᔭᖏᑦ, ᖃᐅᔨᓴᖅᑏᑦ ᖃᐅᔨᒪᖁᔨᔪᑦ ᑐᕌᒐᐅᔭᕆᐊᖃᕐᓂᖓᓄᑦ ᓯᕗᓪᓕᖅᐹᒥ ᑐᐊᕕᕐᓗᑎᒃ ᖃᓄᐃᓕᐅᕆᐊᕐᓂᕐᒥᑦ ᐱᔾᔪᑎᒋᓪᓗᒍ ᖃᓄᐃᓕᖓᒍᑎᐅᔪᖅ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᖏᕐᓯᒪᓕᖅᑕᖏᓐᓂᑦ. ᑲᒪᒋᔭᐅᒋᐊᕐᓂᖏᑦ ᐱᓕᕆᔾᔪᑎᑦᓴᑭᓐᓂᐅᕙᑦᑐᖅ ᐊᑐᖅᑕᐅᒋᐊᖃᓪᓚᕆᑦᑐᖅ ᐊᒻᒪ ᐱᒻᒪᕆᐅᓂᖅᐹᖑᓗᓂ ᓯᕗᓪᓕᖅᐹᒥ ᐱᓕᕆᐊᕆᓗᒍ ᐋᖅᑭᑦᓱᐃᒋᐊᕐᓂᕐᒥᑦ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᑐᐃᓐᓇᕆᐊᓕᓐᓂᑦ ᐱᒋᐊᕈᑎᐅᓯᒪᔪᓂᑦ.

[122] ᖃᐅᔨᓴᖅᑏᑦ ᐅᖃᕆᐊᑲᓐᓂᖅᑐᑦ ᑲᓇᑕᒥᐅᑕᐃᑦ ᐱᑎᑕᐅᒋᐊᖃᖅᐸᒻᒪᑕ ᓈᒻᒪᑦᑐᒥᑦ ᐱᔨᑦᓯᕋᖅᑕᐅᓂᒃᑯᑦ, ᓇᒥᒥᐅᑕᐅᒐᓗᐊᕈᑎᒃ. ᐃᓅᖃᑎᒌᒃᑯᑦ ᐊᑲᐅᖏᓕᐅᕈᑎᐅᕙᑦᑐᑦ ᐊᑦᑐᐃᓯᒪᕙᑦᑐᑦ ᓄᓇᓕᐅᔪᓂᑦ ᓄᓇᕘᒥ ᐊᒻᒪ ᓇᒥᑐᐃᓐᓇᖅ ᑲᓇᑕᐅᑉ ᐃᓗᐊᓂ ᐊᒥᓲᒻᒪᑕ ᐊᔾᔨᒌᖏᑦᑐᑦ. ᐊᑑᑎᒋᔭᖏᑦ ᐸᓖᓯᒃᑯᑦ ᑭᐅᓚᐅᖅᑐᑦ ᐱᓪᓗᒋᑦ ᐊᑦᑐᐃᔾᔪᑎᐅᓯᒪᔪᑦ ᐃᓅᖃᑎᒌᒃᑯᑦ ᐊᑲᐅᖏᓕᐅᕈᑎᓂᑦ ᐊᔾᔨᒌᖏᑦᑐᓂᑦ ᐃᓗᓕᖃᖅᐸᑦᑐᑦ ᐊᒻᒪ ᐊᖏᖃᑎᒌᒍᑎᐅᓗᐊᖅᐸᒐᑎᒃ. ᑭᓯᐊᓂᓕ, ᐊᖏᖃᑎᒌᒍᑎᐅᓚᐅᖅᑐᑦ ᓇᓗᓇᓚᐅᖏᑐᒻᒪᕆᓐᓂᑦ ᓈᒻᒪᖏᑦᑐᓂᑦ ᐱᔨᑦᓯᕋᐅᑎᐅᔪᓂᑦ ᑕᑯᓐᓇᖅᑕᐅᓚᐅᖅᑐᓂᑦ ᑕᕝᕙᓂ ᐱᓕᕆᐊᖑᔪᒥ.

[123] ᓱᕋᐃᔭᕐᓯᒪᔪᑦ ᖃᐅᔨᔭᐅᓚᐅᖅᑐᑦ ᖃᐅᔨᓴᖅᑎᓄᑦ ᖃᐅᔨᓴᖅᑐᓄᑦ ᐊᑐᖅᑕᐅᓚᐅᖅᑐᑦ, ᓱᓕᓪᓗᑎᒃ, ᖃᐅᔨᓴᖅᑏᑦ ᑕᑯᕙᖏᑕᖏᓐᓂ ᐊᓯᖏᓐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑎᒍᔭᐅᒪᕕᖏᓐᓂ ᐊᓯᖏᓐᓂ ᓄᓇᓕᖃᕐᕕᓐᓂ. ᖃᐅᔨᓴᖅᑏᑦ ᑐᖕᖓᓱᑦᑎᑦᓯᓯᐊᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᕆᖃᑎᖃᕈᒪᓂᖏᓐᓂᑦ ᖃᐅᔨᓴᖅᑎᓂᑦ ᖃᐅᔨᓴᐃᓂᒃᑯᑦ ᐱᑕᖃᑐᐃᓐᓇᕆᐊᖃᕐᓂᖓᓂᑦ ᐱᓕᕆᔾᔪᑎᒍᑦ ᐃᓚᐃᓐᓈᕐᓂᐅᔪᒥᑦ ᐊᒻᒪ ᐊᔭᐅᕆᓪᓗᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᒪᑭᒪᑎᑦᓰᓐᓇᕆᐊᓖᑦ ᓈᓴᐅᑎᓂᑦ ᐊᑦᑐᐊᔪᓂᑦ ᐱᔨᑦᓯᕋᐅᑎᐅᒋᐊᓕᓐᓄᑦ ᐊᒻᒪ ᑮᓇᐅᔭᐅᒋᐊᓕᓐᓄᑦ ᓄᓇᕘᒥ ᑎᒍᔭᐅᒪᕕᖏᓐᓂ. ᑕᒪᒃᑯᐊ ᐱᓪᓗᒋᑦ, ᖃᐅᔨᓴᖅᑏᑦ ᐋᖅᑭᒋᐊᕆᓂᐊᖅᑐᑦ ᐊᑐᖁᓯᒪᔭᕐᒥᓂᒃ #19-ᒥᑦ.  

ᑭᖑᓪᓕᖅᐹᑦ ᐊᑐᖁᔭᖅ #19: ᖃᐅᔨᓴᖅᑕᐅᑲᓐᓂᕆᐊᓖᑦ ᐱᓕᕆᔾᔪᑎᒍᑦ ᐃᓚᐃᓐᓈᖅᑐᖃᖅᐸᒻᒪᖔᖅ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒪᑭᒪᑎᑦᓰᓐᓇᕆᐊᓖᑦ ᓈᓴᐅᑎᓂᑦ ᐊᑦᑐᐊᔪᓂᑦ ᐱᔨᑦᓯᕋᐅᑎᐅᒋᐊᓕᓐᓄᑦ ᐊᒻᒪ ᑮᓇᐅᔭᓄᑦ ᐊᑦᑐᐊᔪᓂᑦ ᓄᓇᕘᒥ ᑎᒍᔭᐅᒪᕕᖏᓐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᓗᓇᐃᕐᓯᒪᒋᐊᓖᑦ ᓈᒻᒪᑦᑐᓂᑦ ᐱᔨᑦᓯᕋᐅᑎᓂᑦ ᐊᑐᐃᓐᓇᖃᕐᓂᕐᒥᑦ ᐃᓘᓐᓇᖏᓐᓄᑦ ᑲᓇᑕᒥᐅᑕᓕᒫᑦᓯᐊᓄᑦ ᐃᓱᒪᒋᖏᓯᐊᕐᓗᒋᑦ ᓇᒥᒥᐅᑕᐅᓂᖏᓐᓂᑦ.

ᖃᓄᐃᓕᐅᕈᑎᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᑭᐅᔾᔪᑎᐅᓗᓂ ᐱᔾᔪᑎᐅᔪᒥᑦ

[124] ᓇᓗᓇᐃᔭᐃᑎᐅᔪᑦ ᓵᖓᓃᑦᑐᑦ ᖃᐅᔨᓴᖅᑏᑦ ᑕᑯᑦᓴᐅᑎᑦᓯᓚᐅᖅᑐᑦ, ᑭᖑᓂᑦᓯᐊᖏᓐᓂ ᖃᓄᐃᒍᑎᐅᓚᐅᖅᑐᑦ ᔪᓂ 1-2, 2020, ᐃᓗᐊᓂ ᐱᓕᕆᕝᕕᐅᑉ ᐅᖃᐅᓯᐅᓕᕇᓚᐅᕐᒪᑕ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᖃᓄᐃᒍᑎᐅᓚᐅᖅᑐᑦ ᓴᖅᑮᔪᓐᓇᕐᒪᖔᑕ ᒪᓕᒐᑎᒍᑦ ᐱᓇᓱᐊᕈᑎᑦᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ. ᐃᓱᒪᓕᐅᕆᓕᓚᐅᖅᑐᑦ ᖃᐅᔨᒋᐊᖁᔭᐅᓗᓂ A.B. ᐱᔾᔪᑎᐅᔪᖅ ᐋᖅᑭᑦᑕᐅᔪᓐᓇᖏᒃᑲᓗᐊᕐᒪᖔᖅ ᐱᓕᕆᔾᔪᑎᓂᑦ ᐊᑐᖏᓪᓗᑎᒃ ᐃᖅᑲᖅᑐᐃᕕᒃᑯᑦ; A.B. ᖃᐅᔨᒋᐊᖅᑕᐅᒐᔭᖅᑐᖅ ᓈᒻᒪᑦᓴᕋᔭᕐᒪᖔᖅ ᑮᓇᐅᔭᑎᒍᑦ ᐋᖅᑭᑦᓱᐃᔾᔪᑎᐅᓗᓂ.

[125] ᑕᒪᐅᓇᓕ, ᓄᓇᓕᖃᕐᕕᓐᓂᑦ ᐊᐅᓚᑦᓯᔨᐅᔪᖅ ᓄᐊᕐᖦ ᐅᐊᔅ ᐊᑭᓕᕐᓱᐃᔾᔪᑎᓂᑦ, ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services) "K" ᐱᓕᕆᕝᕕᒻᒥ (ᐃᐅᓪᐴᕐᑕ) (ᐊᐅᓚᑦᓯᔨᐅᔪᑦ ᐱᓇᓱᐊᕈᑎᐅᔪᓂᑦ ᐊᑦᑐᐊᔪᓂᑦ ᓄᓇᕘᒦᑦᑐᓂᑦ) ᐅᖄᓚᓚᐅᖅᑐᑦ A.B.-ᒧᑦ ᔪᓂ 18-ᖑᑎᓪᓗᒍ, 2020. A.B. ᐅᖄᓚᓕᓚᐅᖅᑐᖅ ᐊᐅᓚᑦᓯᔨᒧᑦ ᐅᖃᐅᓯᖃᒃᑲᓐᓂᕈᒪᓪᓗᓂ ᐱᔾᔪᑎᐅᔪᒥᑦ. ᐅᖃᖃᑎᒌᓐᓂᒃᑯᑦ, ᐊᐅᓚᑦᓯᔨᐅᔪᖅ ᐱᑎᑦᓯᒍᒪᓚᐅᖅᑐᖅ A.B.-ᒥᑦ $7,000-ᓂᑦ ᑮᓇᐅᔭᓂᑦ ᐋᖅᑭᑦᑕᐅᔾᔪᑎᒋᓂᐊᕐᓗᒍ ᐱᔾᔪᑎᐅᔪᒥᑦ.

[126] ᐊᐅᓚᑦᓯᔨᐅᔪᑦ ᓯᕗᓪᓕᕐᒥ ᖃᐅᔨᒋᐊᕋᒥᐅᒃ ᑭᒡᒐᖅᑐᐃᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ, A.B. ᐋᓐᓂᐊᓯᐅᑎᑯᓐᓃᓚᐅᖅᑐᖅ ᐃᓱᒪᓕᕆᕝᕕᒻᒥ. ᐊᑦᓱᑲᓪᓚᒃ ᐋᓐᓂᑎᖅᑕᐅᕋᑖᒥᓂᐅᓗᓂ ᐃᓪᓗᕈᓯᕐᓂ ᑎᒍᔭᐅᒪᕕᓐᓂ, ᐊᐳᖅᑕᐅᓚᐅᖅᑐᓂ ᒪᑐᐊᓄᑦ ᐸᓖᓯᒃᑯᑦ ᓄᓇᒃᑰᔫᖓᑕ, ᒪᓕᑦᑐᒋᑦ ᐊᐅᓚᔫᒃᑯᑦ ᐊᔾᔨᓕᐅᖅᑕᐅᓯᒪᔪᑦ ᑕᑯᔭᐅᓚᐅᖅᑐᒧᑦ ᐊᒥᓱᒻᒪᕆᐅᔪᓄᑦ ᑐᓴᐅᒪᑎᑦᓯᔾᔪᑎᒃᑯᑦ. ᐅᖃᐅᓯᖃᖅᑐᒥᓂᑦ ᐃᓅᓯᕐᒥᓂᒃ ᐃᖕᒥᓂᒃ ᑭᐱᓯᔪᒪᒋᐊᑦᓴᖅ ᐊᒻᒪ ᐊᑐᖅᑎᑕᐅᓗᓂ ᐊᔾᔨᒌᖏᑦᑐᓂᑦ ᐃᖕᒥᓄᑦ ᐊᑦᓱᕉᑎᒋᔭᖏᓐᓂᑦ. ᐊᒻᒪᑦᑕᐅᖅ, A.B. ᐅᖃᓕᒪᓲᖑᒐᓗᐊᕐᒪᑦ ᐊᒻᒪ ᑐᑭᓯᐊᓗᓂ ᖃᓪᓗᓈᑎᑐᑦ ᐅᖃᐅᓯᕐᒥᑦ, ᐅᖃᐅᓯᒃᑯᑦ ᓯᕗᓪᓕᖅᐹᕆᖏᑕᖓ.

[127] ᑕᑯᓐᓇᖅᑐᒍ, ᑖᓐᓇ ᖃᓄᐃᓕᖓᒍᑎᐅᔪᖅ ᓴᖅᑮᔪᖅ ᐃᓱᒫᓘᑎᐅᔪᓂᑦ ᑭᓇᑐᐃᓐᓇᖅ ᑕᐃᒫᒃ ᐊᑐᖅᑐᖅ ᐅᓗᕆᐊᓇᖅᑐᒦᒍᓐᓇᕐᒪᑦ ᐊᒻᒪ ᐃᒻᒪᖄ ᐱᓕᕆᔾᔪᑎᐅᓯᒪᓗᓂ ᐊᔾᔨᐅᖏᑎᑕᐅᓗᓂ, ᐊᒻᒪ/ᐅᕝᕙᓘᓐᓃᑦ ᑐᑭᓯᒪᑦᑎᐊᖏᓪᓗᓂ ᑐᓴᐅᒪᑦᑎᐊᕐᓗᓂ ᐃᓱᒪᓕᐅᕆᔪᓐᓇᕐᓂᖓᓄᑦ ᐱᔾᔪᑎᖃᖅᑐᓂᑦ ᐊᑭᓕᕐᓱᐃᔾᔪᑎᐅᔪᒪᔪᓂᑦ.

[128] ᑕᕝᕙᓂ ᐱᓕᕆᐊᖑᔪᒥ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᐅᓚᑦᓯᔨᐅᔪᑦ ᐅᖃᕐᓂᕐᒪᑦ A.B.-ᒧᑦ ᐊᑕᐅᓯᐊᕋᓂ ᖃᐅᔨᒋᐊᖁᓪᓗᓂᐅᒃ ᒪᓕᒐᓕᕆᔨᓂᑦ ᐊᖏᓚᐅᖏᓂᕐᒥᓂ ᐋᖅᑭᒍᑎᑦᓴᓂᑦ, ᐊᒻᒪ ᑲᔪᓯᒍᒪᓚᐅᕋᓂ ᑖᓐᓇ ᐱᓕᕆᐊᖑᓚᐅᖏᓐᓂᖓᓂ. ᓇᓗᓇᐃᔭᐃᑎᖃᓚᐅᖏᑦᑐᖅ A.B. ᐃᓕᕋᓱᐊᑎᑕᐅᓐᓂᕆᐊᖓ ᐅᕝᕙᓘᓐᓃᑦ ᐊᔪᐃᓐᓈᖑᓐᓂᕆᐊᖓ ᐊᖏᖅᑎᑕᐅᓗᓂ ᐱᖁᔭᐅᔪᒥᑦ ᐋᖅᑭᒍᑎᐅᖁᔭᐅᔪᒥᑦ. ᑭᓯᐊᓂᓕ, ᐱᖃᑕᐅᒍᒪᑐᐃᓐᓇᑦᓯᐊᓚᐅᖅᑐᖅ ᐅᖃᒪᔭᐅᑎᓕᓐᓂᑦ, ᐊᐱᕆᕙᑦᑐᓂ ᐊᓯᖏᓐᓂᑦ ᐊᑕᐅᓯᐊᕋᓂ ᐅᖄᓚᒍᓐᓇᕐᒪᖔᖅ ᐊᐅᓚᑦᓯᔨᒧᑦ ᐅᖃᐅᓯᖃᒃᑲᓐᓂᕐᓂᐊᕐᒪᑎᒃ ᐱᔾᔪᑎᐅᔪᒥᑦ. ᑭᖑᓂᐊᒍᑦ, A.B. ᐱᓕᓚᐅᖅᑐᖅ ᒪᓕᒐᓕᕆᔨᓂᑦ ᐊᒻᒪ ᒪᓕᒐᓕᕆᔨᖓ ᓱᓕ ᐅᐸᓗᖓᐃᔭᐃᓚᐅᖅᑐᖅ ᐋᔩᕈᑎᖃᖅᑐᓂ ᐋᖅᑭᑦᓱᐃᔾᔪᑎᐅᑐᐃᓐᓇᕆᐊᓕᒻᒥᑦ ᑭᒡᒐᑐᖅᑐᓂᐅᒃ ᖃᐅᔨᓴᖅᑏᑦ ᐊᐱᕐᓱᓕᖅᑎᓪᓗᒋᑦ A.B.-ᒥᑦ.

[129] ᖃᐅᔨᓴᖅᑏᑦ ᖃᐅᔨᒪᖁᔨᓚᐅᖅᑐᑦ, ᐱᑕᖃᓗᐊᖏᒃᑲᓗᐊᖅᑎᓪᓗᒋᑦ ᐃᓱᒫᓘᑎᐅᒐᔭᖅᑐᑦ ᐱᓕᕆᐊᖑᔪᒥ, ᑕᐃᒪᐃᑦᑐᑦ ᐱᔾᔪᑎᐅᔪᑦ ᐃᓄᑑᔾᔭᐅᒋᐊᖃᖏᓯᐊᖅᑐᑦ ᐅᑉᐱᕈᓲᑎᖏᓐᓂᑦ ᐊᑐᕐᓗᑎᒃ ᐱᓕᕆᖃᑕᐅᔪᑦ. ᑕᒪᓐᓇ ᐱᔾᔪᑎᒋᓪᓗᒍ, ᖃᐅᔨᓴᖅᑏᑦ ᖃᐅᔨᒪᕈᒪᓕᓚᐅᖅᑐᑦ ᐊᑐᖅᑕᐅᕙᑦᑐᓂᑦ ᐊᑐᐊᒐᕐᓂᑦ ᐊᒻᒪ ᐱᓕᕆᔾᔪᑎᓂᑦ ᓇᓗᓇᐃᕈᒪᓪᓗᑎᒃ ᓈᒻᒪᑦᑐᓂᑦ ᐊᑦᑕᓇᔾᔭᐃᑯᑎᑦᓴᓂᑦ ᐱᑕᖃᕋᓗᐊᕐᒪᖔᑕ.

[130] ᖃᐅᔨᓴᖅᑕᐅᓪᓗᑎᒃ ᐊᑐᖅᑕᐅᕙᑦᑐᑦ ᑮᓇᐅᔭᓕᕆᓂᕐᒥᑦ ᑲᑎᒪᔨᓄᑦ ᐊᑐᐊᒐᐃᑦ, ᖃᐅᔨᓴᖅᑏᑦ ᐃᓱᒫᓘᑎᖃᓚᐅᖅᑐᑦ ᑲᓇᑕᒥ ᐊᑐᐊᒐᖅᑕᖃᖏᓐᓂᖓᓄᑦ ᐱᓪᓗᐊᑕᐅᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᐅᓚᑦᓯᔾᔪᑎᖏᓐᓂᑦ ᐊᑭᓕᖅᑕᐅᓇᓱᐊᕈᑎᓂᑦ, ᐱᑕᖃᕋᓂᓗ ᐊᑐᐊᒐᕐᓂᑦ ᓄᓇᓕᖃᕐᕕᓐᓂ ᐅᕝᕙᓘᓐᓃᑦ ᐱᓕᕆᕝᕕᓐᓂ. ᓯᕗᓪᓕᕐᒥ ᑲᓇᑕᒥ ᐊᑐᐊᒐᐅᔪᕕᓂᐅᒐᓗᐊᖅ ᖁᔭᓈᖅᑕᐅᓯᒪᔪᖅ ᐊᒻᒪ ᑭᖑᕝᕕᖅᑕᐅᓚᐅᕐᓯᒪᒐᓂ. ᑕᐃᒫᑦᑕᐅᖅ, ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐊᑐᐊᒐᖃᓚᐅᖏᒻᒥᔪᑦ ᐊᐅᓚᑦᓯᔾᔪᑎᐅᔪᓂᑦ ᐊᐅᓚᑦᓯᔾᔪᑎᖏᓐᓂᑦ, ᐱᓪᓗᐊᑕᐅᔪᒥᑦ ᐱᓕᒻᒪᑦᓴᐅᑎᓄᑦ ᐱᓕᕆᐊᑦᓴᖅᑕᖃᕋᓂ ᐊᑐᖅᑕᐅᔪᓐᓇᖅᑐᒥᑦ ᐃᖅᑲᓇᐃᔭᖅᑎᖏᓐᓄᑦ ᖃᓄᖅ ᐊᐅᓚᑦᓯᒋᐊᖃᕐᓂᖏᓐᓂᑦ ᐱᓇᓱᐊᕈᑎᐅᔪᓂᑦ. ᐱᓪᓗᒋᑦ ᐱᔾᔪᑎᐅᔪᑦ ᓴᖅᑭᑐᐃᓐᓇᕆᐊᓕᐅᔪᑦ ᐋᔩᕈᑎᖃᑕᐅᑎᓪᓗᒋᑦ ᐅᓗᕆᐊᓇᖅᑐᒦᒍᓐᓇᖅᑐᑦ ᑭᒃᑯᑐᐃᓐᓇᐃᑦ, ᖃᐅᔨᓴᖅᑏᑦ ᖃᐅᔨᓚᐅᖅᑐᑦ ᐊᓯᖏᓐᓂᑦ ᐊᑐᐊᒐᕐᓂᑦ ᐊᒻᒪ ᐱᓕᒻᒪᑦᓴᐅᑎᑦᓴᓂᑦ ᐱᑕᖃᕆᐊᖃᖅᑐᖅ.

ᖃᐅᔨᔭᐅᔪᖅ #32: ᑐᑭᓯᒋᐊᕈᑎᑕᖃᖏᑦᑐᖅ ᐃᓱᒪᓕᐅᕆᔾᔪᑎᑦᓴᒥᑦ A.B. ᐃᓕᕋᓇᕐᓵᖑᓐᓂᕐᒪᖔᖅ ᐅᕝᕙᓘᓐᓃᑦ ᐊᔪᐃᓐᓈᖑᓐᓂᕐᒪᖔᖅ ᐊᖏᖁᔭᐅᓗᓂ ᐱᖁᔭᐅᔪᒥᑦ. ᐊᐅᓚᑦᑎᔨ ᖃᐅᔨᒋᐊᕐᓯᒪᔪᒥᓂᖅ ᑖᑦᓱᒥᖓ ᑭᒡᒐᖅᑐᐃᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᒪᓕᑦᑑᔮᓚᐅᖅᑐᖅ ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᑎᕋᖅᑎᖏᑕ ᐊᑐᐊᒐᖏᓐᓂᑦ ᐊᐅᓚᑦᑎᔾᔪᑎᐅᕙᑦᑐᓂᑦ ᖃᓄᖅ ᐊᐅᓚᑕᐅᒋᐊᖃᕐᓂᖏᓐᓂᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐊᔾᔨᒌᖏᑦᑐᓂᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᑦ, ᐊᒻᒪ ᐊᑕᐅᓯᐊᕋᑎᒃ ᐃᓱᒪᓕᐅᕆᕙᓚᐅᖅᑐᑦ A.B. ᑐᑭᓯᒋᐊᖁᔭᐅᓗᓂ ᒪᓕᒐᓕᕆᔨᒥᑦ ᐅᖃᐅᓯᖃᒃᑲᓐᓂᓚᐅᖏᓂᕐᒥᓂ ᐱᖁᔭᐅᔪᓂᑦ.

ᖃᐅᔨᔭᐅᔪᖅ #33: ᐅᐱᓐᓇᕋᓂ ᐃᓱᒫᓘᑎᑕᖃᕐᒪᑦ ᑭᓇᑐᐃᓐᓇᖅ A.B.-ᑎᑐᑦ ᐊᑐᖅᑐᑦ ᐅᓗᕆᐊᓇᖅᑐᒦᒍᓐᓇᕐᒪᑕ ᐊᒻᒪ ᐱᓕᕆᔾᔪᑎᐅᑐᐃᓐᓇᕆᐊᖃᖅᑐᑎᒃ ᐊᔾᔨᒋᑎᑕᐅᖏᓪᓗᑎᒃ, ᐊᒻᒪ/ᐅᕝᕙᓘᓐᓃᑦ ᖃᓄᐃᒍᑎᖃᕐᓗᑎᒃ ᑕᐃᒫᑦᓯᐊᖅ ᐃᓱᒪᓕᐅᕆᔪᓐᓇᕐᓂᖏᓐᓂᑦ ᐊᑐᖅᑕᐅᔪᓐᓇᖅᑐᒥᑦ ᓴᖅᑭᑕᐅᓯᒪᔪᑦ ᐱᔾᔪᑎᒋᓪᓗᒋᑦ, ᐅᓗᕆᐊᓇᖅᑐᒦᔾᔭᐃᑯᑎᑦᓴᓂᑦ ᐋᖅᑭᑦᓱᐃᒋᐊᓕᐅᔪᑦ ᐊᑐᐊᒐᑎᒍᑦ, ᐱᓕᕆᔾᔪᑎᒍᑦ ᐊᒻᒪ ᐱᓕᒻᒪᑦᑕᐅᑎᒍᑦ.

ᖃᐅᔨᔭᐅᒋᐊᖓᐅᑎ #34: ᐃᓱᒫᓗᓇᖅᑐᖅ ᖃᐅᔨᓴᖅᑎᓄᑦ ᐱᑕᖃᖏᒻᒪᑦ ᑲᓇᑕᒥ, ᓄᓇᓕᖃᕐᕕᓐᓂ ᐅᕝᕙᓘᓐᓃᑦ ᐱᓕᕆᕝᕕᖏᓐᓂ ᐊᑐᐊᒐᐅᔪᓂᑦ ᐊᑐᖅᑕᐅᕙᑦᑐᓂᑦ ᐱᔾᔪᑎᖃᓪᓗᐊᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᓕᕆᔾᔪᑎᒋᕙᑦᑕᖏᓐᓂ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐱᓪᓗᒍ. ᐃᓱᒫᓗᓇᕐᒥᔪᖅ ᐅᑯᐊ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐋᔩᖅᑏᑦ ᐃᖅᑲᖅᑐᐃᕕᒻᒥ ᐊᒻᒪ ᐅᖃᐅᔾᔪᐃᒋᐊᖅᑏᑦ ᐊᑐᐊᒐᖃᖏᒻᒪᑕ ᐊᐅᓚᑦᑎᔾᔪᑎᓂᑦ ᐊᐅᓚᑦᓯᔾᔪᑎᖏᓐᓂᑦ, ᐱᓪᓗᐊᑕᐅᔪᓂᑦ ᐱᑕᖃᕋᓂᓗ ᐱᓕᒻᒪᑦᓴᐃᑎᑦᓴᓂᑦ ᐱᓕᕆᐊᑦᓴᒥᑦ ᐃᖅᑲᓇᐃᔭᖅᑎᖏᓐᓅᖓᔪᒥᑦ ᖃᓄᖅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᓂᑦ ᐊᐅᓚᑦᑎᒋᐊᖃᕐᒪᖔᑕ.  

ᓯᕗᓪᓕᖅ ᐊᑐᖁᔭᖅ #16: ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᓕᐅᕆᐊᓖᑦ ᑲᓇᑕᒥ, ᐱᓕᕆᕝᕕᖃᕐᕕᓐᓂ ᐊᒻᒪ ᐸᓖᓯᖃᕐᕕᓐᓂ, ᒪᓕᓪᓗᑎᒃ ᐱᑕᖃᕆᐊᖃᕐᓂᖏᓐᓂᑦ, ᐊᐅᓚᑦᓯᔾᔪᑎᑦᓴᓂᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᓂᑦ ᐃᖅᑲᖅᑐᐃᕕᒻᒥᑦ ᐊᒻᒪ ᒪᓕᒐᓕᕆᓂᒃᑰᖏᑦᑐᖅ ᐊᑭᓕᕐᓱᐃᑎᓂᑦ.

ᐊᑐᖁᔭᖅ #17: ᐊᑐᐊᒐᐃᑦ ᖃᓄᖅ ᐊᐅᓚᑕᐅᒋᐊᖃᕐᒪᖔᑕ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐃᖅᑲᖅᑐᐃᕕᒻᒥ ᐱᑕᖃᕆᐊᓕᐅᒐᓗᐊᑦ ᑎᑎᕋᕐᓯᒪᔪᓂᑦ ᓴᐳᒻᒥᑦᓯᔾᔪᑎᑦᓴᓂᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᑭᒃᑯᑐᐃᓐᓇᕐᓂᒃ, ᐱᖃᓯᐅᔾᔭᐅᓗᓂ ᐊᑐᕆᐊᖃᖅᑎᑕᐅᔪᖅ ᑭᒃᑯᑐᐃᓐᓇᐃᑦ ᑕᑯᒋᐊᕐᓯᒪᖁᔭᐅᕙᓪᓗᑎᒃ ᒪᓕᒐᓕᕆᔨᓂᑦ ᐊᑎᓕᐅᓚᐅᖏᓐᓂᖏᓐᓂ ᐱᑎᑕᐅᔾᔪᑎᒥᑦ ᐊᖏᕈᑎᒥᑦ, ᐅᕝᕙᓘᓐᓃᑦ ᐅᖃᐅᓯᖃᕐᓗᑎᒃ ᐊᑐᕈᓐᓃᑎᑦᓯᓗᑎᒃ ᑖᑦᓱᒥᖓ ᐱᔪᓐᓇᐅᑎᒥᓂᒃ. ᐊᑐᐊᒐᐃᑦ ᐱᑕᖃᕆᐊᖃᕐᒥᔪᑦ ᑎᑎᕋᕐᓯᒪᔪᓂᑦ ᐱᓕᕆᔾᔪᑎᑦᓴᖏᓐᓂᑦ ᐊᐅᓚᑦᓯᔨᐅᔪᑦ ᐊᒻᒪ ᖃᐅᔨᓴᖅᑎᐅᔪᑦ ᓇᓗᓇᐃᕐᓯᒪᕙᓐᓂᒃᑯᑦ ᑭᒃᑯᑐᐃᓐᓇᐃᑦ ᑐᑭᓯᒪᑦᑎᐊᕆᐊᖃᕐᓂᖏᓐᓂᑦ ᐅᐸᓗᖓᐃᔭᐅᑎᒥᑦ ᐊᒻᒪ ᑕᐃᒎᓯᐅᔪᑦ ᑎᑎᕋᕐᓯᒪᔪᑦ ᐱᑎᑕᐅᔾᔪᑎᐅᖁᔭᐅᔪᓂ.

ᐊᑐᖁᔭᖅ #18: ᐱᓕᒻᒪᑦᓴᐃᑎᑦᓴᓂᑦ ᐋᖅᑭᑦᓱᐃᒋᐊᓖᑦ ᐊᒻᒪ ᐱᒋᐊᖅᑎᑕᐅᓗᑎᒃ ᐃᖅᑲᓇᐃᔭᖅᑎᓄᑦ ᐱᓕᕆᐊᖃᖅᐸᑦᑐᓄᑦ ᐊᑭᓕᖅᑕᐅᔾᔪᑎᑦᓴᓂᑦ ᐊᐅᓚᑦᓯᓪᓗᑎᒃ.

ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑲᒥᓯᓇᖓᑕ ᑭᐅᔾᔪᑎᖓ

[131] ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᖃᐅᔨᓴᖅᑏᑦ ᖃᐅᔨᔭᖏᓐᓂᑦ ᐱᔾᔪᑎᒋᓪᓗᒍ ᖃᓄᐃᓕᖓᒍᑎᐅᔪᖅ ᐱᓕᕆᔾᔪᑎᒍᑦ, ᑭᓯᐊᓂ ᐊᖏᖃᑎᖃᓚᐅᖏᑦᑐᖅ ᐃᓚᖏᓐᓂᑦ ᖃᐅᔨᔭᐅᔪᓂᑦ ᐱᔾᔪᑎᒋᓪᓗᒋᑦ ᐊᑐᐊᒐᖃᑦᓯᐊᖏᓐᓂᐅᔪᖅ ᐊᒻᒪ ᐱᒋᐊᖅᑎᑦᓯᖁᔨᓂᐅᔪᖅ ᐊᑦᑕᓇᔾᔭᐃᒃᑯᑎᑦᓴᓂᑦ ᐊᑐᐊᒐᑎᒍᑦ ᐊᒻᒪ ᐱᓕᒻᒪᑦᓴᐃᔨᑎᒍᑦ (ᖃᐅᔨᔭᐅᔪᑦ #33 ᐊᒻᒪ #34).

[132] ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᑲᓇᑕᒥ ᐊᑭᓕᖅᑕᐅᓇᓱᐊᕈᑎᐅᔪᑦ ᐃᖅᑲᖅᑐᐃᕕᑎᒍᑦ ᐊᑐᐊᒐᓕᕆᕝᕕᒃ (NCPC) ᑐᑭᓯᒋᐊᕐᕕᐅᒐᒥᒃ ᐃᑲᔪᕐᓱᐃᓚᐅᖏᑦᑐᑦ ᐊᑐᐊᒐᓕᐅᖁᔨᔪᓂᑦ, ᑭᓯᐊᓂ ᐊᖏᖃᑎᖃᓚᐅᖅᑐᑦ ᐊᑑᑎᖃᕐᓂᕆᒐᔭᖅᑕᖏᓐᓂᑦ ᐱᓕᒻᒪᓴᖅᑕᐅᒍᑎᒃ ᖃᓄᑭᐊᖅ. ᖃᐅᔨᒪᖁᔨᓚᐅᖅᑐᖅ ᑲᓇᑕᒥ ᐊᑐᐊᒐᓕᕆᔾᔪᑎᒥᑦ, ᑲᓇᑕᒥ ᐱᓕᕆᔾᔪᑎᒍᑦ ᐱᔾᔪᓯᐅᔪᑦ (NPS), ᐱᑕᖃᕇᕐᒪᑕ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂ. ᑖᓐᓇ ᐱᓕᕆᔾᔪᑎᐅᔪᖅ ᓴᓇᔭᐅᓚᐅᕐᓂᑯ ᐅᑯᓄᖓ ᐊᒻᒪ ᐊᑐᐃᓐᓇᐅᓗᓂ ᐊᑭᓕᖅᑕᐅᓇᓱᐊᖅᑐᓂᑦ ᐃᖅᑲᖅᑐᐃᕕᒃᑯᑦ ᖃᐅᔨᓴᖅᑎᓄᑦ, ᐊᒻᒪ ᑲᓇᑕᐅᑉ ᐃᓗᐊᓃᑦᑐᓂᑦ ᑐᑭᓕᐅᕈᑎᐅᓗᓂ ᐊᒻᒪ ᐊᑐᐊᒐᐅᓗᓂ ᐊᐅᓚᑦᓯᔾᔪᑎᓂᑦ ᐊᑭᓕᖅᑕᐅᓇᓱᐊᕈᑎᓂᑦ ᐃᖅᑲᖅᑐᐃᕕᒃᑯᑦ. ᐃᓚᓕᐅᑎᓪᓗᒋᑦ ᑲᓇᑕᒥ ᐱᓕᕆᔾᔪᑎᒍᑦ ᐱᔾᔪᓯᕐᓄᑦ (NPS), ᐃᑲᔪᕐᓱᐃᔾᔪᑎᐅᔪᑦ ᑎᑎᖅᑲᑦ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑭᒡᒐᖅᑐᐃᔨᖏᑕ ᑮᓇᐅᔭᓕᕆᔾᔪᑎᓂᑦ ᐊᑎᓕᐅᕈᓐᓇᐅᑎᖃᖅᑐᑦ ᐊᐅᓚᑦᓯᔨᓂᑦ ᑐᑭᓯᐅᒪᑎᑦᓯᕙᑦᑐᑦ ᐊᒻᒪ ᑎᓕᓯᓪᓗᑎᒃ ᖃᓄᖅ ᐱᓕᕆᐊᖑᒋᐊᖃᕐᓂᖏᓐᓂᑦ ᐊᑭᓕᖅᑕᐅᓇᓱᐊᕈᑎᐅᔪᑦ ᐃᖅᑲᖅᑐᐃᕕᒃᑯᑦ; ᐅᓇ ᑎᑎᖅᑲᖅ ᐊᖏᖅᑕᐅᓚᐅᖅᑐᖅ ᔪᓚᐃ 2021 ᐊᒻᒪ ᐋᖅᑭᒋᐊᖅᑕᐅᓗᑎᒃ ᑎᑎᕋᕐᓯᒪᓂᖏᑦ ᕕᕝᕗᐊᕆ 2022.

[133] ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᕆᐊᓚᐅᖅᑐᖅ ᑲᓇᑕᒥ ᐊᑭᓕᖅᑕᐅᓇᓱᐊᕈᑎᐅᔪᑦ ᐃᖅᑲᖅᑐᐃᕕᑎᒍᑦ ᐊᑐᐊᒐᓕᕆᕝᕕᒃ (NCPC) ᐃᓱᒪᒋᔭᖃᕐᒪᑕ ᑕᒪᒃᑯᐊ ᑎᑎᖅᑲᐃᑦ, ᑲᑎᑕᐅᓯᒪᓪᓗᑎᒃ ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᓕᒐᖏᑦ ᐊᑭᓕᕐᓱᐃᔾᔪᑎᓂᑦ ᐊᒻᒪ ᐊᑐᐊᒐᐃᑦ ᐊᑭᓕᖅᑕᐅᓇᓱᐊᕈᑎᑦ ᐱᓪᓗᒋᑦ, ᓈᒻᒪᑦᑐᓂᑦ ᐊᑐᐊᒐᖃᖅᑎᑦᓯᓂᖏᓐᓂᑦ. ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᐃᓱᒪᒋᒐᒥᒋᑦ ᑲᓇᑕᒥ ᐊᑭᓕᖅᑕᐅᓇᓱᐊᕈᑎᐅᔪᑦ ᐃᖅᑲᖅᑐᐃᕕᑎᒍᑦ ᐊᑐᐊᒐᓕᕆᕝᕕᒃ (NCPC) ᖃᓄᖅ ᐃᓱᒪᓂᖏᑦ ᓈᒻᒪᒻᒪᑕ, ᐊᓯᔾᔨᖅᑕᐅᒐᓗᐊᕈᑎᒃ ᐊᑐᐊᒐᐃᑦ ᐊᔾᔨᓕᐅᕆᑐᐃᓐᓇᕋᔭᕐᒪᑕ ᐊᑐᖁᔭᐅᓯᒪᔪᓂᑦ ᐊᑐᐃᓐᓇᐅᑎᑕᖏᓐᓂᑦ ᐊᑭᓕᖅᑕᐅᓇᓱᐊᕈᑎᓂᑦ ᐱᓕᕆᔾᔪᑎᐅᔪᑦ ᐊᑐᖅᑕᐅᕙᒌᖅᑐᑦ. ᖃᐅᔨᒪᖁᔨᓚᐅᖅᑐᖅ ᐱᓕᕆᔾᔪᓯᒻᒪᕆᖏᑦ ᐊᒻᒪ ᐱᔪᓐᓇᕐᓂᖏᑦ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services) ᐃᖅᑲᓇᐃᔭᖅᑎᖏᑕ ᑕᑯᑦᓴᐅᑦᓯᐊᓚᐅᕐᒪᑕ ᐅᕙᓂ ᐱᓕᕆᐊᖑᔪᒥ.

[134] ᑕᒪᓐᓇ ᐅᖃᐅᓯᕆᓪᓗᒍ, ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᑲᓇᑕᒥ ᐱᓕᕆᔾᔪᑎᓄᑦ ᐱᔾᔪᓯᒧᑦ (NPS) ᑎᑎᖅᑲᖅ ᒫᓐᓇ ᐅᖃᐅᓯᖃᖏᑦᑐᖅ ᐱᓪᓗᐊᑕᓂᑦ ᑐᓴᐅᒪᐅᑎᓕᕆᓂᕐᒨᖓᔪᓂᑦ ᐅᕝᕙᓘᓐᓃᑦ ᐋᔩᓐᓂᕐᒥᑦ ᐃᓚᒋᔭᐅᓗᑎᒃ ᐅᓗᕆᐊᓇᖅᑐᒦᑐᐃᓐᓇᕆᐊᓖᑦ ᑭᒃᑯᑐᐃᓐᓇᐃᑦ. ᑕᒪᓐᓇ ᐱᓪᓗᒍ, ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᖅᑐᖅ ᑎᓕᓯᓂᕐᒥᑦ ᑲᓇᑕᒥ ᐊᑭᓕᖅᑕᐅᓇᓱᐊᕈᑎᐅᔪᑦ ᐃᖅᑲᖅᑐᐃᕕᑎᒍᑦ ᐊᑐᐊᒐᓕᕆᕝᕕᒃ (NCPC) ᐊᓯᔾᔩᖁᓗᒋᑦ ᑲᓇᑕᒥ ᐱᓕᕆᔾᔪᑎᓂᑦ ᐱᔾᔪᓯᒧᑦ (NPS) ᑎᑎᖅᑲᒦᑦᑐᑦ ᐱᖃᓯᐅᔾᔭᐅᖁᓪᓗᒋᑦ ᐊᑐᐊᒐᐅᔪᑦ ᐱᔾᔪᑎᖃᖅᑐᑦ ᑐᓴᐅᒪᐅᑎᓕᕆᓂᕐᒥᑦ ᐅᓗᕆᐊᓇᖅᑐᒦᒍᓐᓇᖅᑐᓂᑦ ᑭᒃᑯᑐᐃᓐᓇᕐᓂᑦ, ᑲᓇᑕᒥ ᐊᑭᓕᖅᑕᐅᓇᓱᐊᕈᑎᐅᔪᑦ ᐃᖅᑲᖅᑐᐃᕕᑎᒍᑦ ᐊᑐᐊᒐᓕᕆᕝᕕᒃ (NCPC) ᐱᓕᕆᐊᕆᓚᐅᖅᑕᖏᓐᓂᑦ ᑐᑭᓯᒋᐊᕐᕕᐅᒐᒥᒃ ᐱᓪᓗᒍ ᐅᓇ ᐱᓕᕆᔾᔪᑎᐅᔪᖅ. ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᓚᐅᖅᑐᖅ ᑕᒪᓐᓇ ᐱᐅᔫᒻᒪᑦ ᐱᓕᕆᐊᖑᔪᒪᔪᖅ, ᐊᒻᒪ ᐃᑲᔪᕐᓱᐃᓕᓚᐅᖅᑐᖅ ᑕᒪᑦᓱᒥᖓ ᖃᐅᔨᓴᖅᑏᑦ ᖃᐅᔨᓚᐅᖅᑕᖏᓐᓂᑦ ᐱᔾᔪᑎᖃᖅᑐᑎᒃ ᑲᓇᑕᒥ ᐱᓕᕆᔾᔪᑎᓂᑦ.

[135] ᑕᒪᒃᑯᓂᖓᑦᓴᐃᓐᓇᖅ ᐱᔾᔪᑎᖃᖅᑐᑎᒃ, ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐃᑲᔪᕐᓱᐃᓚᐅᖏᑦᑐᖅ ᖃᐅᔨᓴᖅᑏᑦ ᐊᑐᖁᔭᖏᓐᓂᑦ ᐊᑐᐊᒐᓕᐅᖁᔨᔾᔪᑎᖏᓐᓂᑦ. ᐃᑲᔪᕐᓱᐃᓚᐅᖅᑑᒐᓗᐊᖅ ᐊᑐᖁᔭᐅᔪᒥᑦ ᐱᔾᔪᑎᓕᒻᒥᑦ ᐱᓕᒻᒪᑦᓴᐅᑎᓂᑦ, ᐅᖃᖅᑐᓂ ᐃᖅᑲᖅᑐᐃᕕᓕᕆᔪᓂᑦ ᐱᓕᒻᒪᑦᓴᐅᑏᑦ ᐱᒋᐊᓚᐅᕐᓯᒪᒻᒪᑕ 2022 ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑭᓕᖅᑕᐅᓇᓱᐊᕈᑎᓂᑦ ᖃᐅᔨᓴᖅᑎᓄᑦ ᐊᒻᒪ ᐊᐅᓚᑦᓯᔨᓄᑦ. ᖃᐅᔨᒪᖁᔨᓚᐅᖅᑐᖅ ᑕᒪᓐᓇ ᐸᕐᓇᐅᑕᐅᒻᒪᑦ ᐊᑐᖅᑕᐅᑲᓐᓂᐸᓪᓗᓂ ᐊᒻᒪ ᐃᓚᔭᐅᒐᔭᕐᒪᑕ ᐊᒥᓱᓂᑦ ᓱᓇᑐᐃᓐᓇᓕᕆᔪᓂᑦ. ᐅᖃᓚᐅᖅᑐᖅ ᐱᓕᒻᒪᑦᓴᐅᑎᑦᓴᑦ ᐊᓯᔾᔨᖅᑕᐅᒐᔭᕐᒪᑕ ᐱᖃᓯᐅᔾᔭᐅᓕᕐᓗᑎᒃ ᑎᑎᕋᕐᓯᒪᔪᑦ ᐱᔾᔪᑎᓖᑦ ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐋᔩᖃᑎᖃᕐᓂᕐᒥᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓂᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᐊᒻᒪ ᐅᓗᕆᐊᓇᒃᑲᓐᓂᕈᓐᓇᖅᑐᓂᑦ ᐊᑦᑐᐊᔪᓂᑦ ᑕᒪᒃᑯᓄᖓ ᐱᓪᓗᐊᑕᐅᔪᓄᑦ ᐊᑭᓕᖅᑕᐅᓇᓱᐊᖅᑐᓄᑦ.

[136] ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐅᖃᒃᑲᓐᓂᓚᐅᖅᑐᖅ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐋᖅᑭᑦᓱᐃᕙᓪᓕᐊᒻᒪᑕ ᐱᔾᔪᓯᒍᑦ ᐅᖃᐅᓯᑦᑕᖏᓐᓂᑦ ᑭᒃᑯᑐᐃᓐᓇᕐᓂᑦ ᑐᓴᐅᒪᑎᑦᓯᔾᔪᑎᑦᓴᓄᑦ ᐊᑦᑐᐊᔪᓂᑦ ᐊᑭᓕᖅᑕᐅᓇᓱᐊᕈᑎᓄᑦ. ᒪᓕᒐᓕᕆᔪᓂᑦ ᐱᓕᒻᒪᓴᖅᑕᐅᕙᑦᑐᑦ ᒫᓐᓇᒧᑦ ᐊᒻᒪ, ᐊᔪᕐᓇᖏᓐᓂᖏᒍᑦ, ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐋᔩᖃᑎᖃᕐᓂᕐᒥᑦ ᑭᒃᑯᑐᐃᓐᓇᕐᓂᑦ ᐃᓚᖃᖅᐸᑦᑐᑎᒃ ᐊᒻᒪ ᑐᕌᒐᖃᖅᐸᑦᑐᑎᒃ ᓄᓇᓕᕐᒥᐅᑕᐅᔪᓂᑦ ᐅᖃᖃᑕᐅᕙᑦᑐᑎᒃ. ᐊᒻᒪᑦᑕᐅᖅ, ᑲᓇᑕᒥ ᐱᓕᕆᔾᔪᑎᓄᑦ ᐱᔾᔪᓯᐅᔪᑦ (NPS) ᐊᑭᓕᖅᑕᐅᓇᓱᐊᕈᑎᓂᑦ ᖃᐅᔨᓴᖅᑎᓄᑦ ᑎᑎᕋᖅᑕᐅᕙᓪᓕᐊᔪᑦ ᐊᒻᒪ ᐱᖃᓯᐅᔾᔨᒐᔭᖅᑐᑎᒃ ᐊᑐᐊᒐᕐᓂᑦ ᑐᓴᐅᒪᐅᑎᓕᕆᔪᓂᑦ ᑭᒃᑯᑐᐃᓐᓇᕐᓂᑦ ᐃᓚᖃᖅᐸᓪᓗᑎᒃ.

ᖃᐅᔨᓴᖅᑏᑦ ᖃᐅᔨᓴᐅᑎᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᑭᐅᔾᔪᑎᖏᓐᓂᑦ

[137] ᑐᑭᓯᒋᐊᕈᑎᐅᔪᑦ ᑎᑎᕋᖅᑕᐅᓯᒪᔪᑦ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑕ ᑭᐅᔾᔪᑎᖓᓂ ᐱᓪᓗᒋᑦ ᑲᓇᑕᒥ ᐊᑐᐊᒐᐃᑦ ᐊᑐᖅᑕᐅᕙᑦᑐᑦ ᐱᓕᕆᐊᖃᖅᑐᓄᑦ ᐊᑭᓕᖅᑕᐅᓇᓱᐊᕈᑎᓂᑦ ᖃᐅᔨᓴᖅᑎᓄᑦ ᐊᒻᒪ ᐊᐅᓚᑦᓯᔨᓄᑦ ᐅᖃᐅᓯᖃᖅᑐᑦ ᐊᒥᓱᓂᑦ ᐃᓱᒫᓘᑎᒋᔭᖏᓐᓂᑦ ᖃᐅᔨᓴᖅᑏᑦ ᐋᖅᑭᑦᓱᐃᔾᔪᑎᐅᔪᑦ ᑕᒪᒃᑯᓂᖓ ᓇᓂᔭᐅᔪᓂᑦ ᐊᒻᒪ ᐊᑐᖁᔭᐅᔪᓂᑦ. ᖃᐅᔨᓴᖅᑏᑦ ᖁᕕᐊᒋᔭᖃᖅᑐᑦ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐊᖏᖃᑎᖃᓚᐅᕐᒪᑦ ᐊᓯᔾᔩᔭᕆᐊᑦᓴᖅ ᑲᓇᑕᒥ ᐱᓕᕆᔾᔪᑎᓄᑦ ᐱᔾᔪᓯᐅᔪᑦ (NPS) ᑎᑎᖅᑲᒥᑦ ᐱᖃᓯᐅᔾᔭᐅᓂᐊᕐᓗᑎᒃ ᐱᔾᔪᑎᖃᖅᑐᑦ ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐋᔩᖃᑎᖃᕐᓂᕐᒥᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ, ᐊᒻᒪ ᑐᖕᖓᓱᑦᑎᑦᑐᒋᑦ ᑐᑭᓯᒋᐊᕈᑎᐅᔪᑦ ᐅᖃᐅᓯᐅᔪᑦ ᐱᔾᔪᑎᖃᖅᑐᑦ ᐱᓕᒻᒪᑦᓴᐅᑎᓂᑦ ᐱᒋᐊᖅᑕᐅᓯᒪᓕᖅᑐᓂᑦ ᐊᒻᒪ ᐊᖏᓪᓕᒋᐊᕈᒫᖅᑐᓂᑦ. ᐱᓗᐊᖅᑐᒥᑦ, ᖃᐅᔨᓴᖅᑏᑦ ᖁᕕᐊᒋᔭᖃᖅᑐᑦ ᐱᓕᕆᐊᖑᔪᒪᔪᓂᑦ ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐋᔩᖃᑎᖃᕐᓂᕐᒥᑦ ᑭᒃᑯᑐᐃᓐᓇᕐᓂᑦ ᐃᓚᖃᕐᓗᑎᒃ ᐊᒻᒪ ᐱᓪᓗᐊᑕᐅᔪᓂᑦ ᓄᓇᓕᕐᒥᐅᑕᐅᔪᓂᑦ ᐅᖃᐅᓯᐅᒐᔭᕐᓂᖏᓪᓗ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᓕᒻᒪᓴᖅᑎᑕᐅᓕᕋᐃᒍᑎᒃ.

[138] ᖃᐅᔨᓴᖅᑏᑦ ᑐᖕᖓᓱᑦᑎᑦᓯᒐᓗᐊᖅᑐᑎᒃ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑦ ᐱᒋᐊᖅᑎᑦᓯᒍᒪᓂᖓᓄᑦ ᐊᑦᑕᓇᔾᔭᐃᒃᑯᑎᓂᑦ ᐅᐸᓗᖓᐃᔭᐅᑎᒥ, ᖃᐅᔨᓴᖅᑏᑦ ᖃᐅᔨᒪᒋᐊᖃᕐᒥᔪᑦ ᐃᓚᖏᑦ ᖃᐅᔨᔭᖏᑦ ᐊᒻᒪ ᐊᑐᖁᔭᖏᑦ ᐱᑕᖃᕆᐊᑐᓐᓂᖏᒻᒪᑕ ᐃᓘᓐᓇᑎᒃ ᐅᖃᐅᓯᑦᓴᐅᑎᒋᓐᓂᕈᑎᒃ ᓯᕗᓪᓕᕐᒥ. ᖃᐅᔨᓴᖅᑎᓪᓗᒋᑦ, ᖃᐅᔨᓴᖅᑏᑦ ᐊᑕᐅᓯᐊᕋᑎᒃ ᐊᐱᕐᓱᖅᐸᓚᐅᖅᑐᑦ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐱᑕᖃᕐᓂᖏᓐᓂᑦ ᐊᑐᐊᒐᐃᑦ ᐱᔾᔪᑎᖃᖅᑐᑦ ᐊᐅᓚᑦᓯᔾᔪᑎᖏᓐᓂᑦ ᐊᑭᓕᖅᑕᐅᓇᓱᐊᕈᑎᐅᔪᑦ, ᐊᒻᒪ ᖃᐅᔨᒪᑎᑕᐅᒐᑎᒃ ᐊᑐᐊᒐᕐᓂᑦ ᑎᑎᖅᑲᓂᑦ ᓲᕐᓗ ᐅᑯᓂᖓ ᑲᓇᑕᒥ ᐱᓕᕆᔾᔪᑎᓄᑦ ᐱᔾᔪᓯᐅᔪᑦ (NPS) ᐊᒻᒪ ᐃᑲᔪᕐᓱᐃᔪᑦ ᑎᑎᖅᑲᐃᑦ ᐅᑯᓄᖓ ᑲᓇᑕᒥ ᐱᓕᕆᔾᔪᑎᓄᑦ ᐱᔾᔪᓯᐅᔪᑦ (NPS) ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑭᒡᒐᖅᑐᐃᔨᖏᓐᓄᑦ ᑮᓇᐅᔭᓕᕆᔾᔪᑎᓂᑦ ᐊᑎᓕᐅᕈᓐᓇᓂᒃᑯᑦ ᐱᔪᓐᓇᐅᑎᓕᓐᓄᑦ.^{Footnote 2} ᖃᐅᔨᓴᖅᑏᑦ ᖃᐅᔨᓴᐅᑎᖏᑦ ᐱᕙᓪᓕᐅᑎᓂᐊᕈᑎᒃ, ᓈᒻᒪᔪᓂᑦ ᐊᒻᒪ ᕿᓚᒥᐅᔫᒥᔪᖅ ᐅᖃᐅᓯᖃᖃᑦᑕᕆᐊᓖᑦ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ, ᑕᐃᒪᐃᒋᐊᖃᕐᒪᑕ ᒪᓕᑦᑐᒍ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒪᓕᒐᖓᑦ. ᖃᐅᔨᓴᖅᑏᑦ ᐊᓯᔾᔩᓂᐊᖅᑐᑦ ᐃᓚᖏᓐᓂᑦ ᖃᐅᔨᔭᖏᓐᓂᑦ ᐊᒻᒪ ᐊᑐᖁᔭᖏᓐᓂᑦ ᒪᓕᑦᑐᒋᑦ ᐊᔾᔨᖃᕐᓂᐊᕐᒪᑕ ᓄᑖᓂᑦ ᐅᖃᐅᓯᐅᔪᓂᑦ ᑐᑭᓯᒋᐊᕈᑎᓂᑦ.

ᑭᖑᓪᓕᖅᐹᖅ ᖃᐅᔨᔭᐅᔪᖅ #34: ᐃᓱᒫᓗᓇᖅᑐᖅ ᐅᑯᐊ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐱᓕᒻᒪᑦᓴᐅᑎᖃᖏᒻᒪᑕ ᐃᖅᑲᓇᐃᔭᖅᑎᖏᓐᓄᑦ ᖃᓄᖅ ᐊᐅᓚᑕᐅᔭᕆᐊᖃᕐᒪᖔᑕ ᐊᑭᓕᖅᑕᐅᓇᓱᐊᕈᑏᑦ.  

ᑭᖑᓪᓕᖅᐹᑦ ᐊᑐᖁᔭᖅ #16: ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᓯᔾᔩᒋᐊᓖᑦ ᐊᑐᐊᒐᓕᐅᕈᑎᖏᓐᓂᑦ ᐱᑕᖃᒃᑲᓐᓂᖁᓪᓗᒍ ᖃᐅᔨᒪᒋᐊᖁᔨᔾᔪᑎᓂᑦ ᐊᒻᒪ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐋᔩᖃᑎᖃᕐᓂᕐᒥᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᐱᔾᔪᑎᖃᕐᓗᑎᒃ ᐊᐅᓚᑦᑎᔾᔪᑎᓂᑦ ᐊᑭᓕᖅᑕᐅᓇᓱᐊᕈᑎᓂᑦ ᐃᖅᑲᖅᑐᐃᕕᓕᕆᔨᓂᑦ ᐊᒻᒪ ᐊᑭᓕᖅᑕᐅᑎᓂᑦ ᐃᖅᑲᖅᑐᐃᕕᒃᑰᕈᑎᐅᓯᒪᖏᑦᑐᓂᑦ.

ᑭᖑᓪᓕᖅᐹᖅ ᖃᐅᔨᔭᐅᔪᑦ

1. 1) ᓈᒻᒪᑦᑐᖃᓚᐅᖅᑐᖅ ᐃᓱᒪᒋᔭᐅᔪᓂᑦ A.B. ᓱᕋᐃᔪᕕᓂᐅᓂᖓᓄᑦ ᒪᓕᒐᕐᒥᑦ ᐸᕝᕕᓴᐃᓗᓂ, ᐊᒻᒪ ᓈᒻᒪᓚᐅᕐᒪᑦ ᑳᓐᔅᑕᐳᓪ ᑭᐅᓕᖕ ᑎᒍᓪᓗᓂᐅᒃ ᑕᐃᑦᓱᒧᖓ ᓱᕋᐃᓯᒪᓂᖓᓄᑦ ᒪᓕᒐᕐᒥᑦ.
2. 2) ᓈᒻᒪᓚᐅᖅᑐᖅ ᑳᓐᔅᑕᐳᓪ ᑭᐅᓕᖕ ᐊᒻᒪ ᐊᓯᖏᓐᓄᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᓄᑦ ᑎᒍᓯᔪᕕᓂᐅᓂᖏᓐᓂᑦ A.B.-ᒥᑦ ᕿᓚᒥᐅᔫᒥᔪᖅ.
3. 3) ᓇᓗᓇᐃᔭᐃᑏᑦ ᓇᓗᓇᐃᕐᓯᓯᒪᖏᑦᑐᑦ ᑳᓐᔅᑕᐳᓪ ᑭᐅᓕᖕ ᐊᐳᕐᓯᓇᓱᐊᖅᑐᒥᓂᐅᓂᖓᓄᑦ A.B.-ᒥᑦ ᐸᓖᓯᒃᑯᑦ ᓄᓇᒃᑰᔫᖓᑕ ᒪᑐᐊᓄᑦ. ᑭᓯᐊᓂ, ᐊᑐᐃᓐᓇᐅᔪᑦ ᑐᑭᓯᒋᐊᕈᑎᐅᔪᑦ ᓇᓗᓇᐃᔭᐃᓯᒪᔪᑦ ᑕᒪᓐᓇ ᐱᕐᕈᓗᐊᕿᔾᔪᑎᐅᓐᓂᕐᒪᑦ ᐊᑐᖅᑕᐅᔪᕕᓂᐅᓗᓂ ᐱᔾᔪᑎᒋᓪᓗᒍ ᐸᓖᓯᒃᑯᑦ ᓄᓇᒃᑰᔫᖓᑦ ᓯᕗᒧᑦ ᐃᖏᕐᕋᓯᑲᓪᓚᓂᕐᒪᑦ ᐱᔾᔪᑎᒋᓪᓗᒍ ᐊᑐᕆᐊᑉ ᐱᐅᓗᐊᓚᐅᖏᓐᓂᖓ ᓄᖅᑲᕋᓱᑦᑐᒥᓂᐅᑎᓪᓗᒋᑦ ᖃᓂᒋᔮᓄᑦ A.B.
4. 4) ᐊᑕᓇᓚᐅᕐᒪᑦ ᐊᒻᒪ ᓈᒻᒪᒐᓂ ᑳᓐᔅᑕᐳᓪ ᑭᐅᓕᖕ ᐊᖁᓐᓂᐊᕐᓂᕈᓂ ᖃᓂᒋᓗᐊᕐᓗᓂᐅᒃ A.B. ᐊᑐᕆᐊᑦᑕᖓ ᖁᐊᓴᐅᑎᓪᓗᒍ ᐱᐅᓗᐊᕋᓂ. ᑳᓐᔅᑕᐳᓪ ᑭᐅᓕᖕ ᐅᓗᕆᐊᓇᑐᐃᓐᓇᕆᐊᓕᓐᓂᑦ ᖃᐅᔨᓴᑦᓯᐊᕆᐊᖃᖅᑐᒥᓂᐅᒐᓗᐊᖅ ᐃᓱᒪᒋᓪᓗᒍ ᖃᓄᐃᑦᑑᓂᖓ ᐊᑐᕆᐊᑉ ᐊᒻᒪ ᐊᓯᖏᑦ ᐊᑑᑎᖃᐅᖅᑐᑦ ᐱᔾᔪᑎᐅᓯᒪᔪᑦ.  
5. 5) ᖃᐅᔨᓴᖅᑏᑦ ᓈᒻᒪᓴᖅᑐᑦ ᓈᒻᒪᑦᑐᓂᑦ ᐋᖅᑭᒋᐊᕈᑎᑦᓴᓂᑦ ᐱᓕᕆᐊᖃᓚᐅᕐᒪᑕ ᐱᔾᔪᑎᒋᓪᓗᒍ ᑳᓐᔅᑕᐳᓪ ᑭᐅᓕᖕ ᐊᖁᓐᓂᕆᓚᐅᖅᑕᖓ ᐊᒻᒪ ᐊᓯᐊᒍᑦ ᖃᓄᐃᓕᐅᕈᑎᐅᒋᐊᖃᕈᓐᓃᕐᒪᑦ.
6. 6) ᐱᔾᔪᑎᒋᓪᓗᒋᑦ A.B. ᖁᓄᓚᐅᕐᓂᖓ ᐊᒻᒪ ᐱᒋᐊᕐᓂᐅᓴᓚᐅᕐᓂᖓ, ᐊᑐᕆᐊᖃᓚᐅᖅᑐᑦ ᐊᒻᒪ ᓈᒻᒪᓚᐅᖅᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑐᖅᑐᒥᓂᐅᓂᖓ ᐊᑦᓱᕈᖅᑐᑎᒃ ᑎᒍᔭᐅᑎᓪᓗᒍ. ᐊᑦᓱᕈᓐᓂᐅᓚᐅᖅᑐᖅ ᐊᑐᖅᑕᐅᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓄᑦ ᓈᒻᒪᓚᐅᖅᑐᖅ A.B. ᐱᐅᓯᖓ ᐱᓪᓗᒍ, ᐊᒻᒪ ᓈᒻᒪᓚᐅᖅᑐᓂ ᐃᓱᒪᒋᓪᓗᒋᑦ ᖃᓄᐃᒍᓕᖓᒍᑎᐅᓚᐅᖅᑐᑦ.
7. 7) A.B. ᑐᑭᖃᑦᓯᐊᑐᒃᑯᑦ ᑐᓴᖅᑎᑕᐅᓚᐅᖏᑦᑐᖅ ᖃᐅᔨᒋᐊᕈᓐᓇᕐᓂᖓᓂᑦ ᒪᓕᒐᓕᕆᔨᓂᑦ ᐊᒻᒪ ᐱᕕᖃᖅᑎᑕᐅᓚᐅᕋᓂ ᖃᐅᔨᒋᐊᕐᓂᕐᒥᑦ ᒪᓕᒐᓕᕆᔨᓂᑦ ᐋᖓᔮᕈᓐᓃᑎᓪᓗᒍ ᑎᒍᔭᐅᒪᕕᒻᒥ.
8. 8) ᖃᐅᔨᒪᓂᕋᕋᓗᐊᖅᑐᑎᒃ ᐊᑦᑕᓇᔾᔭᐃᕐᓯᒪᒋᐊᖃᖅᐸᓐᓂᖏᓐᓂᑦ ᑎᒍᔭᐅᖅᑲᔪᑦ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᒻᒪᕆᐅᓘᒐᓗᐊᖅᑎᓪᓗᒍ, ᖃᐅᔨᓴᖅᑏᑦ ᐅᖃᕆᐊᒃᑲᓐᓂᖅᑐᑦ ᐊᓐᓄᕌᖃᖏᑦᑐᓂᑦ ᕿᓂᕐᕕᖃᕐᓂᐅᔪᖅ ᐊᑐᖅᑕᐅᒋᐊᖃᖏᒻᒪᑦ ᐱᓕᕆᔾᔪᑎᐅᒐᔪᓪᓗᑎᒃ.
9. 9) ᑕᕝᕙᓂᓕ, ᓈᒻᒪᓚᐅᖅᑐᖅ, ᐊᒻᒪ ᐊᑲᐅᓂᖅᐹᖑᓪᓗᓂ ᐊᑦᑕᓇᖅᑐᒦᖁᓇᒍ A.B., ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ A.B.-ᒥᑦ ᐊᓐᓄᕋᐃᔭᐃᑎᓪᓗᒋᑦ ᖃᐅᓯᐅᓚᐅᖅᑐᓂᑦ.
10. 10) ᐊᑦᑕᓇᖅᑐᒦᖁᓇᒋᑦ ᐃᓘᓐᓇᑎᒃ ᐱᓕᕆᖃᑕᐅᓚᐅᖅᑐᑦ, ᓈᒻᒪᓚᐅᖅᑐᖅ ᖃᑦᓯᐅᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᖃᑕᐅᑎᓪᓗᒋᑦ ᕿᓂᕐᕕᖃᕐᓂᕐᒥᑦ.
11. 11) A.B. ᐱᑎᑕᐅᒋᐊᓕᒥᓂᐅᒐᓗᐊᖅ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᑦ, ᐱᑎᑕᐅᒍᓐᓇᕐᓂᕈᓂ ᐊᑦᑕᓇᔾᔭᐃᕐᓯᒪᓗᑎᒃ, ᐱᓗᐊᖅᑐᒥ ᐱᔾᔪᑎᐅᓚᐅᖅᑐᖅ ᐱᓪᓗᒍ ᐊᓐᓄᕋᐃᔭᖅᑎᑕᐅᓚᕿᓚᐅᕐᓂᖓ A.B. ᐊᑦᑕᓇᖅᑐᒦᖁᓇᒍ ᕿᐅᓗᐊᖁᔭᐅᒐᓂ.
12. 12) ᐃᓘᓐᓇᖏᒍᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᑦᓱᕈᕐᓂᕆᓚᐅᖅᑕᖓᑦ A.B. ᕿᓂᕐᕕᐅᑎᓪᓗᒍ ᓈᒻᒪᓚᐅᖅᑐᖅ. ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᓴᖅᑏᑦ ᐅᔾᔨᕈᓱᒋᐊᖁᔨᔪᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᓐᓂᑦ ᐊᑐᖁᔭᐅᕙᑦᑐᑎᑦ ᐊᑦᓱᕈᓗᐊᖅᐸᖏᓪᓗᑎᒃ ᖃᖓᑐᐃᓐᓇᒃᑯᑦ.
13. 13) ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᕿᓂᓚᐅᖏᒻᒪᑕ ᐋᓐᓂᐊᔪᓕᕆᔭᐅᖁᓪᓗᒍ A.B. ᑎᒍᔭᐅᓚᐅᖅᑎᓪᓗᒍ, ᐅᐱᓐᓇᕋᓂ ᓱᓇᑕᖃᖏᑦᑐᖅ ᐋᓐᓂᐊᔪᓕᕆᔨᓄᑦ ᐅᐸᑦᑕᐅᒋᐊᖃᕐᒪᖔᖅ ᑕᐃᑦᓱᒪᓂᐅᓚᐅᖅᑐᖅ.
14. 14) ᐃᓂᖃᑦᑎᐊᖏᓐᓂᖅ ᑎᒍᔭᐅᒪᔪᓄᑦ ᓴᖅᑮᓯᒪᓚᐅᖅᑐᖅ ᐊᑦᑕᓇᖅᑐᒥᑦ ᐊᕙᑎᖃᓕᕐᓂᖏᓐᓂᑦ ᑎᒍᔭᐅᒪᔪᑦ, ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ, ᐊᒻᒪ ᑎᒍᔭᐅᒪᕕᒻᒥ ᐃᖅᑲᓇᐃᔭᖅᑏᑦ.
15. 15) ᐱᓪᓗᒍ J.J. ᓴᓗᒻᒪᓴᖅᑕᐅᓚᐅᖏᓐᓂᖓ ᓯᕗᓂᐊᒍᑦ ᐃᓪᓗᕈᓯᕐᒨᖅᑕᐅᓚᐅᖏᓐᓂᖓᓂ ᑎᒍᔭᐅᒪᕕᒻᒥ ᐱᓗᖅᑯᑎᖃᓗᐊᓚᐅᕐᒥᔪᖅ ᐃᒪᖃᖏᓐᓂᖓᓂᑦ ᐃᓪᓗᕈᓯᐅᑉ ᐱᓪᓗᒍ ᓱᕋᑦᓯᒪᔪᖅ ᐅᐊᓴᕐᕕᒃ, ᐊᑐᖅᑕᐅᓕᖅᑐᓂ ᓈᒻᒪᖏᑦᑐᒻᒪᕆᐅᔪᖅ ᖃᓄᐃᓕᖓᒍᑎᐅᓕᓚᐅᖅᑐᖅ ᑎᒍᔭᐅᒪᔪᖅ ᐊᑐᓕᖅᑭᖅᑖᓚᐅᕐᓂᖓ ᐃᒥᕐᒥᒃ ᖁᕝᕕᒻᒥᒃ ᐊᑲᐅᓯᔾᔪᑎᒋᓇᓱᐊᖅᑐᓂᐅᒃ ᐊᑲᐅᔪᓐᓃᕈᑎᒥᓂᒃ. ᑕᒪᐅᓇ ᓴᖅᑮᔪᖅ ᐱᒻᒪᕆᐅᔪᓂᑦ ᐃᓗᓯᒃᑯᑦ ᐊᒻᒪ ᐊᑦᑕᓇᔾᔭᐃᕐᓯᒪᓂᒃᑯᑦ ᐃᓱᒫᓘᑎᐅᔪᓂᑦ, ᐊᒻᒪ ᐃᑲᔫᑎᖃᖅᑐᓂ ᐊᖏᓪᓕᑎᒋᐊᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ A.B.-ᒧᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᓗᓂ ᓇᔪᖅᑕᖓᓄᑦ J.J.
16. 16) ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ, J.J. ᐱᑎᑕᐅᒋᐊᓕᒥᓂᖅ ᐃᒥᕐᒥᒃ ᓴᓗᒻᒪᕐᓴᐃᑎᑦᓴᒥᑦ, ᐱᓗᐊᖅᑐᒥ ᓇᓗᓇᖅᑎᓐᓇᒍ ᐊᑲᐅᔪᓐᓃᕐᓯᒪᓂᖓ.
17. 17) ᓈᒻᒪᓚᐅᖏᑦᑐᖅ ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᐃᒪᖃᓚᐅᖏᓐᓂᖓᓄᑦ ᐊᒻᒪ ᐃᓂᖃᖅᑎᑕᐅᓂᖓ ᐊᑲᐅᖏᑦᑐᕖᖔᓗᒻᒥ.
18. 18) ᓈᒻᒪᓚᐅᖏᑦᑐᖅ ᐅᐊᓴᕐᕕᖓ ᐃᓪᓗᕈᓯᐅᑉ 3 ᐃᑉᐱᒋᔭᐅᓚᐅᖏᓐᓂᖓ ᐱᔪᓐᓇᑎᓐᓇᒍ, ᐊᑯᓂᐅᑎᒋᔪᖅ ᒪᕐᕉᒻᒪᕇᓐᓂᒃ (2) ᐊᕐᕌᒎᓐᓂᒃ.
19. 19) ᐅᐱᓐᓇᕋᓂᐅᒐᓗᐊᖅ ᓇᓗᓇᓚᐅᖏᒻᒪᑦ ᑕᕝᕗᖓᑦᓴᐃᓐᓇᖅ ᐃᓪᓗᕈᓯᕐᒨᖅᑕᐅᒻᒪᑎᒃ J.J. ᐊᒻᒪ A.B. ᓴᖅᑭᖅᑐᖃᓚᐅᕋᒥ ᖁᕕᐊᓇᖏᑦᑐᒥᑦ. ᐃᓪᓗᕈᓯᕐᒨᖅᑕᐅᓂᖏᒃ J.J. ᐊᒻᒪ A.B. ᐊᑕᐅᑦᑎᒃᑯᑦ ᓴᖅᑮᓚᐅᖅᑐᑦ ᐊᑦᓱᐊᓘᖅᑐᒥᑦ ᐋᓐᓂᕐᓯᔪᖃᓕᖅᑐᓂ.
20. 20) J.J. ᐊᒻᒪ A.B. ᑕᕝᕗᖓᑦᓴᐃᓐᓈᖅᑕᐅᔪᒪᓕᕐᓂᖏᒃ ᐃᓪᓗᕈᓯᕐᒧᑦ ᑐᕌᒐᓪᓗᐊᒃᑯᑦ ᖃᓄᐃᒍᑎᐅᔪᖅ ᐊᒥᒐᕐᓯᕙᓐᓂᖏᓐᓄᑦ ᓈᒻᒪᑦᑐᓂᑦ ᓇᓖᕌᕈᑎᑦᓴᓂᑦ ᐊᑐᕈᓐᓇᖅᑕᖏᓐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᔾᔪᑎᒋᓪᓗᒍ ᐊᒥᒐᕐᓯᓂᐅᕙᑦᑐᖅ ᐃᓂᑦᓴᐅᔪᓂᑦ ᑎᒍᔭᐅᒪᔪᓄᑦ.
21. 21) ᑕᑯᑦᓴᓪᓚᕆᐅᔪᓂᑦ ᐱᐅᖏᑦᑐᑕᖃᐅᓚᐅᖅᑐᖅ ᐃᓗᐊᒍᑦ ᑭᖕᖓᐃᑦ ᑎᒍᔭᐅᒪᕕᐅᑉ, ᓴᖅᑮᓯᒪᓕᖅᑐᑎᒃ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ. ᓈᒻᒪᓚᐅᖏᑦᑐᖅ ᑎᒍᔭᐅᒪᕕᐅᔪᖅ ᑕᐃᒪᐃᑦᑑᑎᓪᓗᒍ ᐃᓗᐊ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓄᒋᐊᕝᕕᐅᓗᑎᒃ ᐃᑉᐱᒍᓱᑦᑎᐅᓚᐅᖅᑐᑦ ᐱᔾᔪᑎᒋᓪᓗᒍ ᑎᒍᔭᐅᒪᕕᐅᑉ ᐊᒻᒪ ᐃᓪᓗᕈᓯᖃᕐᕕᐅᑉ ᑎᒍᔭᐅᒪᕕᓐᓂᑦ ᐃᓗᐊ ᖃᓄᐃᑦᑑᓂᖓᓄᑦ ᓴᖅᑮᓯᒪᖏᓪᓗᑎᒃ ᓈᒻᒪᖏᑦᑐᓂᑦ ᐃᓗᓯᕐᒧᑦ ᐊᒻᒪ ᐊᑦᑕᓇᑦᑕᐃᓕᒪᔪᓕᕆᓂᕐᒥᑦ ᐅᓗᕆᐊᓇᕈᓐᓇᖅᑐᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᒍᔭᐅᒪᔪᓄᑦ.
22. 22) ᓈᒻᒪᓚᐅᖏᑦᑐᖅ ᕿᒪᑦᑕᐅᑐᐃᓐᓇᕐᓯᒪᓂᖓ ᐃᓪᓗᕕᓯᐅᑉ ᑎᒍᔭᐅᒪᕕᐅᑉ ᓇᑎᖓ ᐊᔾᔨᒌᖏᑦᑐᓂᑦ ᑎᒥᒦᖔᕐᓯᒪᔪᓂᑦ ᐱᑕᖃᖅᑎᓪᓗᒍ ᐃᑲᕐᕋᓄᑦ ᖁᓕᐅᓗᐊᓄᑦ (10).  
23. 23) ᓈᒻᒪᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᖅᑎᑭᓐᓂᖓᑦ ᑭᖕᖓᐃᑦ ᑎᒍᔭᐅᒪᕕᖓᑕ ᐊᕝᕙᐅᓗᐊᖏᓐᓂᑦ ᐸᓖᓯᐅᒋᐊᓕᓐᓂᑦ ᑕᐃᑲᓂ.
24. 24) ᓵᔨᓐ ᒋᐅᓪ ᓈᒻᒪᖏᑦᑐᒥᑦ ᖃᐅᔨᓴᕐᓂᖃᓚᐅᖅᑐᖅ ᐅᐊᑦᓯᐅᔪᒥᑦ. ᐅᐊᑦᓯᐅᔪᖅ ᑲᑦᓱᖓᐃᕐᓯᓯᒪᒐᓗᐊᖅᑐᓂ ᐊᒻᒪ ᐱᓕᕆᔪᒪᑦᑎᐊᖅᑐᓂ ᐊᔪᕐᓇᖏᓐᓂᖓᒍᑦ ᐊᑦᓱᕉᓴᓐᓇᖅᑐᒥ, ᓇᓗᓇᓚᐅᖏᑦᑐᖅ ᐊᒥᓲᓚᐅᕐᒪᑕ ᓱᕋᑦᑎᖅᑕᐅᓯᒪᔪᑦ ᐱᓕᕆᔾᔪᑎᒃᑯᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᓐᓂ ᑎᑎᕋᕐᓯᒪᔪᓂᑦ ᐱᓕᕆᔾᔪᑎᓂᑦ ᐊᒻᒪ ᐊᓯᖏᓐᓂᑦ ᐱᓕᕆᐊᖑᒋᐊᓕᓐᓂᑦ ᐅᐊᑦᓯᐅᔪᓄᑦ.
25. 25) ᐱᓕᒻᒪᓴᕐᓯᒪᔭᖏᑦ ᐅᐊᑦᓯᐅᔫᑉ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᓈᒻᒪᓚᐅᖏᑦᑐᑦ. ᐱᑕᖃᖅᑑᔮᓚᐅᖅᑑᒐᓗᐊᖅ ᑐᑭᓯᐅᒪᓂᕐᒥᑦ ᐊᑑᑎᐅᔪᓂᑦ ᐊᒻᒪ ᐃᑉᐱᒋᔭᒐᐅᔪᓂᑦ ᐱᓕᕆᐊᖃᕐᓂᒃᑯᑦ ᐅᐊᑦᓯᐅᔪᖅ ᐱᓪᓗᒍ, ᑭᓯᐊᓂ ᓈᒻᒪᓚᐅᖏᑦᑐᑦ ᐅᖃᐅᓯᐅᓯᒪᓚᐅᖅᑐᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᑎᒍᑦ ᐊᑐᖅᑕᐅᔭᕆᐊᖃᖅᐸᑦᑐᑦ.
26. 26) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᓇᓱᐊᓯᑦᑕᐅᑎᒋᓚᐅᖅᑐᑦ ᐋᓐᓂᐊᔪᓕᕆᔨᓄᑦ ᐃᑲᔪᖅᑕᐅᒋᐊᖁᓪᓗᒍ A.B. ᐱᒋᐊᖅᑕᐅᓚᐅᖅᑎᓪᓗᒍ.
27. 27) ᐱᔾᔪᑎᒋᓪᓗᒍ A.B. ᓱᓕ ᐱᐅᓯᖃᓚᐅᕐᓂᖓ ᓇᓗᓇᖅᑐᓂ ᖃᓄᐃᓕᐅᕐᓂᐊᓕᕐᒪᖔᕐᒥ, ᓈᒻᒪᓚᐅᖅᑐᖅ ᓵᔨᓐ ᒋᐅᓪ ᐋᓐᓂᐊᓯᐅᖅᑎᒥᑦ ᖃᐃᖁᔨᖔᓚᐅᕐᓂᖓ ᑎᒍᔭᐅᒪᕕᒻᒧᑦ A.B. ᐋᓐᓂᐊᕕᓕᐊᕈᔾᔭᐅᖏᓪᓗᓂ.  
28. 28) ᓈᒻᒪᓚᐅᖅᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᑎᒋᔭᖃᓚᐅᕐᓂᖏᓐᓂᑦ ᐋᓐᓂᐊᓯᐅᖅᑎᐅᑉ A ᐃᓪᓗᕈᓯᒻᒦᑎᑕᐅᖏᓐᓇᕆᐊᖃᕐᓂᖓᓄᑦ A.B. ᖃᐅᔨᓴᖅᑕᐅᓚᐅᖏᓐᓂᖓᓂ.
29. 29) ᓈᒻᒪᓚᐅᖏᑦᑐᖅ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐅᐸᑦᓯᒪᓚᐅᖅᑐᑦ ᐋᓐᓂᐊᓯᐅᖅᑎ A ᐅᐸᑦᓯᒪᑎᓪᓗᒍ (ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ ᐊᒻᒪ ᓵᔨᓐ ᒋᐅᓪ) ᓇᓗᓇᐃᕐᓯᓗᑎᒃ ᐅᖃᐅᔾᔪᐃᓐᓂᖏᒻᒪᑕ ᐋᓐᓂᐊᔪᓕᕆᓂᒃᑯᑦ ᖃᓄᖅ ᑲᒪᒋᔭᐅᒋᐊᖃᕐᒪᖔᖅ A.B. ᐊᑐᖅᑕᐅᖁᔭᒥᓂᒃ ᐋᓐᓂᐊᓯᐅᖅᑎᐅᑉ A ᐊᒻᒪ ᐊᖏᕈᑎᐅᓐᓂᖅᑐᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓄᑦ ᐊᒻᒪ ᑎᑎᕋᖅᑕᐅᓐᓂᕋᓂ ᐅᓇ ᐸᕐᓇᐅᑎᐅᔪᖅ ᑎᒍᔭᐅᒪᔪᓂᑦ ᐅᓂᒃᑳᓕᐊᖑᒋᐊᓕᓐᓂ. ᑕᒪᓐᓇ ᑲᔪᓯᔭᐅᖏᑦᑐᒥᓂᐅᓂᖓ ᑲᒪᒋᔭᐅᒋᐊᖃᖅᑐᒥᑦ ᐅᓗᕆᐊᓇᖅᑐᒦᒍᑎᒋᔪᓐᓇᖅᑕᒥᓂᖓ A.B.
30. 30) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖅᑲᓇᐃᔭᕆᐊᖅᑐᑦ ᖃᐅᒻᒪᑦ ᖃᐅᔨᒪᑎᑕᐅᓕᕋᒥᒃ ᑎᒥᖓᒍᑦ ᖃᐅᔨᓴᖅᑕᐅᒋᐊᖃᕐᓂᖓᓄᑦ A.B., ᐱᓕᕆᒋᐊᓯᓚᐅᖅᑐᑦ ᖃᐅᔨᓴᖅᑕᐅᑎᑦᑐᒍ ᑭᖑᓂᑦᓯᐊᖓᒍᑦ.
31. 31) ᐅᐊᑦᓯᐅᔪᖅ ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ A.B.-ᒥᑦ ᐃᑲᔪᕋᓱᒋᐊᓕᒥᓂᐅᒐᓗᐊᑦ ᐱᓪᓗᒍ ᐋᓐᓂᖅᑕᐅᓯᒪᓂᖓ, ᐊᑦᑕᓇᔾᔭᐃᕐᓯᒪᓗᑎᒃ ᐃᑲᔪᕈᓐᓇᕐᓂᕈᑎᒃ.
32. 32) ᑐᑭᓯᒋᐊᕈᑎᑕᖃᖏᑦᑐᖅ ᐃᓱᒪᓕᐅᕆᔾᔪᑎᑦᓴᒥᑦ A.B. ᐃᓕᕋᓇᕐᓵᖑᓐᓂᕐᒪᖔᖅ ᐅᕝᕙᓘᓐᓃᑦ ᐊᔪᐃᓐᓈᖑᓐᓂᕐᒪᖔᖅ ᐊᖏᖁᔭᐅᓗᓂ ᐱᖁᔭᐅᔪᒥᑦ. ᐊᐅᓚᑦᑎᔨ ᖃᐅᔨᒋᐊᕐᓯᒪᔪᒥᓂᖅ ᑖᑦᓱᒥᖓ ᑭᒡᒐᖅᑐᐃᓗᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᓐᓂᑦ ᒪᓕᑦᑑᔮᓚᐅᖅᑐᖅ ᑮᓇᐅᔭᓕᕆᓂᕐᒥᑦ ᑲᑎᒪᔩᑦ ᑎᑎᕋᖅᑎᖏᑕ ᐊᑐᐊᒐᖏᓐᓂᑦ ᐊᐅᓚᑦᑎᔾᔪᑎᐅᕙᑦᑐᓂᑦ ᖃᓄᖅ ᐊᐅᓚᑕᐅᒋᐊᖃᕐᓂᖏᓐᓂᑦ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐊᔾᔨᒌᖏᑦᑐᓂᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᑦ, ᐊᒻᒪ ᐊᑕᐅᓯᐊᕋᑎᒃ ᐃᓱᒪᓕᐅᕆᕙᓚᐅᖅᑐᑦ A.B. ᑐᑭᓯᒋᐊᖁᔭᐅᓗᓂ ᒪᓕᒐᓕᕆᔨᒥᑦ ᐅᖃᐅᓯᖃᒃᑲᓐᓂᓚᐅᖏᓂᕐᒥᓂ ᐱᖁᔭᐅᔪᓂᑦ.
33. 33) ᐅᐱᓐᓇᕋᓂ ᐃᓱᒫᓘᑎᑕᖃᕐᒪᑦ ᑭᓇᑐᐃᓐᓇᖅ A.B.-ᑎᑐᑦ ᐊᑐᖅᑐᑦ ᐅᓗᕆᐊᓇᖅᑐᒦᒍᓐᓇᕐᒪᑕ ᐊᒻᒪ ᐱᓕᕆᔾᔪᑎᐅᑐᐃᓐᓇᕆᐊᖃᖅᑐᑎᒃ ᐊᔾᔨᒋᑎᑕᐅᖏᓪᓗᑎᒃ, ᐊᒻᒪ/ᐅᕝᕙᓘᓐᓃᑦ ᖃᓄᐃᒍᑎᖃᕐᓗᑎᒃ ᑕᐃᒫᑦᓯᐊᖅ ᐃᓱᒪᓕᐅᕆᔪᓐᓇᕐᓂᖏᓐᓂᑦ ᐊᑐᖅᑕᐅᔪᓐᓇᖅᑐᒥᑦ ᓴᖅᑭᑕᐅᓯᒪᔪᑦ ᐱᔾᔪᑎᒋᓪᓗᒋᑦ, ᐅᓗᕆᐊᓇᖅᑐᒦᔾᔭᐃᑯᑎᑦᓴᓂᑦ ᐋᖅᑭᑦᓱᐃᒋᐊᓕᐅᔪᑦ ᐊᑐᐊᒐᑎᒍᑦ, ᐱᓕᕆᔾᔪᑎᒍᑦ ᐊᒻᒪ ᐱᓕᒻᒪᑦᑕᐅᑎᒍᑦ.
34. 34) ᐃᓱᒫᓗᓇᖅᑐᖅ ᐅᑯᐊ ᓄᐊᕐᖦ ᐅᐊᔅ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᖅᑐᓕᕆᓂᕐᒥᑦ ᐱᔨᑦᓯᕋᖅᑏᑦ (North West Claims, Litigation and Advisory Services), ᐱᓕᒻᒪᑦᓴᐅᑎᖃᖏᒻᒪᑕ ᐃᖅᑲᓇᐃᔭᖅᑎᖏᓐᓄᑦ ᖃᓄᖅ ᐊᐅᓚᑕᐅᔭᕆᐊᖃᕐᒪᖔᑕ ᐊᑭᓕᖅᑕᐅᓇᓱᐊᕈᑏᑦ.
35. 35) ᓇᓗᓇᐃᔭᐃᑎᑕᖃᖏᑦᑐᖅ ᓇᓗᓇᐃᔭᐃᓯᒪᔪᓂᑦ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᖃᓄᐃᓕᐅᕈᑎᒋᓚᐅᖅᑕᖏᑦ ᐊᑐᖅᑕᐅᓚᐅᕐᒪᖔᑕ ᐱᔾᔪᑎᒋᓪᓗᒍ ᐅᕕᓂᖃᑎᒌᖏᓐᓂᐅᔪᖅ ᐅᕝᕙᓘᓐᓃᑦ ᓇᓪᓕᐊᑕ ᐊᑐᓂ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᕐᒪᖔᑕ ᐃᓚᐃᓐᓈᕐᓂᐅᔪᓂᑦ ᐱᓕᕆᔾᔪᑎᐅᑎᓪᓗᒍ A.B.
36. 36) ᖃᓄᐃᓪᓗᐊᕐᓂᖓ ᐱᔨᑦᓯᕋᐅᑎᐅᕙᑦᑑᑉ ᑭᖕᖓᐃᑦ ᑎᒍᔭᐅᒪᕕᒻᒥ ᓈᒻᒪᖏᑦᑐᒻᒪᕆᐅᓚᐅᖅᑐᖅ. ᖃᓄᐃᓪᓗᐊᕐᓂᖓ ᐱᓕᕆᔾᔪᑎᖃᑦᓯᐊᖏᓐᓂᐅᑉ ᑕᑯᓐᓇᐅᖅᑕᐅᓯᒪᔫᑉ ᐊᑐᖅᑕᐅᔪᑦ ᐃᓱᒫᓘᑎᐅᓕᖅᑐᑎᒃ ᐊᑐᖅᑕᐅᑐᐃᓐᓇᕆᐊᓕᓐᓂᑦ ᐱᓕᕆᔾᔪᑎᒍᑦ ᐃᓚᐃᓐᓈᓂᕐᒥᑦ.

ᑭᖑᓪᓕᖅᐹᑦ ᐊᑐᖁᔭᑦ

1. 1) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐋᖅᑭᑦᓱᐃᒋᐊᓖᑦ ᐊᒻᒪ ᐱᒋᐊᖅᑎᑦᓯᓗᑎᒃ ᐱᓕᒻᒪᑦᓴᐅᑎᑦᓴᓂᑦ ᐱᔾᔪᑎᐅᓗᑎᒃ ᐊᑐᖅᑕᐅᕙᓐᓂᖏᑦ ᐸᓖᓯᓄᑦ ᓄᓇᒃᑰᔫᑦ ᐊᖑᔮᖃᖅᑎᓪᓗᒋᑦ ᐸᓯᔭᐅᓯᒪᔪᓂᑦ ᐅᓪᓚᑦᑐᓂᑦ ᐊᒻᒪ ᐱᔾᔪᑎᖃᓗᐊᕐᓗᑎᒃ ᖃᓄᖅ ᐱᓕᕆᔾᔪᑎᖃᕆᐊᖃᕐᓂᕐᒥᑦ ᓄᓇᒃᑰᔫᖅᑐᖃᖅᑎᓪᓗᒍ ᖃᓂᒋᓗᐊᖅᑕᖏᒍᑦ ᐱᓱᑦᑐᑦ ᑭᒃᑯᑐᐃᓐᓇᐃᑦ.
2. 2) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᓇᓗᓇᐃᕐᓯᒪᐃᓐᓇᕆᐊᓖᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓰᑦ ᐱᓕᒻᒪᓴᕐᓯᒪᒐᓗᐊᕐᒪᖔᑕ ᐱᔾᔪᑎᖃᕐᓗᑎᒃ ᓄᓇᒃᑰᔫᖅᐸᓂᕐᒥᑦ ᐊᑐᕆᐊᓪᓗᑦᑐᓂ, ᐱᖃᓯᐅᔾᔭᐅᕙᓪᓗᑎᒃ ᐊᑐᕆᐊᑦ ᓯᓚᑖᓂ ᓄᓇᒃᑰᔫᓄᑦ ᐊᒻᒪ ᑐᐊᐸᔭᓂᑦ ᐊᑐᕆᐊᓕᓐᓂᑦ, ᐊᒻᒪ ᐊᓯᖏᓐᓂᑦ ᐱᓕᒻᒪᓴᖅᐸᓪᓗᑎᒃ ᐃᑲᔫᑎᑦᓴᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐱᔾᔪᑎᖃᖅᐸᓪᓗᑎᒃ ᐅᓗᕆᐊᓇᖅᑐᓂᑦ ᓴᖅᑭᑕᐅᓯᒪᔪᓂᑦ ᐊᑐᕆᐊᑦ ᖃᓄᐃᓕᖓᓂᖏᓐᓂᑦ ᐱᓪᓗᐊᑕᐅᔪᓂ ᐊᕙᑎᓂ, ᐱᖃᓯᐅᔾᔭᐅᓗᑎᒃ ᐅᑭᐅᖅᑕᖅᑐᒥ ᓄᓇᓕᖃᕐᕕᐅᔪᓂ.
3. 3) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐃᓚᒋᔭᐅᓚᐅᖅᑐᑦ ᕿᓂᕐᕕᐅᑎᓪᓗᒍ A.B. (ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᐊᒻᒪ ᓵᔨᓐ ᒋᐅᓪ ᖃᐅᔨᓴᖅᑎᒋᔭᐅᓗᓂ ᑖᒃᑯᓄᖓ) ᐱᑎᑕᐅᒋᐊᓖᑦ ᐊᐅᓚᑦᑎᔾᔪᑎᓂᑦ ᒪᓕᒋᐊᓕᓐᓂᑦ ᐱᔾᔪᑎᖃᖅᑐᓂᑦ ᐱᑎᑦᑎᓂᕐᒥᑦ ᕿᐲᓐᓂᒃ ᐅᕝᕙᓘᓐᓃᑦ ᐅᓕᑦᓴᒥᑦ ᑎᒍᔭᐅᔪᓄᑦ.
4. 4) ᑭᖕᖓᐃᑦ ᑎᒍᔭᐅᒪᕕᖓ ᐊᖏᓪᓕᒋᐊᖅᑕᐅᔭᕆᐊᓕᒃ ᐃᓚᔭᐅᖁᓪᓗᒋᑦ ᐃᓪᓗᕈᓯᐅᔪᑦ ᑎᒍᔭᐅᒪᔪᓄᑦ ᐊᑐᖅᑕᐅᕙᑦᑐᑦ ᖁᓪᓗᓄᑦ (10) ᐃᓪᓗᕈᓯᖃᕈᓐᓇᓕᕐᓗᓂ.
5. 5) ᑳᓐᔅᑕᐳᓪ ᑭᐅᓕᖕ ᐊᒻᒪ ᓵᔨᓐ ᒋᐅᓪ ᐱᑎᑕᐅᔪᐃᓐᓇᐅᒋᐊᓖᑦ ᐊᐅᓚᑦᓯᔾᔪᑎᒍᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᕐᓴᐃᔭᕆᐊᖃᕐᓂᐅᔪᖅ ᑎᒍᔭᐅᒪᔪᓂᑦ.
6. 6) ᐅᐊᓴᕐᕕᖏᑦ ᐊᒻᒪ ᖁᕝᕕᖏᑦ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐃᓪᓗᕈᓯᖏᓐᓂ ᓴᓇᔭᐅᒋᐊᓖᑦ ᐊᒻᒪ ᒪᑭᒪᑎᑕᐅᕙᓪᓗᑎᒃ ᒪᓕᑦᑕᐅᓗᑎᒃ ᐃᓗᓕᖏᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖏᑕ.
7. 7) ᐃᔩᓐᓂᒃ ᓴᓗᒻᒪᕐᓴᐃᑎᖃᕐᕕᐅᔪᖅ ᑭᖕᖓᐃᑦ ᑎᒍᔭᐅᒪᕕᖏᓐᓂ ᓅᑕᐅᒋᐊᓕᒃ ᐅᐸᒐᕐᓂᓂᕐᓴᒧᑦ ᐊᒻᒪ ᐃᒻᒪᑦᑕᐅᕙᓪᓗᓂ ᖃᐅᑕᒫᑦ ᐃᒻᒪᒋᐊᖃᓕᕋᐃᑉᐸᑦ.
8. 8) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐱᒋᐊᖅᑎᑦᓯᔭᕆᐊᓖᑦ ᐃᓘᓐᓇᖏᓐᓂᑦ ᐊᑐᖁᔭᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᔨᐅᑉ ᐃᓱᒪᒋᔭᖏᓐᓂ ᐃᓱᒋᔭᖏᓐᓂ ᐅᓂᒃᑳᓕᐊᖓᑕ ᐊᑦᑐᐊᓂᕆᔭᖏᑦ ᐃᓗᐊᑕ ᖃᓄᐃᑦᑑᓂᖓᓄᑦ ᑭᖕᖓᐃᑦ ᑎᒍᔭᐅᒪᕕᖓᑕ.
9. 9) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓱᒪᑦᓴᕐᓯᐅᕈᑎᖃᕆᐊᓖᑦ ᑭᖑᕝᕕᖅᑕᐅᓗᓂ ᑭᖕᖓᐃᑦ ᑎᒍᔭᐅᒪᕕᖓᑕ ᐃᓪᓗᑦᑕᖓ.
10. 10) ᐃᓘᓐᓇᑎᒃ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᐅᓚᐅᖅᑐᑦ (ᑳᓐᔅᑕᐳᓪ ᑭᐅᓕᖕ, ᑳᓐᔅᑕᐳᓪ ᓯᒥᖦ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᑑᕐᔾ, ᐊᒻᒪ ᓵᔨᓐ ᒋᐅᓪ) ᐱᑎᑕᐅᒋᐊᓕᐅᔪᑦ ᐊᐅᓚᑦᑎᔾᔪᑎᓂᑦ ᐊᑐᐊᒐᓕᕆᓂᕐᒥᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓴᓗᒻᒪᕐᓴᐃᕙᓐᓂᐅᔪᖅ ᐃᓪᓗᕈᓯᕐᓂᒃ ᑎᒍᔭᐅᒪᕕᓐᓂᒃ ᕿᓚᒥᐅᔫᒥᔪᖅ.
11. 11) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓇᓗᓇᐃᕐᓯᒪᒋᐊᓕᐅᔪᑦ ᓈᒻᒪᑦᑐᓂᑦ ᐃᖅᑲᓇᐃᔭᖅᑎᖃᑦᓯᐊᓕᕋᓗᐊᕐᒪᖔᕐᒥᒃ ᐃᓘᓐᓇᖏᓐᓂ ᑎᒍᔭᐅᒪᕕᖏᓐᓂ ᐱᓕᕆᕝᕕᓐᓂ, ᐱᖃᓯᐅᔾᔭᐅᓗᓂ ᑭᖕᖓᐃᑦ ᑎᒍᔭᐅᒪᕕᖓᑦ.
12. 12) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᓘᓐᓇᖏᓐᓂᑦ ᐱᒋᐊᖅᑎᑦᓯᔭᕆᐊᓕᐅᔪᑦ ᐊᑐᖁᔭᐅᓯᒪᔪᓂᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐃᖕᒥᓂᕐᓱᖅᑐᖅ ᑲᒪᔨᓂᑦ ᕿᒥᕐᕈᓂᐅᑉ (IOR) ᐃᓱᒪᒋᔭᖏᓐᓂᑦ ᐅᓂᒃᑳᓕᐊᖏᓐᓃᑦᑐᓂᑦ ᐊᑦᑐᐊᔪᓂᑦ ᐅᐊᑦᓯᐅᔪᓄᑦ ᐱᓕᕆᔾᔪᑎᓂᑦ ᐊᒻᒪ ᐱᓕᒻᒪᑦᓴᐃᑎᓂᑦ.
13. 13) ᓵᔨᓐ ᒋᐅᓪ ᐱᑎᑕᐅᒋᐊᓕᒃ ᐊᐅᓚᑦᑎᔾᔪᑎᓕᕆᔪᓂᑦ ᐊᑐᐊᒐᕐᓂᑦ ᐱᔾᔪᑎᒋᓪᓗᒋᑦ ᓈᒻᒪᑦᑐᓂᑦ ᖃᐅᔨᓴᐅᑎᐅᔪᑦ ᐃᖅᑲᓇᐃᔭᖅᑎᓂᑦ ᐊᒻᒪ ᐱᓕᒻᒪᑦᓴᐃᑎᓂᑦ ᐊᑐᕆᐊᓕᖏᓐᓂᑦ ᑎᒍᔭᐅᒪᕕᒻᒥ ᐅᐊᑦᓯᐅᔪᓄᑦ ᒪᓕᑦᑐᒋᑦ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᐊᑐᐊᒐᖓᑦ.
14. 14) ᑳᓐᔅᑕᐳᓪ ᓯᑑᕐᔾ, ᑳᓐᔅᑕᐳᓪ ᓱᓚᑦ, ᑳᓐᔅᑕᐳᓪ ᓯᒥᖦ ᐊᒻᒪ ᓵᔨᓐ ᒋᐅᓪ ᐱᑎᑕᐅᖁᓪᓗᒋᑦ ᐊᐅᓚᑦᓯᔾᔪᑎᓂᑦ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᐱᒻᒪᕆᐅᓂᖏᓐᓂᑦ ᓇᓗᓇᐃᕐᓯᒪᑦᓯᐊᕐᓗᒋᑦ ᑎᑎᕋᕆᐊᖃᕐᓂᕐᒥᑦ ᐊᒻᒪ ᑐᓴᐅᒪᑎᑦᓯᕙᓐᓂᕐᒥᑦ ᑐᑭᓯᒋᐊᕈᑎᓂᑦ ᐱᔾᔪᑎᖃᖅᑐᓂᑦ ᑎᒍᔭᐅᒪᔫᑉ ᐋᓐᓂᐊᔪᓕᕆᔨᓄᑦ ᑲᒪᒋᔭᐅᒋᐊᖃᕐᓂᖏᓐᓂᑦ.
15. 15) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᓴᖅᑮᔭᕆᐊᓖᑦ ᑐᓴᕋᑦᓴᓂᑦ ᓇᓗᓇᐃᔭᐃᓯᒪᔪᓂᑦ ᓂᐊᖁᒃᑯᑦ ᐋᓐᓂᕐᓯᒪᑐᐃᓐᓇᕆᐊᓖᑦ ᑎᒍᔭᐅᒪᔪᑦ ᐱᓕᕆᔾᔪᑎᐅᒋᐊᖃᖅᐸᒻᒪᑕ ᑲᒪᒋᔭᐅᑦᓯᐊᐸᓪᓗᑎᒃ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᑕᒻᒪᕈᓐᓇᕐᒪᑕ ᐅᔾᔨᕈᓲᑎᖃᓗᐊᕐᓂᒃᑯᑦ ᖃᐅᔨᒋᐊᑦᑕᐅᑎᒋᕙᓪᓗᑎᒃ ᑕᕝᕙᓴᐃᓐᓇᖅ ᐋᓐᓂᐊᔪᓕᕆᔨᓄᑦ ᖃᐅᔨᓴᖅᑕᐅᕙᓪᓗᑎᒃ ᑕᐃᒪᐃᑦᑐᓂᑦ ᐊᑐᖅᑐᖃᖅᑎᓪᓗᒍ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᑦ (RCMP) ᐸᓖᓯᒃᑯᑦ ᖃᐅᔨᒪᒋᐊᖃᒻᒪᕆᑦᑐᑎᒃ ᐋᖓᔮᖅᑐᖃᖅᑎᓪᓗᒍ ᓴᖅᑭᔮᖅᑎᑦᓯᖏᑐᐃᓐᓇᕆᐊᖃᕐᒪᑕ ᓂᐊᖁᒃᑯᑦ ᐋᓐᓂᖅᑕᐅᓯᒪᔪᓂᑦ.  
16. 16) ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᐊᓯᔾᔩᒋᐊᓖᑦ ᐊᑐᐊᒐᓕᐅᕈᑎᖏᓐᓂᑦ ᐱᑕᖃᒃᑲᓐᓂᖁᓪᓗᒍ ᖃᐅᔨᒪᒋᐊᖁᔨᔾᔪᑎᓂᑦ ᐊᒻᒪ ᐊᑐᐊᒐᕐᓂᑦ ᐱᔾᔪᑎᖃᖅᑐᓂᑦ ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐋᔩᖃᑎᖃᕐᓂᕐᒥᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᐱᔾᔪᑎᖃᕐᓗᑎᒃ ᐊᐅᓚᑦᑎᔾᔪᑎᓂᑦ ᐊᑭᓕᖅᑕᐅᓇᓱᐊᕈᑎᓂᑦ ᐃᖅᑲᖅᑐᐃᕕᓕᕆᔨᓂᑦ ᐊᒻᒪ ᐊᑭᓕᖅᑕᐅᑎᓂᑦ ᐃᖅᑲᖅᑐᐃᕕᒃᑰᕈᑎᐅᓯᒪᖏᑦᑐᓂᑦ.
17. 17) ᐊᑐᐊᒐᐃᑦ ᖃᓄᖅ ᐊᐅᓚᑕᐅᒋᐊᖃᕐᒪᖔᑕ ᐊᑭᓕᖅᑕᐅᔾᔪᑎᓂᑦ ᐱᓇᓱᐊᕈᑎᐅᔪᑦ ᐃᖅᑲᖅᑐᐃᕕᒻᒥ ᐱᑕᖃᕆᐊᓕᐅᒐᓗᐊᑦ ᑎᑎᕋᕐᓯᒪᔪᓂᑦ ᓴᐳᒻᒥᑦᓯᔾᔪᑎᑦᓴᓂᑦ ᐅᓗᕆᐊᓇᖅᑐᒦᑐᐃᓐᓇᕆᐊᓕᓐᓂᑦ ᑭᒃᑯᑐᐃᓐᓇᕐᓂᒃ, ᐱᖃᓯᐅᔾᔭᐅᓗᓂ ᐊᑐᕆᐊᖃᖅᑎᑕᐅᔪᖅ ᑭᒃᑯᑐᐃᓐᓇᐃᑦ ᑕᑯᒋᐊᕐᓯᒪᖁᔭᐅᕙᓪᓗᑎᒃ ᒪᓕᒐᓕᕆᔨᓂᑦ ᐊᑎᓕᐅᓚᐅᖏᓐᓂᖏᓐᓂ ᐱᑎᑕᐅᔾᔪᑎᒥᑦ ᐊᖏᕈᑎᒥᑦ, ᐅᕝᕙᓘᓐᓃᑦ ᐅᖃᐅᓯᖃᕐᓗᑎᒃ ᐊᑐᕈᓐᓃᑎᑦᓯᓗᑎᒃ ᑖᑦᓱᒥᖓ ᐱᔪᓐᓇᐅᑎᒥᓂᒃ. ᐊᑐᐊᒐᐃᑦ ᐱᑕᖃᕆᐊᖃᕐᒥᔪᑦ ᑎᑎᕋᕐᓯᒪᔪᓂᑦ ᐱᓕᕆᔾᔪᑎᑦᓴᖏᓐᓂᑦ ᐊᐅᓚᑦᓯᔨᐅᔪᑦ ᐊᒻᒪ ᖃᐅᔨᓴᖅᑎᐅᔪᑦ ᓇᓗᓇᐃᕐᓯᒪᕙᓐᓂᒃᑯᑦ ᑭᒃᑯᑐᐃᓐᓇᐃᑦ ᑐᑭᓯᒪᑦᑎᐊᕆᐊᖃᕐᓂᖏᓐᓂᑦ ᐅᐸᓗᖓᐃᔭᐅᑎᒥᑦ ᐊᒻᒪ ᑕᐃᒎᓯᐅᔪᑦ ᑎᑎᕋᕐᓯᒪᔪᑦ ᐱᑎᑕᐅᔾᔪᑎᐅᖁᔭᐅᔪᓂ.
18. 18) ᐱᓕᒻᒪᑦᓴᐃᑎᑦᓴᓂᑦ ᐋᖅᑭᑦᓱᐃᒋᐊᓖᑦ ᐊᒻᒪ ᐱᒋᐊᖅᑎᑕᐅᓗᑎᒃ ᐃᖅᑲᓇᐃᔭᖅᑎᓄᑦ ᐱᓕᕆᐊᖃᖅᐸᑦᑐᓄᑦ ᐊᑭᓕᖅᑕᐅᔾᔪᑎᑦᓴᓂᑦ ᐊᐅᓚᑦᓯᓪᓗᑎᒃ.
19. 19) ᖃᐅᔨᓴᖅᑕᐅᑲᓐᓂᕆᐊᓖᑦ ᐱᓕᕆᔾᔪᑎᒍᑦ ᐃᓚᐃᓐᓈᖅᑐᖃᖅᐸᒻᒪᖔᖅ, ᐊᒻᒪ ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒪᑭᒪᑎᑦᓰᓐᓇᕆᐊᓖᑦ ᓈᓴᐅᑎᓂᑦ ᐊᑦᑐᐊᔪᓂᑦ ᐱᔨᑦᓯᕋᐅᑎᐅᒋᐊᓕᓐᓄᑦ ᐊᒻᒪ ᑮᓇᐅᔭᓄᑦ ᐊᑦᑐᐊᔪᓂᑦ ᓄᓇᕘᒥ ᑎᒍᔭᐅᒪᕕᖏᓐᓂᑦ. ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᓇᓗᓇᐃᕐᓯᒪᒋᐊᓖᑦ ᓈᒻᒪᑦᑐᓂᑦ ᐱᔨᑦᓯᕋᐅᑎᓂᑦ ᐊᑐᐃᓐᓇᖃᕐᓂᕐᒥᑦ ᐃᓘᓐᓇᖏᓐᓄᑦ ᑲᓇᑕᒥᐅᑕᓕᒫᑦᓯᐊᓄᑦ ᐃᓱᒪᒋᖏᓯᐊᕐᓗᒋᑦ ᓇᒥᒥᐅᑕᐅᓂᖏᓐᓂᑦ.
20. 20) ᕈᐊᐃᐅᓪ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᒫᓐᓇᑲᐅᑎᒋ ᐅᖃᖃᑎᖃᕆᐊᖃᓕᖅᑐᑦ ᒐᕙᒪᒃᑯᓐᓂᑦ ᓄᓇᕘᒥ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑕᐅᕙᑦᑐᓂᑦ ᓇᓗᓇᐃᕐᓯᒪᓇᓱᐊᕐᓗᑎᒃ ᓈᒻᒪᑦᑐᓂᑦ ᐱᓕᕆᔾᔪᑎᖃᖅᐸᒃᑲᓗᐊᕐᒪᖔᑕ ᐊᒻᒪ ᑮᓇᐅᔭᓂᑦ ᓄᓇᕘᒥ ᑎᒍᔭᐅᒪᕕᐅᔪᑦ ᓈᒻᒪᑦᑐᓂᑦ ᐱᔨᑦᓯᕋᖅᐸᓂᐊᕐᒪᑕ ᑭᖕᖓᐃᑦ ᑎᒍᔭᐅᒪᕕᖏᓐᓂ ᐊᒻᒪ ᐊᓯᖏᓐᓂ ᓄᓇᕘᒥ ᑎᒍᔭᐅᒪᕕᖃᕐᕕᓐᓂ ᓵᖕᖓᕙᒻᒥᔪᓂᑦ ᐊᔾᔨᐸᓗᖏᓐᓂᑦ ᖃᓄᐃᓕᖓᒍᑎᐅᔪᓂᑦ.

ᐃᓱᐊ

[139] ᖃᐅᔨᓴᖅᑏᑦ ᐱᔭᕇᕐᓯᒪᓕᖅᑐᑦ ᖃᐅᔨᓴᖅᑕᒥᓂᒃ ᑖᓐᓇ ᐊᑲᐅᖏᓕᐅᕈᑎ ᐱᓪᓗᒍ. ᐃᓱᒪᑦᓴᕐᓯᐅᕈᑎᐅᓚᐅᖅᑎᓪᓗᒍ ᕈᐊᐃᐅᓐ ᑲᓇᐃᑎᐊᓐ ᒪᐅᓐᑕᑦ ᐸᓖᔅ (RCMP) ᐸᓖᓯᒃᑯᑦ ᑲᒥᓯᓇᖓᑕ ᑭᐅᔾᔪᑎᖓ, ᖃᐅᔨᓴᖅᑏᑦ ᐋᖅᑭᑦᓱᐃᔨᐅᔪᑦ ᑭᖑᓪᓕᖅᐹᓂᑦ ᓇᓂᓯᓂᕐᒥᑦ ᐊᒻᒪ ᐊᑐᖁᔨᓂᕐᒥᑦ ᐅᕙᓂ ᑭᖑᓪᓕᖅᐹᓂ ᐅᓂᒃᑳᓕᐊᓂ ᐊᒻᒪ ᑭᒃᑯᑐᐃᓐᓇᕐᓄᑦ ᑐᓴᐅᒪᔭᐅᒍᒪᔪᑦ ᐃᓪᓗᒋᑦ ᖃᐅᔨᓴᕐᓂᐅᔪᖅ ᐱᔭᕇᖅᑐᖅ.

ᒥᓯᓚᐃᓐ ᓚᕼᐊᐃ
ᐃᒃᓯᕙᐅᑕᖅ